21 shlokas
- 1
आत्मगुप्ताफलं शुष्कं निस्तुषं चाष्टपालिकम्
माषस्याष्टपलं तद्वज्जलेन परिपेषितम्
ātmaguptāphalaṃ śuṣkaṃ nistuṣaṃ cāṣṭapālikam
māṣasyāṣṭapalaṃ tadvajjalena paripeṣitam
- 2
आर्द्रं कृत्वोभयं सम्यक्शिलापट्टेन पेषयेत्
कुंकुमं केसरं चैव जातीपत्रं शतावरी
ārdraṃ kṛtvobhayaṃ samyakśilāpaṭṭena peṣayet
kuṃkumaṃ kesaraṃ caiva jātīpatraṃ śatāvarī
- 3
गोक्षुरेक्षुरबीजानि लवंगं मरिचं कणा
शृङ्गाटकं कर्षमितं कुर्यादेवं पृथक्पृथक्
gokṣurekṣurabījāni lavaṃgaṃ maricaṃ kaṇā
śṛṅgāṭakaṃ karṣamitaṃ kuryādevaṃ pṛthakpṛthak
- 4
सूक्ष्मचूर्णं विधायाथ पूर्वपिष्टे निधापयेत्
वटकान्कारयेत्पश्चात्कर्षमात्रान्विपाचयेत्
sūkṣmacūrṇaṃ vidhāyātha pūrvapiṣṭe nidhāpayet
vaṭakānkārayetpaścātkarṣamātrānvipācayet
- 5
घृतप्रस्थत्रयेणैव सुतलथ्य निमज्जयेत्
माक्षिके घृतमाने वै मुखं रुन्ध्याद्दिनत्रयम्
ghṛtaprasthatrayeṇaiva sutalathya nimajjayet
mākṣike ghṛtamāne vai mukhaṃ rundhyāddinatrayam
- 6
मध्वाज्यमिश्रितं भुञ्ज्यादेकैकं वटकं प्रगे
सप्तकानि च पञ्चैवमाहारं मधुरं भजेत्
madhvājyamiśritaṃ bhuñjyādekaikaṃ vaṭakaṃ prage
saptakāni ca pañcaivamāhāraṃ madhuraṃ bhajet
- 7
दुग्धौदनं तथा रात्रौ क्षारमम्लं च वर्जयेत्
रेतःक्षयी तथा क्लीबो गच्छेच्च प्रमदाशतम्
dugdhaudanaṃ tathā rātrau kṣāramamlaṃ ca varjayet
retaḥkṣayī tathā klībo gacchecca pramadāśatam
- 8
अपुत्रः पुत्रमाप्नोति षण्ढोऽपि पुरुषायते
दृष्टप्रत्यययोगोऽयं सत्यमेतदुदीरितम्
aputraḥ putramāpnoti ṣaṇḍho'pi puruṣāyate
dṛṣṭapratyayayogo'yaṃ satyametadudīritam
- 9
शतावरीं क्षीरविदारिकां च प्रस्थार्धमानां पृथगेव कुर्यात्
रसं तथा शाल्मलिमध्यमूलात्प्रस्थं सितार्धाढकमत्र देयम्
śatāvarīṃ kṣīravidārikāṃ ca prasthārdhamānāṃ pṛthageva kuryāt
rasaṃ tathā śālmalimadhyamūlātprasthaṃ sitārdhāḍhakamatra deyam
- 10
सुपाचितं वै मृदुवह्निना तथा दर्वीप्रलेपोऽपि हि जायते यथा
त्वक्पत्रकैलाः सह केसरेण पलप्रमाणा हि ततो विदध्यात्
supācitaṃ vai mṛduvahninā tathā darvīpralepo'pi hi jāyate yathā
tvakpatrakailāḥ saha kesareṇa palapramāṇā hi tato vidadhyāt
- 11
लेहे सुशीते मधु बिल्वमात्रं प्रातः प्रभक्षेदिह कर्षमात्रम्
lehe suśīte madhu bilvamātraṃ prātaḥ prabhakṣediha karṣamātram
- 12
शृङ्गाटकस्यापि पलं विधेयं वाराहिकन्दश्च पलप्रमाणः
चूर्णीकृतं गालितमेव वस्त्राद्भृष्टं तथाज्येन सितासमेतम्
śṛṅgāṭakasyāpi palaṃ vidheyaṃ vārāhikandaśca palapramāṇaḥ
cūrṇīkṛtaṃ gālitameva vastrādbhṛṣṭaṃ tathājyena sitāsametam
- 13
लवंगकृष्णागरुकेशराणां पलं प्रदद्याद्दशभागदुग्धम्
लेहं सुजातं खलु भक्षयेत्तत्कर्षप्रमाणं नितरां प्रभाते
कामस्य बोधं कुरुते हि शीघ्रं नारीं रमेद्वै चटकायतेऽसौ
lavaṃgakṛṣṇāgarukeśarāṇāṃ palaṃ pradadyāddaśabhāgadugdham
lehaṃ sujātaṃ khalu bhakṣayettatkarṣapramāṇaṃ nitarāṃ prabhāte
kāmasya bodhaṃ kurute hi śīghraṃ nārīṃ ramedvai caṭakāyate'sau
- 14
शतावरीगोक्षुरदर्भमूलं शृङ्गाटकं नागबलात्मगुप्ते
संचूर्ण्य सर्वं पृथगेव पालिकं क्षीरेण पाच्यं दशभागकेन
śatāvarīgokṣuradarbhamūlaṃ śṛṅgāṭakaṃ nāgabalātmagupte
saṃcūrṇya sarvaṃ pṛthageva pālikaṃ kṣīreṇa pācyaṃ daśabhāgakena
- 15
सिता प्रदेया दशपालिकात्र पाकं विदध्यादपि चाग्नियोगात्
मधुप्लुतं भक्षितमर्धयामात्कामप्रदीप्तिं कुरुते सदैव
sitā pradeyā daśapālikātra pākaṃ vidadhyādapi cāgniyogāt
madhuplutaṃ bhakṣitamardhayāmātkāmapradīptiṃ kurute sadaiva
- 16
वीर्यस्य वृद्धिं जठराग्निवृद्धिं कामाग्निवृद्धिं सहसा करोति
vīryasya vṛddhiṃ jaṭharāgnivṛddhiṃ kāmāgnivṛddhiṃ sahasā karoti
- 17
माषाणामात्मगुप्ताया बीजानामाढकं नवम्
जीवकर्षभकौ जीवां मेदां वृद्धिं शतावरीम्
māṣāṇāmātmaguptāyā bījānāmāḍhakaṃ navam
jīvakarṣabhakau jīvāṃ medāṃ vṛddhiṃ śatāvarīm
- 18
मधुकं चाश्वगन्धां च साधयेत्प्रसृतोन्मिताम्
रसे तस्मिन्घृतप्रस्थं गव्यं दशगुणं पयः
madhukaṃ cāśvagandhāṃ ca sādhayetprasṛtonmitām
rase tasminghṛtaprasthaṃ gavyaṃ daśaguṇaṃ payaḥ
- 19
विदारीस्वरसप्रस्थं प्रस्थमिक्षुरसस्य च
दत्त्वा मृद्वग्निना साध्यं सिद्धसर्पिर्निधापयेत्
vidārīsvarasaprasthaṃ prasthamikṣurasasya ca
dattvā mṛdvagninā sādhyaṃ siddhasarpirnidhāpayet
- 20
शर्करायास्तुगाक्षीर्याः क्षौद्रस्य च पृथक्पृथक्
भागांश्चतुष्पलांस्तत्र पिप्पल्याश्चावपेत्पलम्
śarkarāyāstugākṣīryāḥ kṣaudrasya ca pṛthakpṛthak
bhāgāṃścatuṣpalāṃstatra pippalyāścāvapetpalam
- 21
पलं पूर्वमितो लीढ्वा ततोऽन्नम् उपयोजयेत्
यदीच्छेदक्षयं शुक्रं शेफसश्चोत्तमं बलम्
palaṃ pūrvamito līḍhvā tato'nnam upayojayet
yadīcchedakṣayaṃ śukraṃ śephasaścottamaṃ balam

