23 shlokas
- 1
अथाध्वर्युर्होतुर् उत्काशम् एति
athādhvaryurhotur utkāśam eti
- 2
होताध्वर्युं पृच्छत्य् अध्वर्यो ऽवेर् अपा३ इति
hotādhvaryuṃ pṛcchaty adhvaryo 'ver apā3 iti
- 3
उतेम् अनंनमुर् उतेमाः पश्येतीतरः प्रत्याह
utem anaṃnamur utemāḥ paśyetītaraḥ pratyāha
- 4
अथ यद्य् अग्निष्टोमो जुहोति यम् अग्ने पृत्सु मर्त्यम् आवो वाजेषु यं जुनाः
स यन्ता शश्वतीर् इषः स्वाहेति
atha yady agniṣṭomo juhoti yam agne pṛtsu martyam āvo vājeṣu yaṃ junāḥ
sa yantā śaśvatīr iṣaḥ svāheti
- 5
अथ यद्य् उक्थ्य एतेनैव यजुषा मध्यमे परिधौ निमार्ष्टि
atha yady ukthya etenaiva yajuṣā madhyame paridhau nimārṣṭi
- 6
अथ यद्य् अतिरात्र एतद् एव यजुर्वदन्प्रपद्यते
atha yady atirātra etad eva yajurvadanprapadyate
- 7
यज्ञक्रतूनां व्यावृत्त्या इति ब्राह्मणम्
yajñakratūnāṃ vyāvṛttyā iti brāhmaṇam
- 8
अथैता होतृचमसीया दक्षिणस्य हविर्धानस्यान्तरेणेषे उपातिहृत्य नीड उत्सादयति
athaitā hotṛcamasīyā dakṣiṇasya havirdhānasyāntareṇeṣe upātihṛtya nīḍa utsādayati
- 9
अथोदुब्ज्याधवनीयं सर्वश एव मैत्रावरुणचमसीयाः पर्यस्यति
athodubjyādhavanīyaṃ sarvaśa eva maitrāvaruṇacamasīyāḥ paryasyati
- 10
तृतीयं वसतीवरीणाम् अवनयति
tṛtīyaṃ vasatīvarīṇām avanayati
- 11
तृतीयम् एकधनानाम्
tṛtīyam ekadhanānām
- 12
पुरो ऽक्षं वसतीवरीः सादयति
puro 'kṣaṃ vasatīvarīḥ sādayati
- 13
पश्चाद् अक्षम् एकधनान्
paścād akṣam ekadhanān
- 14
अथान्तरेण हविर्धाने उपविश्यौदुम्बरं पात्रं चतुःस्रक्ति याचति
athāntareṇa havirdhāne upaviśyaudumbaraṃ pātraṃ catuḥsrakti yācati
- 15
तस्मिन्बर्हिषी अन्तर्धाय प्राजापत्यं दधिग्रहं गृह्णात्य् उपयामगृहीतो ऽसि प्रजापतये त्वा ज्योतिष्मते ज्योतिष्मन्तं गृह्णामि दक्षाय दक्षवृधे रातं देवेभ्यो ऽग्निजिह्वेभ्यस्त्वर्तायुभ्य इन्द्रज्येष्ठेभ्यो वरुणराजभ्यो वातापिभ्यः पर्जन्यात्मभ्य इति
tasminbarhiṣī antardhāya prājāpatyaṃ dadhigrahaṃ gṛhṇāty upayāmagṛhīto 'si prajāpataye tvā jyotiṣmate jyotiṣmantaṃ gṛhṇāmi dakṣāya dakṣavṛdhe rātaṃ devebhyo 'gnijihvebhyastvartāyubhya indrajyeṣṭhebhyo varuṇarājabhyo vātāpibhyaḥ parjanyātmabhya iti
- 16
अपोद्धृत्य बर्हिषी अथैनम् आदायोपोत्तिष्ठति दिवे त्वान्तरिक्षाय त्वा पृथिव्यै त्वेति
apoddhṛtya barhiṣī athainam ādāyopottiṣṭhati dive tvāntarikṣāya tvā pṛthivyai tveti
- 17
पूर्वया द्वारोपनिष्क्रामत्य् अपेन्द्र द्विषतो मनो ऽप जिज्यासतो जह्य् अप यो नो ऽरातीयति तं जहीति
pūrvayā dvāropaniṣkrāmaty apendra dviṣato mano 'pa jijyāsato jahy apa yo no 'rātīyati taṃ jahīti
- 18
एत्याहवनीये जुहोत्य् अन्वारब्धे यजमाने प्राणाय त्वापानाय त्वा व्यानाय त्वा सते त्वासते त्वाद्भ्यस्त्वौषधीभ्यो विश्वेभ्यस्त्वा भूतेभ्यो यतः प्रजा अखिद्रा अजायन्त तस्मै त्वा प्रजापतये विभूदाव्ने ज्योतिष्मते ज्योतिष्मन्तं जुहोमि स्वाहेति
etyāhavanīye juhoty anvārabdhe yajamāne prāṇāya tvāpānāya tvā vyānāya tvā sate tvāsate tvādbhyastvauṣadhībhyo viśvebhyastvā bhūtebhyo yataḥ prajā akhidrā ajāyanta tasmai tvā prajāpataye vibhūdāvne jyotiṣmate jyotiṣmantaṃ juhomi svāheti
- 19
अथास्य संक्षालनम् अन्तःपरिधि निनयति
athāsya saṃkṣālanam antaḥparidhi ninayati
- 20
धेनुवरं वानडुद्वरं वा दद्याद् इति ह स्माह बौधायनः
dhenuvaraṃ vānaḍudvaraṃ vā dadyād iti ha smāha baudhāyanaḥ
- 21
द्वादश पष्ठौहीर् इत्य् आञ्जीगविः
dvādaśa paṣṭhauhīr ity āñjīgaviḥ
- 22
ऋषभम् इति कात्यः
ṛṣabham iti kātyaḥ
- 23
मणिकुण्डलम् इति राथीतरः
maṇikuṇḍalam iti rāthītaraḥ

