15 shlokas
- 1
प्रवर्ग्येण चरिष्यन्न् अमावास्यायां पौर्णमास्यां शुक्लपक्षे पुण्ये ऽहनि वा संभाराहर्तुर्नमो वाच इत्य् अनुवाकेन शान्तिं कृत्वा वैकङ्कतीं खादिरीं वैणवीं वा समिधम् आधाय युञ्जते मन इति चतुर्गृहीतं जुहोति
pravargyeṇa cariṣyann amāvāsyāyāṃ paurṇamāsyāṃ śuklapakṣe puṇye 'hani vā saṃbhārāharturnamo vāca ity anuvākena śāntiṃ kṛtvā vaikaṅkatīṃ khādirīṃ vaiṇavīṃ vā samidham ādhāya yuñjate mana iti caturgṛhītaṃ juhoti
- 2
न दीक्षितस्य जुहुयात्
na dīkṣitasya juhuyāt
- 3
काण्टकीम् एवैतया समिधम् आदध्याद् एतां वा जपेत्
kāṇṭakīm evaitayā samidham ādadhyād etāṃ vā japet
- 4
देवस्य त्वेति खादिरीम् औदुम्बरीं वैकङ्कतीं वैणवीं वा व्यायाममात्रीम् अरत्निमात्रीं वा कल्माषीम् उभयतःक्ष्णूम् अभ्रिम् आदायाविर् असि नारिर् असीत्य् अभिमन्त्र्योत्थायोत्तिष्ठ ब्रह्मणस्पत इति ब्रह्माणम् आमन्त्रयते
devasya tveti khādirīm audumbarīṃ vaikaṅkatīṃ vaiṇavīṃ vā vyāyāmamātrīm aratnimātrīṃ vā kalmāṣīm ubhayataḥkṣṇūm abhrim ādāyāvir asi nārir asīty abhimantryotthāyottiṣṭha brahmaṇaspata iti brahmāṇam āmantrayate
- 5
ब्रह्मोपोत्तिष्ठति
brahmopottiṣṭhati
- 6
उभाव् उपप्रयन्त्व् इत्य् उत्तरम् अर्धर्चं जपतः
ubhāv upaprayantv ity uttaram ardharcaṃ japataḥ
- 7
आददते कृष्णाजिनम्
ādadate kṛṣṇājinam
- 8
यतः कुतश्चिन्मृदं खनित्वाहरन्ति तत्र प्रैतु ब्रह्मणस्पतिर् इत्य् अश्वप्रथमाः प्राञ्चो यन्त्य् अपि वा संभाराः परिश्रिते भवन्ति
yataḥ kutaścinmṛdaṃ khanitvāharanti tatra praitu brahmaṇaspatir ity aśvaprathamāḥ prāñco yanty api vā saṃbhārāḥ pariśrite bhavanti
- 9
पुरस्ताद् आहवनीयान्मृत्खनः पूर्वः पूर्व उत्तरोत्तरो भवति
purastād āhavanīyānmṛtkhanaḥ pūrvaḥ pūrva uttarottaro bhavati
- 10
उत्तरेण मृत्खनं प्राचीनाग्रेषु दर्भेषु कृष्णाजिनं प्राचीनग्रीवम् उत्तरलोमोपस्तृणाति
uttareṇa mṛtkhanaṃ prācīnāgreṣu darbheṣu kṛṣṇājinaṃ prācīnagrīvam uttaralomopastṛṇāti
- 11
देवी द्यावापृथिवी इति द्यावापृथिवी उपस्थाय ऋध्यासम् अद्येत्य् अभ्रिया मृत्खने प्रहृत्य मखस्य शिर इत्य् अपादाय मखाय त्वेति हृत्वा मखस्य त्वा शीर्ष्ण इति कृष्णाजिने निवपति
devī dyāvāpṛthivī iti dyāvāpṛthivī upasthāya ṛdhyāsam adyety abhriyā mṛtkhane prahṛtya makhasya śira ity apādāya makhāya tveti hṛtvā makhasya tvā śīrṣṇa iti kṛṣṇājine nivapati
- 12
एवं द्वितीयं तृतीयं च हृत्वा निवपति
evaṃ dvitīyaṃ tṛtīyaṃ ca hṛtvā nivapati
- 13
तूष्णीं चतुर्थम् अपरिमितं वा यावत्यो मृदः प्रवर्ग्यपात्रेभ्य आप्ताः स्युः
tūṣṇīṃ caturtham aparimitaṃ vā yāvatyo mṛdaḥ pravargyapātrebhya āptāḥ syuḥ
- 14
प्रायश्चित्ताय परिशिनष्टि शेषम्
prāyaścittāya pariśinaṣṭi śeṣam
- 15
एवम् इतरेषां संभाराणाम्
evam itareṣāṃ saṃbhārāṇām

