20 shlokas
- 1
तं प्रोहति वसवस्त्वा प्रोहन्तु गायत्रेण छन्दसा रुद्रास्त्वा प्रोहन्तु त्रैष्टुभेन छन्दसादित्यास्त्वा प्रोहन्तु जागतेन छन्दसेति
taṃ prohati vasavastvā prohantu gāyatreṇa chandasā rudrāstvā prohantu traiṣṭubhena chandasādityāstvā prohantu jāgatena chandaseti
- 2
उपर्य् उपर्य् अक्षं पवित्रम् अत्यस्यति
upary upary akṣaṃ pavitram atyasyati
- 3
नाक्षम् उपस्पृशेत्
nākṣam upaspṛśet
- 4
यथैतं परेत्यापरेणोपरवान्प्राङ्मुख उपविश्य द्रोणकलशम् अभिमृशति तनूपा असि तन्वं मे पाहि वर्चोधा असि वर्चो मे धेहि आयुर्धा असि आयुर्मे धेहि वयोधा असि वयो मे धेहीति
yathaitaṃ paretyāpareṇoparavānprāṅmukha upaviśya droṇakalaśam abhimṛśati tanūpā asi tanvaṃ me pāhi varcodhā asi varco me dhehi āyurdhā asi āyurme dhehi vayodhā asi vayo me dhehīti
- 5
संमुखान्ग्राव्णः कृत्वाभिमृशति श्येना अजिरा ऋतस्य गर्भाः प्रयुतो नपातः पर्वतानां ककुभ आ नस्तं वीरं वहत यं बहव उपजीवामो ऽभिशस्तिकृतम् अनभिशस्त्यम् अन्यस्याभिशस्त्याः कर्तारम् इति
saṃmukhāngrāvṇaḥ kṛtvābhimṛśati śyenā ajirā ṛtasya garbhāḥ prayuto napātaḥ parvatānāṃ kakubha ā nastaṃ vīraṃ vahata yaṃ bahava upajīvāmo 'bhiśastikṛtam anabhiśastyam anyasyābhiśastyāḥ kartāram iti
- 6
तेषु द्रोणकलशम् अध्यूहतीदम् अहं मा ब्रह्मवर्चसे ऽध्यूहामि यजमानं स्वर्गे लोक इति
teṣu droṇakalaśam adhyūhatīdam ahaṃ mā brahmavarcase 'dhyūhāmi yajamānaṃ svarge loka iti
- 7
तं दृंहति देवी त्वा धिषणे निपातां ध्रुवे सदसि सीदेष ऊर्जे सीदेति
taṃ dṛṃhati devī tvā dhiṣaṇe nipātāṃ dhruve sadasi sīdeṣa ūrje sīdeti
- 8
तम् अन्तर् ईषे पवित्रम् अपहृत्य संमार्ष्टि वसवस्त्वा संमृजन्तु गायत्रेण छन्दसा रुद्रास्त्वा संमृजन्तु त्रैष्टुभेन छन्दसादित्यास्त्वा संमृजन्तु जागतेन छन्दसेति
tam antar īṣe pavitram apahṛtya saṃmārṣṭi vasavastvā saṃmṛjantu gāyatreṇa chandasā rudrāstvā saṃmṛjantu traiṣṭubhena chandasādityāstvā saṃmṛjantu jāgatena chandaseti
- 9
तद् उदीचीनदशं पवित्रं वितनोति पवित्रं ते विततं ब्रह्मणस्पत इत्य् एतेन तृचेन
tad udīcīnadaśaṃ pavitraṃ vitanoti pavitraṃ te vitataṃ brahmaṇaspata ity etena tṛcena
- 10
राजानम् आनयन्ति
rājānam ānayanti
- 11
तम् अभिमन्त्रयते स पवस्व सुधामा देवानाम् अभि प्रियाणि धामा त्रिर्देवेभ्यो ऽपवथास्त्रिर् आदित्येभ्यस्त्रिर् अङ्गिरोभ्यो येन तुर्येण ब्रह्मणा बृहस्पतये ऽपवथास्तेन मह्यं पवस्व
tam abhimantrayate sa pavasva sudhāmā devānām abhi priyāṇi dhāmā trirdevebhyo 'pavathāstrir ādityebhyastrir aṅgirobhyo yena turyeṇa brahmaṇā bṛhaspataye 'pavathāstena mahyaṃ pavasva
- 12
स नः पवस्व शं गवे शं जनाय शम् अर्वते शं राजन्न् ओषधीभ्य इति
sa naḥ pavasva śaṃ gave śaṃ janāya śam arvate śaṃ rājann oṣadhībhya iti
- 13
संततं शुक्रं पवयन्ति
saṃtataṃ śukraṃ pavayanti
- 14
ग्रहान्गृह्णन्त्य् अध्वर्यवः
grahāngṛhṇanty adhvaryavaḥ
- 15
आग्रयणग्रहं गृह्णन्हिंकरोति
āgrayaṇagrahaṃ gṛhṇanhiṃkaroti
- 16
तद् एव हिंकृतं भवति
tad eva hiṃkṛtaṃ bhavati
- 17
अथोद्गातैकर्चं गायत्रं गायत्य् उच्चा ते जातम् अन्धसेति
athodgātaikarcaṃ gāyatraṃ gāyaty uccā te jātam andhaseti
- 18
गृहीतेषु ग्रहेष्व् अप उपस्पृश्य पृथिवीम् अभिमृशति द्रप्सश्चस्कन्द पृथिवीम् अनु द्याम् इमं च योनिम् अनु यश्च पूर्वः
gṛhīteṣu graheṣv apa upaspṛśya pṛthivīm abhimṛśati drapsaścaskanda pṛthivīm anu dyām imaṃ ca yonim anu yaśca pūrvaḥ
- 19
तृतीयं योनिम् अनु संचरन्तं द्रप्सं जुहोम्य् अनु सप्त होत्रा इति
tṛtīyaṃ yonim anu saṃcarantaṃ drapsaṃ juhomy anu sapta hotrā iti
- 20
आ मास्कान्सह प्रजया रायस्पोषेणेन्द्रियं मे वीर्यं मा निर्वधीर् इत्य् आत्मानं प्रत्यभिमृशति
ā māskānsaha prajayā rāyaspoṣeṇendriyaṃ me vīryaṃ mā nirvadhīr ity ātmānaṃ pratyabhimṛśati

