33 shlokas
- 1
अतिमानाद् अतिक्रोधात्स्नेहाद्वा यदि वा भयात्
उद्बध्नीयात्स्त्री पुमान्वा गतिर् एषा विधीयते
atimānād atikrodhātsnehādvā yadi vā bhayāt
udbadhnīyātstrī pumānvā gatir eṣā vidhīyate
- 2
पूयशोणितसम्पूर्णे त्व् अन्धे तमसि मज्जति
षष्ठीर्वर्षसहस्राणि नरकं प्रतिपद्यते
pūyaśoṇitasampūrṇe tv andhe tamasi majjati
ṣaṣṭhīrvarṣasahasrāṇi narakaṃ pratipadyate
- 3
नाशौचं नोदकं नाग्निं नाश्रुपातं च कारयेत्
वोढारो ऽग्निप्रदातारः पाशच्छेदकरास्तथा
nāśaucaṃ nodakaṃ nāgniṃ nāśrupātaṃ ca kārayet
voḍhāro 'gnipradātāraḥ pāśacchedakarāstathā
- 4
तप्तकृच्छ्रेण शुध्यन्तीत्य् एवम् आह प्रजापतिः
गोभिर्हतं तथोद्बद्धं ब्राह्मणेन तु घातितम्
taptakṛcchreṇa śudhyantīty evam āha prajāpatiḥ
gobhirhataṃ tathodbaddhaṃ brāhmaṇena tu ghātitam
- 5
संस्पृशन्ति तु ये विप्रा वोढारश्चाग्निदाश्च ये
अन्ये ये वानुगन्तारः पाशच्छेदकराश्च ये
saṃspṛśanti tu ye viprā voḍhāraścāgnidāśca ye
anye ye vānugantāraḥ pāśacchedakarāśca ye
- 6
तप्तकृच्छ्रेण शुद्धास्ते कुर्युर्ब्राह्मणभोजनम्
अनडुत्सहितां गां च दद्युर्विप्राय दक्षिणाम्
taptakṛcchreṇa śuddhāste kuryurbrāhmaṇabhojanam
anaḍutsahitāṃ gāṃ ca dadyurviprāya dakṣiṇām
- 7
त्र्यहम् उष्णं पिबेद्वारि त्र्यहम् उष्णं पयः पिबेत्
त्र्यहम् उष्णं पिबेत्सर्पिर्वायुभक्षो दिनत्रयम्
tryaham uṣṇaṃ pibedvāri tryaham uṣṇaṃ payaḥ pibet
tryaham uṣṇaṃ pibetsarpirvāyubhakṣo dinatrayam
- 8
षट्पलं तु पिबेद् अम्भस्त्रिपलं तु पयः पिबेत्
पलम् एकं पिबेत्सर्पिस्तप्तकृच्छ्रं विधीयते
ṣaṭpalaṃ tu pibed ambhastripalaṃ tu payaḥ pibet
palam ekaṃ pibetsarpistaptakṛcchraṃ vidhīyate
- 9
यो वै समाचरेद्विप्रः पतितादिष्व् अकामतः
पञ्चाहं वा दशाहं वा द्वादशाहम् अथापि वा
yo vai samācaredvipraḥ patitādiṣv akāmataḥ
pañcāhaṃ vā daśāhaṃ vā dvādaśāham athāpi vā
- 10
मासार्धं मासम् एकं वा मासद्वयम् अथापि वा
अब्दार्धम् अब्दम् एकं वा तदूर्ध्वं चैव तत्समः
māsārdhaṃ māsam ekaṃ vā māsadvayam athāpi vā
abdārdham abdam ekaṃ vā tadūrdhvaṃ caiva tatsamaḥ
- 11
त्रिरात्रं प्रथमे पक्षे द्वितीये कृच्छ्रम् आचरेत्
तृतीये चैव पक्षे तु कृच्छ्रं सांतपनं चरेत्
trirātraṃ prathame pakṣe dvitīye kṛcchram ācaret
tṛtīye caiva pakṣe tu kṛcchraṃ sāṃtapanaṃ caret
- 12
चतुर्थे दशरात्रं स्यात्पराकः पञ्चमे मतः
कुर्याच्चान्द्रायणं षष्ठे सप्तमे त्व् ऐन्दवद्वयम्
caturthe daśarātraṃ syātparākaḥ pañcame mataḥ
kuryāccāndrāyaṇaṃ ṣaṣṭhe saptame tv aindavadvayam
- 13
शुद्ध्यर्थम् अष्टमे चैव षण्मासान्कृच्छ्रम् आचरेत्
पक्षसंख्याप्रमाणेन सुवर्णान्य् अपि दक्षिणा
śuddhyartham aṣṭame caiva ṣaṇmāsānkṛcchram ācaret
pakṣasaṃkhyāpramāṇena suvarṇāny api dakṣiṇā
- 14
ऋतुस्नाता तु या नारी भर्तारं नोपसर्पति
सा मृता नरकं याति विधवा च पुनः पुनः
ṛtusnātā tu yā nārī bhartāraṃ nopasarpati
sā mṛtā narakaṃ yāti vidhavā ca punaḥ punaḥ
- 15
ऋतुस्नातां तु यो भार्यां संनिधौ नोपगच्छति
घोरायां भ्रूणहत्यायां युज्यते नात्र संशयः
ṛtusnātāṃ tu yo bhāryāṃ saṃnidhau nopagacchati
ghorāyāṃ bhrūṇahatyāyāṃ yujyate nātra saṃśayaḥ
- 16
दरिद्रं व्याधितं मूर्खं भर्तारं यावमन्यते
सा शुनी जायते मृत्वा सूकरी च पुनः पुनः
daridraṃ vyādhitaṃ mūrkhaṃ bhartāraṃ yāvamanyate
sā śunī jāyate mṛtvā sūkarī ca punaḥ punaḥ
- 17
पत्यौ जीवति या नारी उपोष्य व्रतम् आचरेत्
आयुष्यं हरते भर्तुः सा नारी नरकं व्रजेत्
patyau jīvati yā nārī upoṣya vratam ācaret
āyuṣyaṃ harate bhartuḥ sā nārī narakaṃ vrajet
- 18
अपृष्ट्वा चैव भर्तारं या नारी कुरुते व्रतम्
सर्वं तद्राक्षसान्गच्छेद् इत्य् एवं मनुर् अब्रवीत्
apṛṣṭvā caiva bhartāraṃ yā nārī kurute vratam
sarvaṃ tadrākṣasāngacched ity evaṃ manur abravīt
- 19
बान्धवानां सजातीनां दुर्वृत्तं कुरुते तु या
गर्भपातं च या कुर्यान्न तां संभाषयेत्क्वचित्
bāndhavānāṃ sajātīnāṃ durvṛttaṃ kurute tu yā
garbhapātaṃ ca yā kuryānna tāṃ saṃbhāṣayetkvacit
- 20
यत्पापं ब्रह्महत्यायां द्विगुणं गर्भपातने
प्रायश्चित्तं न तस्याः स्यात्तस्यास्त्यागो विधीयते
yatpāpaṃ brahmahatyāyāṃ dviguṇaṃ garbhapātane
prāyaścittaṃ na tasyāḥ syāttasyāstyāgo vidhīyate
- 21
न कार्यम् आवसथ्येन नाग्निहोत्रेण वा पुनः
स भवेत्कर्मचाण्डालो यस्तु धर्मपराङ्मुखः
na kāryam āvasathyena nāgnihotreṇa vā punaḥ
sa bhavetkarmacāṇḍālo yastu dharmaparāṅmukhaḥ
- 22
ओघवाताहृतं बीजं यस्य क्षेत्रे प्ररोहति
स क्षेत्री लभते बीजं न बीजी भागम् अर्हति
oghavātāhṛtaṃ bījaṃ yasya kṣetre prarohati
sa kṣetrī labhate bījaṃ na bījī bhāgam arhati
- 23
तद्वत्परस्त्रियाः पुत्रौ द्वौ स्मृतौ कुण्डगोलकौ
पत्यौ जीवति कुण्डः स्यात्मृते भर्तरि गोलकः
tadvatparastriyāḥ putrau dvau smṛtau kuṇḍagolakau
patyau jīvati kuṇḍaḥ syātmṛte bhartari golakaḥ
- 24
औरसः क्षेत्रजश्चैव दत्तः कृत्रिमकः सुतः
दद्यान्माता पिता वापि स पुत्रो दत्तको भवेत्
aurasaḥ kṣetrajaścaiva dattaḥ kṛtrimakaḥ sutaḥ
dadyānmātā pitā vāpi sa putro dattako bhavet
- 25
परिवित्तिः परिवेत्ता यया च परिविद्यते
सर्वे ते नरकं यान्ति दातृयाजकपञ्चमाः
parivittiḥ parivettā yayā ca parividyate
sarve te narakaṃ yānti dātṛyājakapañcamāḥ
- 26
द्वौ कृच्छ्रौ परिवित्तेस्तु कन्यायाः कृच्छ्र एव च
कृच्छ्रातिकृच्छ्रौ दातुस्तु होता चान्द्रायणं चरेत्
dvau kṛcchrau parivittestu kanyāyāḥ kṛcchra eva ca
kṛcchrātikṛcchrau dātustu hotā cāndrāyaṇaṃ caret
- 27
कुब्जवामनषण्ढेषु गद्गदेषु जडेषु च
जात्यन्धे बधिरे मूके न दोषः परिवेदने
kubjavāmanaṣaṇḍheṣu gadgadeṣu jaḍeṣu ca
jātyandhe badhire mūke na doṣaḥ parivedane
- 28
पितृव्यपुत्रः सापत्नः परनारीसुतस्तथा
दाराग्निहोत्रसंयोगे न दोषः परिवेदने
pitṛvyaputraḥ sāpatnaḥ paranārīsutastathā
dārāgnihotrasaṃyoge na doṣaḥ parivedane
- 29
ज्येष्ठो भ्राता यदा तिष्ठेद् आधानं नैव कारयेत्
अनुज्ञातस्तु कुर्वीत शङ्खस्य वचनं यथा
jyeṣṭho bhrātā yadā tiṣṭhed ādhānaṃ naiva kārayet
anujñātastu kurvīta śaṅkhasya vacanaṃ yathā
- 30
नष्टे मृते प्रव्रजिते क्लीबे च पतिते पतौ
पञ्चस्व् आपत्सु नारीणां पतिर् अन्यो विधीयते
naṣṭe mṛte pravrajite klībe ca patite patau
pañcasv āpatsu nārīṇāṃ patir anyo vidhīyate

