13 shlokas
- 1
उदङ्ङ् अत्याक्रम्याध्वर्युर्यथायतनं स्रुचौ सादयित्वा वाजस्य मा प्रसवेनेत्य् अनुष्टुग्भ्यां वाजवतीभ्यां व्यूहति
udaṅṅ atyākramyādhvaryuryathāyatanaṃ srucau sādayitvā vājasya mā prasavenety anuṣṭugbhyāṃ vājavatībhyāṃ vyūhati
- 2
वाजस्य मा प्रसवेनेति दक्षिणेनोत्तानेन पाणिना सप्रस्तरां जुहूम् उद्गृह्णाति
vājasya mā prasaveneti dakṣiṇenottānena pāṇinā saprastarāṃ juhūm udgṛhṇāti
- 3
अथा सपत्नाꣳ इन्द्रो म इति नीचा सव्येनोपभृतं निगृह्णाति
athā sapatnām̐ indro ma iti nīcā savyenopabhṛtaṃ nigṛhṇāti
- 4
उद्ग्राभं चेति जुहूम् उद्गृह्य निग्राभं चेत्य् उपभृतं निगृह्णाति
udgrābhaṃ ceti juhūm udgṛhya nigrābhaṃ cety upabhṛtaṃ nigṛhṇāti
- 5
ब्रह्म देवा अवीवृधन्न् इति प्राचीं जुहूम् ऊहति
brahma devā avīvṛdhann iti prācīṃ juhūm ūhati
- 6
अथा सपत्नाꣳ इन्द्राग्नी म इति प्रतीचीम् उपभृतम् ऊहति
athā sapatnām̐ indrāgnī ma iti pratīcīm upabhṛtam ūhati
- 7
एताभ्याम् एव यजमानः स्रुचाव् अनुमन्त्रयते
etābhyām eva yajamānaḥ srucāv anumantrayate
- 8
अध्वर्युर् उपभृतं प्रोक्ष्याहृत्य वसुभ्यस्त्वेति त्रिभिः प्रतिमन्त्रं जुह्वा परिधीन्यथाधानम् अनक्ति
adhvaryur upabhṛtaṃ prokṣyāhṛtya vasubhyastveti tribhiḥ pratimantraṃ juhvā paridhīnyathādhānam anakti
- 9
वसून्देवान्यज्ञेनापिप्रेमेति त्रिभिः प्रतिमन्त्रम् एतान् अभ्यज्यमानान्यजमानः
vasūndevānyajñenāpipremeti tribhiḥ pratimantram etān abhyajyamānānyajamānaḥ
- 10
अन्यत्र प्रस्तराद् अध्वर्युर्जुहूं सादयित्वा संजानाथाम् इति विधृतीभ्यां प्रस्तरम् आदाय बर्हिषि विधृती निधाय स्रुक्षु प्रस्तरम् अनक्ति
anyatra prastarād adhvaryurjuhūṃ sādayitvā saṃjānāthām iti vidhṛtībhyāṃ prastaram ādāya barhiṣi vidhṛtī nidhāya srukṣu prastaram anakti
- 11
अक्तं रिहाणा इति जुह्वाम् अग्राणि वियन्तु वय इत्य् उपभृति मध्यानि प्रजां योनिं मा निर्मृक्षम् इति ध्रुवायां मूलानि
aktaṃ rihāṇā iti juhvām agrāṇi viyantu vaya ity upabhṛti madhyāni prajāṃ yoniṃ mā nirmṛkṣam iti dhruvāyāṃ mūlāni
- 12
एवं पुनर् अनक्ति
evaṃ punar anakti
- 13
तृतीये ध्रुवायाम् आदितो मूलानि मध्यान्य् उपभृति जुह्वाम् अन्ततो ऽग्राणि
tṛtīye dhruvāyām ādito mūlāni madhyāny upabhṛti juhvām antato 'grāṇi

