109 shlokas
- 1
अथेदानीं प्रवक्ष्यामि रसराजस्य बंधनम्
अनुभूतं मया किंचित्गुरूणां हि प्रसादतः
athedānīṃ pravakṣyāmi rasarājasya baṃdhanam
anubhūtaṃ mayā kiṃcitgurūṇāṃ hi prasādataḥ
- 2
बंधश्चतुर्विधः प्रोक्तो जलौका खोटपाटकौ
तथा भस्माभिधः साक्षात्कथितोऽपि रसागमे
baṃdhaścaturvidhaḥ prokto jalaukā khoṭapāṭakau
tathā bhasmābhidhaḥ sākṣātkathito'pi rasāgame
- 3
पक्वबन्धो जलौका स्यात्पिष्टीस्तम्भस्तु खोटकः
पाटः पर्पटिकाबन्धो भस्म भूतिसमो भवेत्
pakvabandho jalaukā syātpiṣṭīstambhastu khoṭakaḥ
pāṭaḥ parpaṭikābandho bhasma bhūtisamo bhavet
- 4
मूलिकात्र मणिश्चैव स्वर्णकं नागवङ्गके
चत्वार एते सूतस्य बन्धनस्याथ कारणम्
mūlikātra maṇiścaiva svarṇakaṃ nāgavaṅgake
catvāra ete sūtasya bandhanasyātha kāraṇam
- 5
उत्तमो मूलिकाबन्धो मणिबन्धस्तु मध्यमः
अधमो धातुबन्धस्तु पूतिबन्धो ऽधमाधमः
uttamo mūlikābandho maṇibandhastu madhyamaḥ
adhamo dhātubandhastu pūtibandho 'dhamādhamaḥ
- 6
द्रुतिबन्धः पञ्चमोऽसौ देहलोहकरः सदा
अभ्रद्रुतिविशेषेण विज्ञेयोऽसौ भिषग्वरैः
drutibandhaḥ pañcamo'sau dehalohakaraḥ sadā
abhradrutiviśeṣeṇa vijñeyo'sau bhiṣagvaraiḥ
- 7
क्रमप्राप्तमिदं वक्ष्ये मूलिकाबन्धनं रसे
शुद्धो राक्षसवक्त्रश्च रसश्चाभ्रकजारितः
kramaprāptamidaṃ vakṣye mūlikābandhanaṃ rase
śuddho rākṣasavaktraśca rasaścābhrakajāritaḥ
- 8
इङ्गुदीमूलनिर्यासे मर्दितः पारदस्त्र्यहम्
तत उद्धृत्य वस्त्रेण बंधनं कारयेद्भिषक्
iṅgudīmūlaniryāse marditaḥ pāradastryaham
tata uddhṛtya vastreṇa baṃdhanaṃ kārayedbhiṣak
- 9
कांजिके स्वेदनं कुर्यान्नियतं सप्तवासरम्
पाचितं चान्नमध्ये तु कर्तव्यं वत्सरावधि
kāṃjike svedanaṃ kuryānniyataṃ saptavāsaram
pācitaṃ cānnamadhye tu kartavyaṃ vatsarāvadhi
- 10
ततो धूर्तफले न्यस्तं स्वेदयेच्छतसंख्यया
पाचितोऽसौ महातैले धूर्ततैले ऽन्नराशिके
tato dhūrtaphale nyastaṃ svedayecchatasaṃkhyayā
pācito'sau mahātaile dhūrtataile 'nnarāśike
- 11
बद्धस्तु तेन विधिना कठिनत्वं प्रजायते
वंगस्य स्तम्भनं सम्यक्करोत्येव न संशयः
धारितोऽसौ मुखे साक्षाद्वीर्यस्तम्भकरः सदा
मूलिकाबंधनं ह्येकं कथितं पारदस्य वै
baddhastu tena vidhinā kaṭhinatvaṃ prajāyate
vaṃgasya stambhanaṃ samyakkarotyeva na saṃśayaḥ
dhārito'sau mukhe sākṣādvīryastambhakaraḥ sadā
mūlikābaṃdhanaṃ hyekaṃ kathitaṃ pāradasya vai
- 12
अथापरः प्रकारो हि बन्धनस्यापि पारदे
नागार्जुनीमूलरसैर्मर्दयेद्दिनसप्तकम्
athāparaḥ prakāro hi bandhanasyāpi pārade
nāgārjunīmūlarasairmardayeddinasaptakam
- 13
मुखचर्वणसम्भूतैर्निम्बकाष्ठेन पेषितः
नवनीतसमस्तेन जायते पारदस्ततः
mukhacarvaṇasambhūtairnimbakāṣṭhena peṣitaḥ
navanītasamastena jāyate pāradastataḥ
- 14
वस्त्रेण बंधनं कृत्वा फले धौर्ते निवेशयेत्
गोमयैर्वेष्टितं तच्च करीषाग्नौ विपाचयेत्
vastreṇa baṃdhanaṃ kṛtvā phale dhaurte niveśayet
gomayairveṣṭitaṃ tacca karīṣāgnau vipācayet
- 15
लावकाख्ये पुटे सम्यक्क्रमवृद्ध्या शतं पुटेत्
मासत्रयप्रमाणेन पाचयेदन्नमध्यतः
lāvakākhye puṭe samyakkramavṛddhyā śataṃ puṭet
māsatrayapramāṇena pācayedannamadhyataḥ
- 16
पश्चात्पुटशतं दद्याच्छगणेनाथ पूर्ववत्
अनेनैव प्रकारेण बध्यते सूतकः सदा
paścātpuṭaśataṃ dadyācchagaṇenātha pūrvavat
anenaiva prakāreṇa badhyate sūtakaḥ sadā
- 17
दृष्टप्रत्यययोगोऽयं कथितः साधकाय वै
धारितोऽसौ मुखे सम्यक्वीर्यस्तंभकरः परम्
वंगस्तंभकरोऽप्येवं बद्धः सूतवरोऽप्यलम्
dṛṣṭapratyayayogo'yaṃ kathitaḥ sādhakāya vai
dhārito'sau mukhe samyakvīryastaṃbhakaraḥ param
vaṃgastaṃbhakaro'pyevaṃ baddhaḥ sūtavaro'pyalam
- 18
शुद्धं सुजारिताभ्रं वै सूतकं च विमर्दयेत्
अर्कमूलरसेनैव वासरैकं प्रयत्नतः
śuddhaṃ sujāritābhraṃ vai sūtakaṃ ca vimardayet
arkamūlarasenaiva vāsaraikaṃ prayatnataḥ
- 19
वज्रमूषा ततः कार्या सुदृढा मसृणीकृता
अर्कमूलभवेनैव कल्केन परिलेपिता
vajramūṣā tataḥ kāryā sudṛḍhā masṛṇīkṛtā
arkamūlabhavenaiva kalkena parilepitā
- 20
मूषामध्ये रसं मुक्त्वा चान्धयेद् अन्यमूषया
यामार्धं ध्मापितः सम्यक्रसखोटः प्रजायते
mūṣāmadhye rasaṃ muktvā cāndhayed anyamūṣayā
yāmārdhaṃ dhmāpitaḥ samyakrasakhoṭaḥ prajāyate
- 21
स्वांगशीतं परिज्ञाय रसखोटं समुद्धरेत्
वर्षमात्रं धृतो वक्त्रे वलीपलितनाशनः
svāṃgaśītaṃ parijñāya rasakhoṭaṃ samuddharet
varṣamātraṃ dhṛto vaktre valīpalitanāśanaḥ
- 22
सर्वसिद्धिकरोऽप्येष मूलिकाबद्धपारदः
मूलिकाबंधनं सत्यं कृतं नागार्जुनादिभिः
sarvasiddhikaro'pyeṣa mūlikābaddhapāradaḥ
mūlikābaṃdhanaṃ satyaṃ kṛtaṃ nāgārjunādibhiḥ
- 23
सर्वसिद्धिकरं श्रेष्ठं सर्वकार्यकरं सदा
sarvasiddhikaraṃ śreṣṭhaṃ sarvakāryakaraṃ sadā
- 24
शुद्धं रसवरं सम्यक्तथैवाम्बरभक्षितम्
जलकूम्भीरसैः पश्चान्मर्दयेद्दिनसप्तकम्
śuddhaṃ rasavaraṃ samyaktathaivāmbarabhakṣitam
jalakūmbhīrasaiḥ paścānmardayeddinasaptakam
- 25
तस्याः प्रकल्पयेन्मूषां सूतकं तत्र निक्षिपेत्
अन्यस्यामन्धमूषायां सूतमूषां निरुन्धयेत्
tasyāḥ prakalpayenmūṣāṃ sūtakaṃ tatra nikṣipet
anyasyāmandhamūṣāyāṃ sūtamūṣāṃ nirundhayet
- 26
पुटं तत्र प्रदातव्यं एकेनारण्यकेन च
पुटान्येवं प्रदेयानि एकैकोत्पलवृद्धितः
puṭaṃ tatra pradātavyaṃ ekenāraṇyakena ca
puṭānyevaṃ pradeyāni ekaikotpalavṛddhitaḥ
- 27
अनेनैव प्रकारेण पुटानि त्रीणि दापयेत्
बन्धमाप्नोति सूतेन्द्रः सत्यं गुरुवचो यथा
anenaiva prakāreṇa puṭāni trīṇi dāpayet
bandhamāpnoti sūtendraḥ satyaṃ guruvaco yathā
- 28
चूर्णीकृतानि सततं धूर्तबीजानि यत्नतः
सूतराजसमान्येवम् ऊर्ध्वयन्त्रेण पातयेत्
cūrṇīkṛtāni satataṃ dhūrtabījāni yatnataḥ
sūtarājasamānyevam ūrdhvayantreṇa pātayet
- 29
एकविंशतिवाराणि ततः खल्वे निधापयेत्
इङ्गुदीपत्रनिर्यासे मर्दयेद्दिनसप्तकम्
ekaviṃśativārāṇi tataḥ khalve nidhāpayet
iṅgudīpatraniryāse mardayeddinasaptakam
- 30
भृंगराजरसेनैव विषखर्परकेन च
पाठारसेन संमर्द्य लज्जालुस्वरसेन वै
bhṛṃgarājarasenaiva viṣakharparakena ca
pāṭhārasena saṃmardya lajjālusvarasena vai

