25 shlokas
- 1
वृकश्वानसृगालाद्यैर्दष्टो यस्तु द्विजोत्तमः
स्नात्वा जपेत्स गायत्रीं पवित्रां वेदमातरम्
vṛkaśvānasṛgālādyairdaṣṭo yastu dvijottamaḥ
snātvā japetsa gāyatrīṃ pavitrāṃ vedamātaram
- 2
गवां शृङ्गोदकैः स्नानं महानद्योस्तु संगमे
समुद्रदर्शनाद्वापि शुना दष्टः शुचिर्भवेत्
gavāṃ śṛṅgodakaiḥ snānaṃ mahānadyostu saṃgame
samudradarśanādvāpi śunā daṣṭaḥ śucirbhavet
- 3
वेदविद्याव्रतस्नातः शुना दष्टो द्विजो यदि
स हिरण्योदकैः स्नात्वा घृतं प्राश्य विशुध्यति
vedavidyāvratasnātaḥ śunā daṣṭo dvijo yadi
sa hiraṇyodakaiḥ snātvā ghṛtaṃ prāśya viśudhyati
- 4
सव्रतस्तु शुना दष्टो यस्त्रिरात्रम् उपावसेत्
घृतं कुशोदकं पीत्वा व्रतशेषं समापयेत्
savratastu śunā daṣṭo yastrirātram upāvaset
ghṛtaṃ kuśodakaṃ pītvā vrataśeṣaṃ samāpayet
- 5
अव्रतः सव्रतो वापि शुना दष्टो भवेद्द्विजः
प्रणिपत्य भवेत्पूतो विप्रैश्चक्षुर्निरीक्षितः
avrataḥ savrato vāpi śunā daṣṭo bhaveddvijaḥ
praṇipatya bhavetpūto vipraiścakṣurnirīkṣitaḥ
- 6
शुना घ्रातावलीढस्य नखैर्विलिखितस्य च
अद्भिः प्रक्षालनं प्रोक्तम् अग्निना चोपचूलनम्
śunā ghrātāvalīḍhasya nakhairvilikhitasya ca
adbhiḥ prakṣālanaṃ proktam agninā copacūlanam
- 7
शुना तु ब्राह्मणी दष्टा जम्बुकेन वृकेण वा
उदितं ग्रहनक्षत्रं दृष्ट्वा सद्यः शुचिर्भवेत्
śunā tu brāhmaṇī daṣṭā jambukena vṛkeṇa vā
uditaṃ grahanakṣatraṃ dṛṣṭvā sadyaḥ śucirbhavet
- 8
कृष्णपक्षे यदा सोमो न दृश्येत कदाचन
यां दिशं व्रजते सोमस्तां दिशं वावलोकयेत्
kṛṣṇapakṣe yadā somo na dṛśyeta kadācana
yāṃ diśaṃ vrajate somastāṃ diśaṃ vāvalokayet
- 9
असद्ब्राह्मणके ग्रामे शुना दष्टो द्विजोत्तमः
वृषं प्रदक्षिणीकृत्य सद्यः स्नात्वा शुचिर्भवेत्
asadbrāhmaṇake grāme śunā daṣṭo dvijottamaḥ
vṛṣaṃ pradakṣiṇīkṛtya sadyaḥ snātvā śucirbhavet
- 10
चण्डालेन श्वपाकेन गोभिर्विप्रैर्हतो यदि
आहिताग्निर्मृतो विप्रो विषेणात्महतो यदि
caṇḍālena śvapākena gobhirviprairhato yadi
āhitāgnirmṛto vipro viṣeṇātmahato yadi
- 11
दहेत्तं ब्राह्मणं विप्रो लोकाग्नौ मन्त्रवर्जितम्
स्पृष्ट्वा वोढ्वा च दग्ध्वा च सपिण्डेषु च सर्वथा
dahettaṃ brāhmaṇaṃ vipro lokāgnau mantravarjitam
spṛṣṭvā voḍhvā ca dagdhvā ca sapiṇḍeṣu ca sarvathā
- 12
प्राजापत्यं चरेत्पश्चाद्विप्राणाम् अनुशासनात्
दग्धास्थीनि पुनर्गृह्य क्षीरैः प्रक्षालयेद्द्विजः
prājāpatyaṃ caretpaścādviprāṇām anuśāsanāt
dagdhāsthīni punargṛhya kṣīraiḥ prakṣālayeddvijaḥ
- 13
पुनर्दहेत्स्वाग्निना तु स्वतन्त्रेण पृथक्पृथक्
आहिताग्निर्द्विजः कश्चित्प्रवसन्कालचोदितः
punardahetsvāgninā tu svatantreṇa pṛthakpṛthak
āhitāgnirdvijaḥ kaścitpravasankālacoditaḥ
- 14
देहनाशम् अनुप्राप्तस्तस्याग्निर्वसते गृहे
प्रेताग्निहोत्रसंस्कारः श्रूयताम् ऋषिपुङ्गवाः
dehanāśam anuprāptastasyāgnirvasate gṛhe
pretāgnihotrasaṃskāraḥ śrūyatām ṛṣipuṅgavāḥ
- 15
कृष्णाजिनं समास्तीर्य कुशैस्तु पुरुषाकृतिम्
षट्शतानि शतं चैव पलाशानां च वृन्ततः
kṛṣṇājinaṃ samāstīrya kuśaistu puruṣākṛtim
ṣaṭśatāni śataṃ caiva palāśānāṃ ca vṛntataḥ
- 16
चत्वारिंशच्छिरे दद्याच्छतं कण्ठे तु विन्यसेत्
बाहुभ्यां शतकं दद्याद् अङ्गुलीषु दशैव तु
catvāriṃśacchire dadyācchataṃ kaṇṭhe tu vinyaset
bāhubhyāṃ śatakaṃ dadyād aṅgulīṣu daśaiva tu
- 17
शतं तु जघने दद्याद्द्विशतं तूदरे तथा
दद्याद् अष्टौ वृषणयोः पञ्च मेढ्रे तु विन्यसेत्
śataṃ tu jaghane dadyāddviśataṃ tūdare tathā
dadyād aṣṭau vṛṣaṇayoḥ pañca meḍhre tu vinyaset
- 18
एकविंशतिम् ऊरुभ्यां द्विशतं जानुजङ्घयोः
पादाङ्गुलीषु षड्दद्याद्यज्ञपात्रं ततो न्यसेत्
ekaviṃśatim ūrubhyāṃ dviśataṃ jānujaṅghayoḥ
pādāṅgulīṣu ṣaḍdadyādyajñapātraṃ tato nyaset
- 19
शम्यां शिश्ने विनिःक्षिप्य अरणीं मुष्कयोर् अपि
जुहूं च दक्षिणे हस्ते वामे तूपभृतं न्यसेत्
śamyāṃ śiśne viniḥkṣipya araṇīṃ muṣkayor api
juhūṃ ca dakṣiṇe haste vāme tūpabhṛtaṃ nyaset
- 20
कर्णे चोलूखलं दद्यात्पृष्ठे च मुसलं न्यसेत्
उरसि क्षिप्य दृषदं तण्डुलाज्यतिलान्मुखे
karṇe colūkhalaṃ dadyātpṛṣṭhe ca musalaṃ nyaset
urasi kṣipya dṛṣadaṃ taṇḍulājyatilānmukhe
- 21
श्रोत्रे च प्रोक्षणीं दद्याद् आज्यस्थलीं तु चक्षुषोः
कर्णे नेत्रे मुखे घ्राणे हिरण्यशकलं न्यसेत्
śrotre ca prokṣaṇīṃ dadyād ājyasthalīṃ tu cakṣuṣoḥ
karṇe netre mukhe ghrāṇe hiraṇyaśakalaṃ nyaset
- 22
अग्निहोत्रोपकरणम् अशेषं तत्र निक्षिपेत्
असौ स्वर्गाय लोकाय स्वाहेत्य् एकाहुतिं सकृत्
agnihotropakaraṇam aśeṣaṃ tatra nikṣipet
asau svargāya lokāya svāhety ekāhutiṃ sakṛt
- 23
दद्यात्पुत्रो ऽथवा भ्राताप्य् अन्यो वापि च बान्धवः
यथा दहनसंस्कारस्तथा कार्यं विचक्षणैः
dadyātputro 'thavā bhrātāpy anyo vāpi ca bāndhavaḥ
yathā dahanasaṃskārastathā kāryaṃ vicakṣaṇaiḥ
- 24
ईदृशं तु विधिं कुर्याद्ब्रह्मलोकगतिः स्मृता
दहन्ति ये द्विजास्तं तु ते यान्ति परमां गतिम्
īdṛśaṃ tu vidhiṃ kuryādbrahmalokagatiḥ smṛtā
dahanti ye dvijāstaṃ tu te yānti paramāṃ gatim
- 25
अन्यथा कुर्वते कर्म त्व् आत्मबुद्ध्या प्रचोदिताः
भवन्त्य् अल्पायुषस्ते वै पतन्ति नरके ऽशुचौ
anyathā kurvate karma tv ātmabuddhyā pracoditāḥ
bhavanty alpāyuṣaste vai patanti narake 'śucau

