16 shlokas
- 1
अथ यत्र होतुर् अभिजानात्य् अभूद् उषा रुशत्पशुर् आग्निर् अधाय्य् ऋत्वियः
अयोजि वां वृषण्वसू रथो दस्राव् अमर्त्यो माध्वी मम श्रुतं हवम् इति तत्प्रचरण्यां स्रुचि चतुर्गृहीतं गृहीत्वाहवनीये जुहोत्य् अन्वारब्धे यजमाने शृणोत्व् अग्निः समिधा हवं मे शृण्वन्त्व् आपो धिषणाश्च देवीः
शृणोत ग्रावाणो विदुषो नु यज्ञं शृणोतु देवः सविता हवं मे स्वाहेति
atha yatra hotur abhijānāty abhūd uṣā ruśatpaśur āgnir adhāyy ṛtviyaḥ
ayoji vāṃ vṛṣaṇvasū ratho dasrāv amartyo mādhvī mama śrutaṃ havam iti tatpracaraṇyāṃ sruci caturgṛhītaṃ gṛhītvāhavanīye juhoty anvārabdhe yajamāne śṛṇotv agniḥ samidhā havaṃ me śṛṇvantv āpo dhiṣaṇāśca devīḥ
śṛṇota grāvāṇo viduṣo nu yajñaṃ śṛṇotu devaḥ savitā havaṃ me svāheti
- 2
अपरं चतुर्गृहीतं गृहीत्वा बर्हिर् आदाय संप्रैषम् आहाप इष्य होतर्मैत्रावरुणस्य चमसाध्वर्यव् आद्रवैकधनिन एत नेष्टः पत्नीम् उदानयाग्नीद्धोतृचमसेन च मा वसतीवरीभिश्च चात्वाले प्रत्युपलम्बस्वेति
aparaṃ caturgṛhītaṃ gṛhītvā barhir ādāya saṃpraiṣam āhāpa iṣya hotarmaitrāvaruṇasya camasādhvaryav ādravaikadhanina eta neṣṭaḥ patnīm udānayāgnīddhotṛcamasena ca mā vasatīvarībhiśca cātvāle pratyupalambasveti
- 3
यथासंप्रैषं ते कुर्वन्ति
yathāsaṃpraiṣaṃ te kurvanti
- 4
आनयति नेष्टा पत्नीं पान्नेजनं कलशम् आदाय प्रेह्य् उदेहीत्य् एतेन निगदेन
ānayati neṣṭā patnīṃ pānnejanaṃ kalaśam ādāya prehy udehīty etena nigadena
- 5
अथैनां पूर्वया द्वारोपनिष्क्रमय्योत्तरेण सदः परीत्योत्तरेणाग्नीध्रीयं धिष्णियं पर्याणीयान्तरेण चात्वालोत्कराव् उदङ्ङ् उपनिष्क्रम्य यत्रापस्तद्यन्ति
athaināṃ pūrvayā dvāropaniṣkramayyottareṇa sadaḥ parītyottareṇāgnīdhrīyaṃ dhiṣṇiyaṃ paryāṇīyāntareṇa cātvālotkarāv udaṅṅ upaniṣkramya yatrāpastadyanti
- 6
अथाप्सु बर्हिः प्रास्याभिजुहोति देवीर् आपो अपां नपाद्य ऊर्मिर्हविष्य इन्द्रियावान्मदिन्तमस्तं देवेभ्यो देवत्रा धत्त शुक्रं शुक्रपेभ्यो येषां भाग स्थ स्वाहेति
athāpsu barhiḥ prāsyābhijuhoti devīr āpo apāṃ napādya ūrmirhaviṣya indriyāvānmadintamastaṃ devebhyo devatrā dhatta śukraṃ śukrapebhyo yeṣāṃ bhāga stha svāheti
- 7
मैत्रावरुणचमसेनाहुतिम् अपप्लावयति कार्षिर् अस्य् अपापां मृध्रम् इति
maitrāvaruṇacamasenāhutim apaplāvayati kārṣir asy apāpāṃ mṛdhram iti
- 8
बर्हिषी अन्तर्धायोन्नयति समुद्रस्य वो ऽक्षित्या उन्नय इति
barhiṣī antardhāyonnayati samudrasya vo 'kṣityā unnaya iti
- 9
अथैकधनान्गृह्णातीन्द्राय वो जुष्टान्गृह्णामीति वा तूष्णीं वा
athaikadhanāngṛhṇātīndrāya vo juṣṭāngṛhṇāmīti vā tūṣṇīṃ vā
- 10
अथ पन्नेजनीर्गृह्णाति वसुभ्यो रुद्रेभ्य आदित्येभ्यो विश्वेभ्यो देवेभ्यः पन्नेजनीर्गृह्णामि यज्ञाय वः पन्नेजनीर्गृह्णामीति
atha pannejanīrgṛhṇāti vasubhyo rudrebhya ādityebhyo viśvebhyo devebhyaḥ pannejanīrgṛhṇāmi yajñāya vaḥ pannejanīrgṛhṇāmīti
- 11
ताः पत्न्यै सम्प्रदायोदायन्ति
tāḥ patnyai sampradāyodāyanti
- 12
अन्वारब्धे यजमान एतेनैव यथेतम् एत्य चात्वाले होतृचमसं च मैत्रावरुणचमसं च संस्पर्श्य वसतीवरीर्व्यानयति
anvārabdhe yajamāna etenaiva yathetam etya cātvāle hotṛcamasaṃ ca maitrāvaruṇacamasaṃ ca saṃsparśya vasatīvarīrvyānayati
- 13
पूरयति होतृचमसम्
pūrayati hotṛcamasam
- 14
अप्तुं मैत्रावरुणचमसे प्रस्कन्दयति
aptuṃ maitrāvaruṇacamase praskandayati
- 15
अथ होतृचमसं वसतीवरीर्मैत्रावरुणचमसम् इति त्रयं संनिधाय प्रतिस्तोमं प्रचरण्या समनक्ति सं ज्योतिषा ज्योतिर् अङ्क्तां सं शुक्राः शुक्रेण सं हविषा हविः सं यज्ञपतिर् आशिषेति
atha hotṛcamasaṃ vasatīvarīrmaitrāvaruṇacamasam iti trayaṃ saṃnidhāya pratistomaṃ pracaraṇyā samanakti saṃ jyotiṣā jyotir aṅktāṃ saṃ śukrāḥ śukreṇa saṃ haviṣā haviḥ saṃ yajñapatir āśiṣeti
- 16
अथैषा पत्न्य् एतेनैव यथेतम् एत्य जघनेन गार्हपत्यम् औपसदायां वेद्यां संस्पृष्टाः सादयति तूष्णीम्
athaiṣā patny etenaiva yathetam etya jaghanena gārhapatyam aupasadāyāṃ vedyāṃ saṃspṛṣṭāḥ sādayati tūṣṇīm

