5 shlokas
- 1
ऋतस्य पथा पर्येहीति ब्रह्मा परिह्रियमाणम् अभिमन्त्र्य सूर्यस्य त्वा चक्षुषेत्य् आह्रियमाणं प्रतीक्ष्य देवस्य त्वेति प्रतिगृह्य पृथिव्यास्त्वा नाभाव् इति पृथिव्याम् आसाद्य सुपर्णस्य त्वा गरुत्मत इत्य् अवेक्ष्याङ्गुष्ठेनानामिकया चोपसंगृह्यातिहाय दतो ऽग्नेस्त्वास्येन प्राश्नामीति जिह्वाग्रे निधायापश्च ब्राह्मणस्योदरेण बृहस्पतेर्ब्रह्मणेन्द्रस्य त्वा जठरे सादयामीति सहाद्भिर् असंम्लेत्याभिगिरति
ṛtasya pathā paryehīti brahmā parihriyamāṇam abhimantrya sūryasya tvā cakṣuṣety āhriyamāṇaṃ pratīkṣya devasya tveti pratigṛhya pṛthivyāstvā nābhāv iti pṛthivyām āsādya suparṇasya tvā garutmata ity avekṣyāṅguṣṭhenānāmikayā copasaṃgṛhyātihāya dato 'gnestvāsyena prāśnāmīti jihvāgre nidhāyāpaśca brāhmaṇasyodareṇa bṛhaspaterbrahmaṇendrasya tvā jaṭhare sādayāmīti sahādbhir asaṃmletyābhigirati
- 2
या अप्स्व् अन्तर्देवता इत्य् अपः प्राश्याचम्य घसीना मे मेति नाभिम् अभिमृश्य वाङ्म आसन्न् इति यथालिङ्गम् इन्द्रियाणि संमृश्यारिष्टा विश्वानीति सर्वाण्य् अङ्गानि मयि प्राणापानाव् इति वा प्राशित्रहरणं प्रक्षाल्य पूरयित्वा दिशो जिन्वेति पराञ्चं निनयति
yā apsv antardevatā ity apaḥ prāśyācamya ghasīnā me meti nābhim abhimṛśya vāṅma āsann iti yathāliṅgam indriyāṇi saṃmṛśyāriṣṭā viśvānīti sarvāṇy aṅgāni mayi prāṇāpānāv iti vā prāśitraharaṇaṃ prakṣālya pūrayitvā diśo jinveti parāñcaṃ ninayati
- 3
पुनर् अद्भिः पूरयित्वा मां जिन्वेत्य् अभ्यात्मं निनयति
punar adbhiḥ pūrayitvā māṃ jinvety abhyātmaṃ ninayati
- 4
तस्मिन्प्राशिते वाचस्पतये त्वा हुतं प्राश्नामि सदसस्पतये त्वा हुतं प्राश्नामीति होतावान्तरेडां प्राश्नाति
tasminprāśite vācaspataye tvā hutaṃ prāśnāmi sadasaspataye tvā hutaṃ prāśnāmīti hotāvāntareḍāṃ prāśnāti
- 5
जुष्टिर् असीति प्राश्यमानां यजमानो ऽनुमन्त्रयते
juṣṭir asīti prāśyamānāṃ yajamāno 'numantrayate

