17 shlokas
- 1
इन्द्राश्विनेति महावीरे गोपय आनयति
indrāśvineti mahāvīre gopaya ānayati
- 2
स्वाहा त्वा सूर्यस्य रश्मय इत्य् उद्यन्तम् ऊष्माणम् उपतिष्ठते
svāhā tvā sūryasya raśmaya ity udyantam ūṣmāṇam upatiṣṭhate
- 3
मधु हविर् असीत्य् अजापयः प्रतिप्रस्थाता
madhu havir asīty ajāpayaḥ pratiprasthātā
- 4
सूर्यस्य तपस्तपेत्य् उद्यन्तम् ऊष्माणम् उपतिष्ठते
sūryasya tapastapety udyantam ūṣmāṇam upatiṣṭhate
- 5
द्यावापृथिवीभ्यां त्वा परिगृह्णामीत्य् अध्वर्युः संदंशनेन महावीरं परिगृह्णाति
dyāvāpṛthivībhyāṃ tvā parigṛhṇāmīty adhvaryuḥ saṃdaṃśanena mahāvīraṃ parigṛhṇāti
- 6
वेदेन प्रमृज्यान्तरिक्षेण त्वोपयच्छामीत्य् उपयमनेन प्रतिप्रस्थातोपयच्छति
vedena pramṛjyāntarikṣeṇa tvopayacchāmīty upayamanena pratiprasthātopayacchati
- 7
देवानां त्वेत्य् आदायोत्तिष्ठति
devānāṃ tvety ādāyottiṣṭhati
- 8
तेजो ऽसि तेजो ऽनुप्रेहीति प्राग् आहरति
tejo 'si tejo 'nuprehīti prāg āharati
- 9
अग्निर्मा पृथिव्याः पातु वायुर् अन्तरिक्षात्सूर्यो दिव इति दिविस्पृङ्मा मा हिंसीर् इति जपित्वा समुद्राय त्वा वाताय स्वाहेति पञ्च वातनामानि गच्छन्न् एवानवानं व्याचष्टे सप्त वा
agnirmā pṛthivyāḥ pātu vāyur antarikṣātsūryo diva iti divispṛṅmā mā hiṃsīr iti japitvā samudrāya tvā vātāya svāheti pañca vātanāmāni gacchann evānavānaṃ vyācaṣṭe sapta vā
- 10
अपान्याग्नये त्वा वसुमते स्वाहेति पञ्चोत्तराण्य् अवशिष्टानि
apānyāgnaye tvā vasumate svāheti pañcottarāṇy avaśiṣṭāni
- 11
शिष्टा विकल्पार्थम्
śiṣṭā vikalpārtham
- 12
एतस्मिन्काले प्रतिप्रस्थाता दक्षिणम् अहर्ज्योतिः केतुनेति प्रातर्जुहोति रात्रिर् इति सायम् अपरेणाहवनीयं दक्षिणातिक्रम्य विश्वा आशा दक्षिणसद् इति ब्रह्माणम् अभिसमीक्ष्य विश्वान्देवान् अयाड् इहेति पश्चाद् आसीनं होतारं स्वाहाकृतस्य घर्मस्येति घर्मम् अभिसमीक्ष्याश्राव्य प्रत्याश्राविते घर्मस्य यजेति संप्रेष्यति
etasminkāle pratiprasthātā dakṣiṇam aharjyotiḥ ketuneti prātarjuhoti rātrir iti sāyam apareṇāhavanīyaṃ dakṣiṇātikramya viśvā āśā dakṣiṇasad iti brahmāṇam abhisamīkṣya viśvāndevān ayāḍ iheti paścād āsīnaṃ hotāraṃ svāhākṛtasya gharmasyeti gharmam abhisamīkṣyāśrāvya pratyāśrāvite gharmasya yajeti saṃpreṣyati
- 13
उत्तमया वाचा प्रचरति
uttamayā vācā pracarati
- 14
अश्विना घर्मं पातम् इति वषट्कृते जुहोति स्वाहेन्द्रावड् इत्य् अनुवषट्कृते
aśvinā gharmaṃ pātam iti vaṣaṭkṛte juhoti svāhendrāvaḍ ity anuvaṣaṭkṛte
- 15
घर्मम् अपातम् अश्विनेति हुतं घर्ममुपतिष्ठते
gharmam apātam aśvineti hutaṃ gharmamupatiṣṭhate
- 16
नमो दिवे नमः पृथिव्या इत्य् अनुवाकशेषेणोपर्याहवनीये धार्यमाणं महावीरं यजमान उपतिष्ठते
namo dive namaḥ pṛthivyā ity anuvākaśeṣeṇoparyāhavanīye dhāryamāṇaṃ mahāvīraṃ yajamāna upatiṣṭhate
- 17
तं प्रतिप्रस्थाता शृतदध्नाभिपूरयति
taṃ pratiprasthātā śṛtadadhnābhipūrayati

