9 shlokas
- 1
घर्मं तपाम्य् अमृतस्य धारया देवेभ्यो हव्यं परिदां सवित्रे
शुक्रं देवाः शृतम् अदन्तु हव्यम् आसञ्जुह्वानम् अमृतस्य योनौ
देवानाम् अधिपा एति घर्म ऋतेन भ्राजन्न् अमृतं विचष्टे
हिरण्यवर्णो नभसो देव सूर्यो घर्मो भ्राजन्दिवो अन्तान्पर्येषि विद्युता
वैश्वानरः समुद्रं पर्येति शुक्रो घर्मो भ्राजन्तेजसा रोचमानः
नुदञ्छत्रून्प्रदहन्मे सपत्नान् आदित्यो द्याम् अध्यरुक्षद्विपश्चित्
विद्योतते द्योतत आ च द्योतते अप्स्व् अन्तर् अमृतो घर्म उद्यन्
हन्ता वृत्रस्य हरिताम् अनीकम् अनाधृष्टास्तन्वः सूर्यस्य
घर्मः पश्चाद् उत घर्मः पुरस्ताद् अयोदंष्ट्राय द्विषतो ऽपिदध्मः
वैश्वानरः शीतरूरे वसानः सपत्नान्मे द्विषतो हन्तु सर्वान्
ऋतून् ऋतुभिः श्रपयति ब्रह्मणैकवीरो घर्मः शुचानः समिधा समिद्धः
ब्रह्म त्वा तपति ब्रह्मणा तेजसा च
घर्मः साहस्रः समिधा समिद्धः
असपत्नाः प्रदिशो मे भवन्तु
सपत्नान्सर्वान्मे सूर्यो हन्तु वैश्वानरो हरिः
घर्मस्तप्तः प्रदहतु भ्रातृव्यान्द्विषतो वृषा
उद्यन्मे शुक्र आदित्यो विमृधो हन्तु सूर्यः
ब्रह्म जज्ञानम् इयं पित्र्येति शस्त्रवद् अर्धर्चश आहावप्रतिगरवर्जम्
gharmaṃ tapāmy amṛtasya dhārayā devebhyo havyaṃ paridāṃ savitre
śukraṃ devāḥ śṛtam adantu havyam āsañjuhvānam amṛtasya yonau
devānām adhipā eti gharma ṛtena bhrājann amṛtaṃ vicaṣṭe
hiraṇyavarṇo nabhaso deva sūryo gharmo bhrājandivo antānparyeṣi vidyutā
vaiśvānaraḥ samudraṃ paryeti śukro gharmo bhrājantejasā rocamānaḥ
nudañchatrūnpradahanme sapatnān ādityo dyām adhyarukṣadvipaścit
vidyotate dyotata ā ca dyotate apsv antar amṛto gharma udyan
hantā vṛtrasya haritām anīkam anādhṛṣṭāstanvaḥ sūryasya
gharmaḥ paścād uta gharmaḥ purastād ayodaṃṣṭrāya dviṣato 'pidadhmaḥ
vaiśvānaraḥ śītarūre vasānaḥ sapatnānme dviṣato hantu sarvān
ṛtūn ṛtubhiḥ śrapayati brahmaṇaikavīro gharmaḥ śucānaḥ samidhā samiddhaḥ
brahma tvā tapati brahmaṇā tejasā ca
gharmaḥ sāhasraḥ samidhā samiddhaḥ
asapatnāḥ pradiśo me bhavantu
sapatnānsarvānme sūryo hantu vaiśvānaro hariḥ
gharmastaptaḥ pradahatu bhrātṛvyāndviṣato vṛṣā
udyanme śukra ādityo vimṛdho hantu sūryaḥ
brahma jajñānam iyaṃ pitryeti śastravad ardharcaśa āhāvapratigaravarjam
- 2
रुचिर् असीति रुचितम् अनुमन्त्रयते
rucir asīti rucitam anumantrayate
- 3
घर्मधुग्दोहायोत्तिष्ठत उत्तिष्ठतावपश्यतेति
gharmadhugdohāyottiṣṭhata uttiṣṭhatāvapaśyateti
- 4
उपह्वय इति घर्मदुघाम्
upahvaya iti gharmadughām
- 5
घर्मसूक्तेन घर्मं हूयमानम्
स्वाहाकृत इति द्वाभ्यां घर्मस्य वषट्कृते ऽनुवषट्कृते
gharmasūktena gharmaṃ hūyamānam
svāhākṛta iti dvābhyāṃ gharmasya vaṣaṭkṛte 'nuvaṣaṭkṛte
- 6
भक्षो वाजिनवच्छृतं हविर्मधु हविर् अश्याम ते घर्म मधुमतः पितृमतो वाजिमतो बृहस्पतिमतो विश्वदेव्यावत इति
bhakṣo vājinavacchṛtaṃ havirmadhu havir aśyāma te gharma madhumataḥ pitṛmato vājimato bṛhaspatimato viśvadevyāvata iti
- 7
सत्रे होताध्वर्युर्ब्रह्मोद्गातानुचरा गृहपतिश्च
satre hotādhvaryurbrahmodgātānucarā gṛhapatiśca
- 8
उच्छिष्टखरे पवित्रैर्मार्जयन्ते
ucchiṣṭakhare pavitrairmārjayante
- 9
सूयवसाद् इति त्रिरुक्तायां संस्थितहोमान्
sūyavasād iti triruktāyāṃ saṃsthitahomān

