21 shlokas
- 1
श्रीवासमस्तकीनागकेसरं च लवंगकम्
कंकोलं तुलसीबीजं खुरासान्यहीफेनकम्
śrīvāsamastakīnāgakesaraṃ ca lavaṃgakam
kaṃkolaṃ tulasībījaṃ khurāsānyahīphenakam
- 2
जावित्रिकाब्धिशोषं च करभागुरुकुंकुमम्
कङ्कोलकतुगाक्षीरीजातीफलसमांशकान्
jāvitrikābdhiśoṣaṃ ca karabhāgurukuṃkumam
kaṅkolakatugākṣīrījātīphalasamāṃśakān
- 3
सर्वाण्येवं विचूर्ण्याथ नालिकेरोदरे क्षिपेत्
दुग्धमध्ये विपाच्यैनं दिनान्येवं हि पञ्च च
sarvāṇyevaṃ vicūrṇyātha nālikerodare kṣipet
dugdhamadhye vipācyainaṃ dinānyevaṃ hi pañca ca
- 4
नालिकेरफलाद्ग्राह्यं मर्दयेन्मधुना सह
गुटिका कोलमात्रा हि भक्षणीया निशामुखे
nālikeraphalādgrāhyaṃ mardayenmadhunā saha
guṭikā kolamātrā hi bhakṣaṇīyā niśāmukhe
- 5
वीर्यस्तंभं करोत्युग्रं चतुर्यामावधिं तथा
vīryastaṃbhaṃ karotyugraṃ caturyāmāvadhiṃ tathā
- 6
लवंगं शुद्धकर्पूरं जातीपत्रं फलं तथा
कुङ्कुमं स्वर्णबीजं च धूर्तपर्णं प्रसूनकम्
lavaṃgaṃ śuddhakarpūraṃ jātīpatraṃ phalaṃ tathā
kuṅkumaṃ svarṇabījaṃ ca dhūrtaparṇaṃ prasūnakam
- 7
मूलं त्वक्चाब्धिशोषस्य सर्वाण्येकत्र मर्दयेत्
गोदुग्धे शोधनीयं च भागमेकं प्रकल्पयेत्
mūlaṃ tvakcābdhiśoṣasya sarvāṇyekatra mardayet
godugdhe śodhanīyaṃ ca bhāgamekaṃ prakalpayet
- 8
भृङ्गीपत्त्रभवं चूर्णं भागैकं स्वर्णगैरिकम्
भावनां पोस्ततोयेन एकविंशतिसंख्यया
bhṛṅgīpattrabhavaṃ cūrṇaṃ bhāgaikaṃ svarṇagairikam
bhāvanāṃ postatoyena ekaviṃśatisaṃkhyayā
- 9
कारयेन्मतिमान्वैद्यः शुक्रस्तंभकरीं वटीम्
kārayenmatimānvaidyaḥ śukrastaṃbhakarīṃ vaṭīm
- 10
जातीफलार्ककरहाटलवङ्गशुण्ठीकङ्कोलकेशरकणाहरिचन्दनानि
एतैः समानमहिफेनमनेन चाभ्रं श्वेतं निधाय मधुना वटकान्विदध्यात्
jātīphalārkakarahāṭalavaṅgaśuṇṭhīkaṅkolakeśarakaṇāharicandanāni
etaiḥ samānamahiphenamanena cābhraṃ śvetaṃ nidhāya madhunā vaṭakānvidadhyāt
- 11
माषद्वयोन्मितममुं निशि भक्षयित्वा मृष्टं पयस्तदनु माहिषमाशु पीत्वा
कुर्वन्तु कामुकजनाः प्रतिरुद्धपाताश्चेतांसि तानि चकितानि कलावतीनाम्
māṣadvayonmitamamuṃ niśi bhakṣayitvā mṛṣṭaṃ payastadanu māhiṣamāśu pītvā
kurvantu kāmukajanāḥ pratiruddhapātāścetāṃsi tāni cakitāni kalāvatīnām
- 12
स्कन्धदेशाच्च संजातं वीर्यं दर्दुरसंभवम्
घनसारेण संयुक्तं करहाटस्य चूर्णकम्
skandhadeśācca saṃjātaṃ vīryaṃ dardurasaṃbhavam
ghanasāreṇa saṃyuktaṃ karahāṭasya cūrṇakam
- 13
संमर्द्य कारयेच्चूर्णं वटीं मुद्गप्रमाणकाम्
संघर्ष्य मुखतोयेन लिंगलेपं प्रकारयेत्
saṃmardya kārayeccūrṇaṃ vaṭīṃ mudgapramāṇakām
saṃgharṣya mukhatoyena liṃgalepaṃ prakārayet
- 14
यामार्धं धारयेद्बिन्दुं सत्यं गुरुवचो यथा
yāmārdhaṃ dhārayedbinduṃ satyaṃ guruvaco yathā
- 15
पोस्तकं पलमेकं वै शुंठीकर्षः सिता पलैका च
कर्षमिता त्वक्पयसा पीतं रेतो ध्रुवं धत्ते
postakaṃ palamekaṃ vai śuṃṭhīkarṣaḥ sitā palaikā ca
karṣamitā tvakpayasā pītaṃ reto dhruvaṃ dhatte
- 16
श्रीगङ्गाधरभक्तिसक्तमनसो विद्याविनोदाम्बुधेः
श्रीगोडान्वयपद्मनाभसुधियस्तस्यात्मजेनाप्ययम्
śrīgaṅgādharabhaktisaktamanaso vidyāvinodāmbudheḥ
śrīgoḍānvayapadmanābhasudhiyastasyātmajenāpyayam
- 17
सद्वैद्येन यशोधरेण कविना विद्वज्जनानन्दकृद्
ग्रन्थोऽयं ग्रथितः करोतु सततं सौख्यं सतां मानसे
sadvaidyena yaśodhareṇa kavinā vidvajjanānandakṛd
grantho'yaṃ grathitaḥ karotu satataṃ saukhyaṃ satāṃ mānase
- 18
देशानां सुरराष्ट्रम् उत्तमतमं तत्रापि जीर्णाभिधः
प्राकारोऽस्ति स वेदशास्त्रनिरतैर्विप्रैश्च संशोभितः
deśānāṃ surarāṣṭram uttamatamaṃ tatrāpi jīrṇābhidhaḥ
prākāro'sti sa vedaśāstraniratairvipraiśca saṃśobhitaḥ
- 19
तस्मिन्शंभुपदारविन्दरतिकृच्छ्रीपद्मनाभः स्वयम्
तत्पुत्रेण यशोधरेण कविना ग्रंथः स्वयं निर्मितः
tasminśaṃbhupadāravindaratikṛcchrīpadmanābhaḥ svayam
tatputreṇa yaśodhareṇa kavinā graṃthaḥ svayaṃ nirmitaḥ
- 20
संबोधाय सतां सुखाय सरुजां शिष्यार्थसंसिद्धये
वैद्यानामुपजीवनाय विदुषाम् उद्वेगनाशाय वै
saṃbodhāya satāṃ sukhāya sarujāṃ śiṣyārthasaṃsiddhaye
vaidyānāmupajīvanāya viduṣām udveganāśāya vai
- 21
श्रीमद्दुर्गपुरातने ऽतिनिपुणः श्रीपद्मनाभात्मजः
श्रीमद्भट्टयशोधरः कविवरो ग्रन्थः स्वयं निर्ममे
śrīmaddurgapurātane 'tinipuṇaḥ śrīpadmanābhātmajaḥ
śrīmadbhaṭṭayaśodharaḥ kavivaro granthaḥ svayaṃ nirmame

