48 shlokas
- 1
अतः शुद्धिं प्रवक्ष्यामि जनने मरणे तथा
दिनत्रयेण शुध्यन्ति ब्राह्मणाः प्रेतसूतके
ataḥ śuddhiṃ pravakṣyāmi janane maraṇe tathā
dinatrayeṇa śudhyanti brāhmaṇāḥ pretasūtake
- 2
क्षत्रियो द्वादशाहेन वैश्यः पञ्चदशाहकैः
शूद्रः शुध्यति मासेन पराशरवचो यथा
kṣatriyo dvādaśāhena vaiśyaḥ pañcadaśāhakaiḥ
śūdraḥ śudhyati māsena parāśaravaco yathā
- 3
उपासने तु विप्राणाम् अङ्गशुद्धिश्च जायते
ब्राह्मणानां प्रसूतौ तु देहस्पर्शो विधीयते
upāsane tu viprāṇām aṅgaśuddhiśca jāyate
brāhmaṇānāṃ prasūtau tu dehasparśo vidhīyate
- 4
जातौ विप्रो दशाहेन द्वादशाहेन भूमिपः
वैश्यः पञ्चदशाहेन शूद्रो मासेन शुध्यति
jātau vipro daśāhena dvādaśāhena bhūmipaḥ
vaiśyaḥ pañcadaśāhena śūdro māsena śudhyati
- 5
एकाहाच्छुध्यते विप्रो यो ऽग्निवेदसमन्वितः
त्र्यहात्केवलवेदस्तु द्विहीनो दशभिर्दिनैः
ekāhācchudhyate vipro yo 'gnivedasamanvitaḥ
tryahātkevalavedastu dvihīno daśabhirdinaiḥ
- 6
जन्मकर्मपरिभ्रष्टः संध्योपासनवर्जितः
नामधारकविप्रस्तु दशाहं सूतकी भवेत्
janmakarmaparibhraṣṭaḥ saṃdhyopāsanavarjitaḥ
nāmadhārakaviprastu daśāhaṃ sūtakī bhavet
- 7
एकपिण्डास्तु दायादाः पृथग्दारनिकेतनाः
जन्मन्य् अपि विपत्तौ च तेषां तत्सूतकं भवेत्
ekapiṇḍāstu dāyādāḥ pṛthagdāraniketanāḥ
janmany api vipattau ca teṣāṃ tatsūtakaṃ bhavet
- 8
तावत्तत्सूतकं गोत्रे चतुर्थपुरुषेण तु
दायाद्विच्छेदम् आप्नोति पञ्चमो वात्मवंशजः
tāvattatsūtakaṃ gotre caturthapuruṣeṇa tu
dāyādvicchedam āpnoti pañcamo vātmavaṃśajaḥ
- 9
चतुर्थे दशरात्रं स्यात्षण्णिशाः पुंसि पञ्चमे
षष्ठे चतुरहाच्छुद्धिः सप्तमे तु दिनत्रयात्
caturthe daśarātraṃ syātṣaṇṇiśāḥ puṃsi pañcame
ṣaṣṭhe caturahācchuddhiḥ saptame tu dinatrayāt
- 10
भृग्वग्निमरणे चैव देशान्तरमृते तथा
बाले प्रेते च संन्यस्ते सद्यः शौचं विधीयते
bhṛgvagnimaraṇe caiva deśāntaramṛte tathā
bāle prete ca saṃnyaste sadyaḥ śaucaṃ vidhīyate
- 11
देशान्तरमृतः कश्चित्सगोत्रः श्रूयते यदि
न त्रिरात्रम् अहोरात्रं सद्यः स्नात्वा शुचिर्भवेत्
deśāntaramṛtaḥ kaścitsagotraḥ śrūyate yadi
na trirātram ahorātraṃ sadyaḥ snātvā śucirbhavet
- 12
देशान्तरगतो विप्रः प्रयासात्कालकारितात्
देहनाशम् अनुप्राप्तस्तिथिर्न ज्ञायते यदि
deśāntaragato vipraḥ prayāsātkālakāritāt
dehanāśam anuprāptastithirna jñāyate yadi
- 13
कृष्णाष्टमी त्व् अमावास्या कृष्णा चैकादशी च या
उदकं पिण्डदानं च तत्र श्राद्धं च कारयेत्
kṛṣṇāṣṭamī tv amāvāsyā kṛṣṇā caikādaśī ca yā
udakaṃ piṇḍadānaṃ ca tatra śrāddhaṃ ca kārayet
- 14
अजातदन्ता ये बाला ये च गर्भाद्विनिःसृताः
न तेषाम् अग्निसंस्कारो नाशौचं नोदकक्रिया
ajātadantā ye bālā ye ca garbhādviniḥsṛtāḥ
na teṣām agnisaṃskāro nāśaucaṃ nodakakriyā
- 15
यदि गर्भो विपद्येत स्रवते वापि योषितः
यावन्मासं स्थितो गर्भो दिनं तावत्तु सूतकम्
yadi garbho vipadyeta sravate vāpi yoṣitaḥ
yāvanmāsaṃ sthito garbho dinaṃ tāvattu sūtakam
- 16
आ चतुर्थाद्भवेत्स्रावः पातः पञ्चमषष्ठयोः
अत ऊर्ध्वं प्रसूतिः स्याद्दशाहं सूतकं भवेत्
ā caturthādbhavetsrāvaḥ pātaḥ pañcamaṣaṣṭhayoḥ
ata ūrdhvaṃ prasūtiḥ syāddaśāhaṃ sūtakaṃ bhavet
- 17
दन्तजाते ऽनुजाते च कृतचूडे च संस्थिते
अग्निसंस्करणे तेषां त्रिरात्रम् अशुचिर्भवेत्
dantajāte 'nujāte ca kṛtacūḍe ca saṃsthite
agnisaṃskaraṇe teṣāṃ trirātram aśucirbhavet
- 18
आ दन्तजन्मनः सद्य आ चूडान्नैष्ठिकी स्मृता
त्रिरात्रम् आ व्रतादेशाद्दशरात्रम् अतः परम्
ā dantajanmanaḥ sadya ā cūḍānnaiṣṭhikī smṛtā
trirātram ā vratādeśāddaśarātram ataḥ param
- 19
ब्रह्मचारी गृहे येषां हूयते च हुताशनः
संपर्कं न च कुर्वन्ति न तेषां सूतकं भवेत्
brahmacārī gṛhe yeṣāṃ hūyate ca hutāśanaḥ
saṃparkaṃ na ca kurvanti na teṣāṃ sūtakaṃ bhavet
- 20
संपर्काद्दुष्यते विप्रो जनने मरणे तथा
संपर्काच्च निवृत्तस्य न प्रेतं नैव सूतकम्
saṃparkādduṣyate vipro janane maraṇe tathā
saṃparkācca nivṛttasya na pretaṃ naiva sūtakam
- 21
शिल्पिनः कारुका वैद्या दासीदासाश्च नापिताः
राजानः श्रोत्रियाश्चैव सद्यः शौचाः प्रकीर्तिताः
śilpinaḥ kārukā vaidyā dāsīdāsāśca nāpitāḥ
rājānaḥ śrotriyāścaiva sadyaḥ śaucāḥ prakīrtitāḥ
- 22
सव्रतः सत्रपूतश्च आहिताग्निश्च यो द्विजः
राज्ञश्च सूतकं नास्ति यस्य चेच्छति पार्थिवः
savrataḥ satrapūtaśca āhitāgniśca yo dvijaḥ
rājñaśca sūtakaṃ nāsti yasya cecchati pārthivaḥ
- 23
उद्यतो निधने दाने आर्तो विप्रो निमन्त्रितः
तदैव ऋषिभिर्दृष्टं यथा कालेन शुध्यति
udyato nidhane dāne ārto vipro nimantritaḥ
tadaiva ṛṣibhirdṛṣṭaṃ yathā kālena śudhyati
- 24
प्रसवे गृहमेधी तु न कुर्यात्संकरं यदि
दशाहाच्छुध्यते माता त्व् अवगाह्य पिता शुचिः
prasave gṛhamedhī tu na kuryātsaṃkaraṃ yadi
daśāhācchudhyate mātā tv avagāhya pitā śuciḥ
- 25
सर्वेषां शावम् आशौचं मातापित्रोस्तु सूतकम्
सूतकं मातुर् एव स्याद् उपस्पृश्य पिता शुचिः
sarveṣāṃ śāvam āśaucaṃ mātāpitrostu sūtakam
sūtakaṃ mātur eva syād upaspṛśya pitā śuciḥ
- 26
यदि पत्न्यां प्रसूतायां संपर्कं कुरुते द्विजः
सूतकं तु भवेत्तस्य यदि विप्रः षडङ्गवित्
yadi patnyāṃ prasūtāyāṃ saṃparkaṃ kurute dvijaḥ
sūtakaṃ tu bhavettasya yadi vipraḥ ṣaḍaṅgavit
- 27
संपर्काज्जायते दोषो नान्यो दोषो ऽस्ति वै द्विजे
तस्मात्सर्वप्रयत्नेन संपर्कं वर्जयेद्बुधः
saṃparkājjāyate doṣo nānyo doṣo 'sti vai dvije
tasmātsarvaprayatnena saṃparkaṃ varjayedbudhaḥ
- 28
विवाहोत्सवयज्ञेषु त्व् अन्तरा मृतसूतके
पूर्वसंकल्पितं द्रव्यं दीयमानं न दुष्यति
vivāhotsavayajñeṣu tv antarā mṛtasūtake
pūrvasaṃkalpitaṃ dravyaṃ dīyamānaṃ na duṣyati
- 29
अन्तरा दशाहस्य पुनर्मरणजन्मनी
तावत्स्याद् अशुचिर्विप्रो यावत्तत्स्याद् अनिर्दशम्
antarā daśāhasya punarmaraṇajanmanī
tāvatsyād aśucirvipro yāvattatsyād anirdaśam
- 30
ब्राह्मणार्थे विपन्नानां बन्दिगोग्रहणे तथा
आहवेषु विपन्नानाम् एकरात्रम् अशौचकम्
brāhmaṇārthe vipannānāṃ bandigograhaṇe tathā
āhaveṣu vipannānām ekarātram aśaucakam

