24 shlokas
- 1
प्रचरणकाले प्रवर्ग्येण प्रचर्योपसदा प्रचरन्त्य् उपसदा वा प्रचर्य प्रवर्ग्येण
pracaraṇakāle pravargyeṇa pracaryopasadā pracaranty upasadā vā pracarya pravargyeṇa
- 2
तेन चरिष्यन्तः संवृण्वन्ति द्वाराणि स्त्रियो यथा न पश्यन्ति परिश्रयन्ति पत्नीसंचारान्
tena cariṣyantaḥ saṃvṛṇvanti dvārāṇi striyo yathā na paśyanti pariśrayanti patnīsaṃcārān
- 3
पुरस्ताद् अध्वर्युः पश्चाद्धोतोपविशति दक्षिणतः पश्चात्प्रस्तोता दक्षिणतो ब्रह्मा यजमानश्चोत्तरतः प्रतिप्रस्थाताग्नीध्रश्च
purastād adhvaryuḥ paścāddhotopaviśati dakṣiṇataḥ paścātprastotā dakṣiṇato brahmā yajamānaścottarataḥ pratiprasthātāgnīdhraśca
- 4
अप उपस्पृश्य मदन्तीर्नमो वाच इति शान्तिं जपित्वा पुरस्ताद्गार्हपत्यस्य मुञ्जप्रलवान्संस्तीर्य तेषु देव पुरश्चर सघ्यासं त्वेति प्रथमं महावीरम् उपावहरत्य् एवम् इतरौ तूष्णीम् इतराणि
apa upaspṛśya madantīrnamo vāca iti śāntiṃ japitvā purastādgārhapatyasya muñjapralavānsaṃstīrya teṣu deva puraścara saghyāsaṃ tveti prathamaṃ mahāvīram upāvaharaty evam itarau tūṣṇīm itarāṇi
- 5
अत्रैव प्रवर्ग्यार्थान्संभारान्संसादयति
atraiva pravargyārthānsaṃbhārānsaṃsādayati
- 6
सोमासन्दीप्रकारा वर्षीयसी सम्राडासन्दी ह्रसीयसी वा
somāsandīprakārā varṣīyasī samrāḍāsandī hrasīyasī vā
- 7
चतस्रः स्रुचस्तासु द्वे रौहिणहवन्याव् अनिम्ने
catasraḥ srucastāsu dve rauhiṇahavanyāv animne
- 8
इतरे द्वे सनिम्ने
itare dve sanimne
- 9
तयोर्वर्षीयस्य् उपयमनी प्रोक्षणीधानी ह्रसीयसी
tayorvarṣīyasy upayamanī prokṣaṇīdhānī hrasīyasī
- 10
द्वौ स्रुवौ द्वे धृष्टी च
dvau sruvau dve dhṛṣṭī ca
- 11
महावीरसंमितौ पार्श्वतश्छिन्नाव् अन्यतरतः संतृण्णौ संदंशौ शफाव् इत्य् आचक्षते
mahāvīrasaṃmitau pārśvataśchinnāv anyatarataḥ saṃtṛṇṇau saṃdaṃśau śaphāv ity ācakṣate
- 12
स्थूलशङ्कुर्घर्मदुघार्थस्त्रयो ऽस्थूलशङ्कवो वत्साद्यर्था अमी अवत्सशङ्कुर् इति पदंदिनां षट्छकलाश्चैतान्य् औदुम्बराणि
sthūlaśaṅkurgharmadughārthastrayo 'sthūlaśaṅkavo vatsādyarthā amī avatsaśaṅkur iti padaṃdināṃ ṣaṭchakalāścaitāny audumbarāṇi
- 13
वैकङ्कती समित्परिधयो वैकङ्कतास्त्रयोदशेन्धनानि पालाशानि वैणवानि वैकङ्कतानि खादिराण्य् आर्काण्य् औदुम्बराणि शमीमयानि वा
vaikaṅkatī samitparidhayo vaikaṅkatāstrayodaśendhanāni pālāśāni vaiṇavāni vaikaṅkatāni khādirāṇy ārkāṇy audumbarāṇi śamīmayāni vā
- 14
शुक्लकृष्णरोमाणि कार्ष्णाजिनानि धवित्राणि त्रीणि बाहुप्रमाणदण्डानि
śuklakṛṣṇaromāṇi kārṣṇājināni dhavitrāṇi trīṇi bāhupramāṇadaṇḍāni
- 15
वैणवा औदुम्बरा वा दण्डाः
vaiṇavā audumbarā vā daṇḍāḥ
- 16
शतमानं रजतं सुवर्णं च
śatamānaṃ rajataṃ suvarṇaṃ ca
- 17
साग्रश्छिन्नाग्रश्च द्वौ वेदाव् अभिधानी द्वे निदाने त्रीणि विशाखदामानि
sāgraśchinnāgraśca dvau vedāv abhidhānī dve nidāne trīṇi viśākhadāmāni
- 18
एतानि मौञ्जानि
etāni mauñjāni
- 19
अफलीकृतानि रौहिण्योः पिष्टानि
aphalīkṛtāni rauhiṇyoḥ piṣṭāni
- 20
प्रभूता मुञ्जप्रलवाः
prabhūtā muñjapralavāḥ
- 21
खरेभ्यः सिकता
kharebhyaḥ sikatā
- 22
मौञ्जे पवित्रे दर्भमये वा
mauñje pavitre darbhamaye vā
- 23
उत्तरेण गार्हपत्यं स्फ्येनोद्धत्यावोक्ष्य सिकता न्युप्य प्रादेशमात्रं परिमण्डलं प्रवृञ्जनीयम् उत्तरेणाहवनीयं तथोद्वासनीयम् उत्तरेण शालां चतुरश्रं निष्यन्दवन्तम् उच्छिष्टखरम् एवं त्रीन्खरान्कृत्वा शिष्टाः सिकता उत्तरार्धे निधेयाः स्युः
uttareṇa gārhapatyaṃ sphyenoddhatyāvokṣya sikatā nyupya prādeśamātraṃ parimaṇḍalaṃ pravṛñjanīyam uttareṇāhavanīyaṃ tathodvāsanīyam uttareṇa śālāṃ caturaśraṃ niṣyandavantam ucchiṣṭakharam evaṃ trīnkharānkṛtvā śiṣṭāḥ sikatā uttarārdhe nidheyāḥ syuḥ
- 24
अथ प्रोक्षणीः संस्कृत्य ब्रह्मन्प्रवर्ग्येण प्रचरिष्यामो होतर्घर्मम् अभिष्टुह्य् अग्नीद्रौहिणौ पुरोडाशाव् अधिश्रय प्रतिप्रस्थातः प्रवर्ग्यं विहर प्रस्तोतः सामानि गायेति ब्रह्मादीन्संप्रेष्यति
atha prokṣaṇīḥ saṃskṛtya brahmanpravargyeṇa pracariṣyāmo hotargharmam abhiṣṭuhy agnīdrauhiṇau puroḍāśāv adhiśraya pratiprasthātaḥ pravargyaṃ vihara prastotaḥ sāmāni gāyeti brahmādīnsaṃpreṣyati

