27 shlokas
- 1
स यद्य् उ हैतैः संस्रावैर् उपर्यर्धा स्थाली भवत्य् एतेनैनां पात्रेणापिदधाति
sa yady u haitaiḥ saṃsrāvair uparyardhā sthālī bhavaty etenaināṃ pātreṇāpidadhāti
- 2
यद्य् उ वै नोपर्यर्धा भवति द्रोणकलशाद् एनाम् उपर्यर्धां कृत्वैतेनैव पात्रेणापिदधाति विष्णव् उरुक्रमैष ते सोमस्तं रक्षस्व तं ते दुश्चक्षा मावख्यद् इति
yady u vai noparyardhā bhavati droṇakalaśād enām uparyardhāṃ kṛtvaitenaiva pātreṇāpidadhāti viṣṇav urukramaiṣa te somastaṃ rakṣasva taṃ te duścakṣā māvakhyad iti
- 3
अथाध्वर्युः प्रदक्षिणम् आवृत्य प्रत्यङ्ङ् आद्रुत्य होत्रे पात्रं प्रदाय प्राङ् आयन्न् आहोन्नीयमानेभ्यो ऽनुब्रूहि होतुश्चमसम् अनून्नयध्वम् उभयतःशुक्रान्कुरुध्वम् अच्छावाकस्य चमसाध्वर्यो मा तु त्वम् उन्नेष्ठाः प्रतिप्रस्थातश्चतुर्भिर्मा शकलैः प्रोक्षिताप्रोक्षितैः प्रत्युपलम्बस्वेति
athādhvaryuḥ pradakṣiṇam āvṛtya pratyaṅṅ ādrutya hotre pātraṃ pradāya prāṅ āyann āhonnīyamānebhyo 'nubrūhi hotuścamasam anūnnayadhvam ubhayataḥśukrānkurudhvam acchāvākasya camasādhvaryo mā tu tvam unneṣṭhāḥ pratiprasthātaścaturbhirmā śakalaiḥ prokṣitāprokṣitaiḥ pratyupalambasveti
- 4
यथासंप्रैषं ते कुर्वन्ति
yathāsaṃpraiṣaṃ te kurvanti
- 5
द्रोणकलशाद् एव प्रथमम् उन्नयन्ति
droṇakalaśād eva prathamam unnayanti
- 6
अथ पूतभृतः
atha pūtabhṛtaḥ
- 7
अथ द्रोणकलशात्
atha droṇakalaśāt
- 8
त उभयतःशुक्राः
ta ubhayataḥśukrāḥ
- 9
होतृचमसम् एव प्रथमम् उन्नयन्ति
hotṛcamasam eva prathamam unnayanti
- 10
यथोपपादम् इतरान्
yathopapādam itarān
- 11
समुन्नीयोत्तरवेद्यां संसादयन्ति
samunnīyottaravedyāṃ saṃsādayanti
- 12
अथ प्रतिप्रस्थाता चतुर्णां शकलानां द्वौ प्रोक्षति
atha pratiprasthātā caturṇāṃ śakalānāṃ dvau prokṣati
- 13
द्वाव् अप्रोक्षितौ भवतः
dvāv aprokṣitau bhavataḥ
- 14
प्रोक्षिताभ्याम् अपिधायाप्रोक्षिताभ्याम् उपयच्छतः
prokṣitābhyām apidhāyāprokṣitābhyām upayacchataḥ
- 15
शुक्रम् एवाध्वर्युर् आदत्ते
śukram evādhvaryur ādatte
- 16
मन्थिनं प्रतिप्रस्थाता
manthinaṃ pratiprasthātā
- 17
ग्रहाव् आदायोपनिष्क्रामतः
grahāv ādāyopaniṣkrāmataḥ
- 18
दक्षिणम् एवाध्वर्युर्द्वार्बाहुं निश्रयमाण उपनिष्क्रामति
dakṣiṇam evādhvaryurdvārbāhuṃ niśrayamāṇa upaniṣkrāmati
- 19
उत्तरं प्रतिप्रस्थाता
uttaraṃ pratiprasthātā
- 20
तौ जघनेनोत्तरवेदिं ग्रहौ संधत्त आयुः संधत्तं तन्मे जिन्वतं प्राणं संधत्तं तं मे जिन्वतम् अपानं संधत्तं तं मे जिन्वतं व्यानं संधत्तं तं मे जिन्वतं चक्षुः संधत्तं तन्मे जिन्वतं श्रोत्रं संधत्तं तन्मे जिन्वतम् इति
tau jaghanenottaravediṃ grahau saṃdhatta āyuḥ saṃdhattaṃ tanme jinvataṃ prāṇaṃ saṃdhattaṃ taṃ me jinvatam apānaṃ saṃdhattaṃ taṃ me jinvataṃ vyānaṃ saṃdhattaṃ taṃ me jinvataṃ cakṣuḥ saṃdhattaṃ tanme jinvataṃ śrotraṃ saṃdhattaṃ tanme jinvatam iti
- 21
षड्भिः संधाभिः संधाय व्युत्क्रामतः
ṣaḍbhiḥ saṃdhābhiḥ saṃdhāya vyutkrāmataḥ
- 22
स्तुतो ऽसि जनधा देवास्त्वा शुक्रपाः प्रणयन्तु सुवीराः प्रजाः प्रजनयन्परीहि शुक्रः शुक्रशोचिषेत्य् अध्वर्युर्दक्षिणेनोत्तरवेदिं परिक्रामति
stuto 'si janadhā devāstvā śukrapāḥ praṇayantu suvīrāḥ prajāḥ prajanayanparīhi śukraḥ śukraśociṣety adhvaryurdakṣiṇenottaravediṃ parikrāmati
- 23
स्तुतो ऽसि जनधा देवास्त्वा मन्थिपाः प्रणयन्तु सुप्रजाः प्रजाः प्रजनयन्परीहि मन्थी मन्थिशोचिषेति प्रतिप्रस्थातोत्तरेणोत्तरवेदिं परिक्रामति
stuto 'si janadhā devāstvā manthipāḥ praṇayantu suprajāḥ prajāḥ prajanayanparīhi manthī manthiśociṣeti pratiprasthātottareṇottaravediṃ parikrāmati
- 24
तौ पुरस्तात्प्रत्यञ्चाव् उत्तरवेदिम् अधिद्रवत इन्द्रेण सयुजो वयं सासह्याम पृतन्यतः
घ्नन्तो वृत्राण्य् अप्रति
tau purastātpratyañcāv uttaravedim adhidravata indreṇa sayujo vayaṃ sāsahyāma pṛtanyataḥ
ghnanto vṛtrāṇy aprati
- 25
यत्ते अग्ने तेजस्तेनाहं तेजस्वी भूयासं यत्ते अग्ने वर्चस्तेनाहं वर्चस्वी भूयासं यत्ते अग्ने हरस्तेनाहं हरस्वी भूयासम् इति
yatte agne tejastenāhaṃ tejasvī bhūyāsaṃ yatte agne varcastenāhaṃ varcasvī bhūyāsaṃ yatte agne harastenāhaṃ harasvī bhūyāsam iti
- 26
अथान्तरेण यूपं चाहवनीयं च ग्रहौ संधत्त आयु स्थ आयुर्मे धत्तम् आयुर्यज्ञाय धत्तम् आयुर्यज्ञपतये धत्तं प्राण स्थः प्राणं मे धत्तं प्राणं यज्ञाय धत्तं प्राणं यज्ञपतये धत्तम् अपान स्थो ऽपानं मे धत्तम् अपानं यज्ञाय धत्तम् अपानं यज्ञपतये धत्तं व्यान स्थो व्यानं मे धत्तं व्यानं यज्ञाय धत्तं व्यानं यज्ञपतये धत्तं चक्षु स्थश्चक्षुर्मे धत्तं चक्षुर्यज्ञाय धत्तं चक्षुर्यज्ञपतये धत्तं श्रोत्रं स्थः श्रोत्रं मे धत्तं श्रोत्रं यज्ञाय धत्तं श्रोत्रं यज्ञपतये धत्तम् इति
athāntareṇa yūpaṃ cāhavanīyaṃ ca grahau saṃdhatta āyu stha āyurme dhattam āyuryajñāya dhattam āyuryajñapataye dhattaṃ prāṇa sthaḥ prāṇaṃ me dhattaṃ prāṇaṃ yajñāya dhattaṃ prāṇaṃ yajñapataye dhattam apāna stho 'pānaṃ me dhattam apānaṃ yajñāya dhattam apānaṃ yajñapataye dhattaṃ vyāna stho vyānaṃ me dhattaṃ vyānaṃ yajñāya dhattaṃ vyānaṃ yajñapataye dhattaṃ cakṣu sthaścakṣurme dhattaṃ cakṣuryajñāya dhattaṃ cakṣuryajñapataye dhattaṃ śrotraṃ sthaḥ śrotraṃ me dhattaṃ śrotraṃ yajñāya dhattaṃ śrotraṃ yajñapataye dhattam iti
- 27
षड्भिः संधाभिः संधाय व्युत्क्रामतः
ṣaḍbhiḥ saṃdhābhiḥ saṃdhāya vyutkrāmataḥ

