27 shlokas
- 1
प्रपदनस्यावृता प्रपद्य वेद्याक्रमणेन वेदिम् आक्रामति मृदा शिथिरा देवानां वेदिर् असि नमस्ते अस्तु मा मा हिंसीर् इति
prapadanasyāvṛtā prapadya vedyākramaṇena vedim ākrāmati mṛdā śithirā devānāṃ vedir asi namaste astu mā mā hiṃsīr iti
- 2
आदित्यम् उपतिष्ठते ऽध्वनाम् अध्वपते स्वस्ति मे ऽस्मिन्देवयाने पथि कृणु रौद्रेणानीकेन स्वस्त्य् अग्ने परिदेहीति
ādityam upatiṣṭhate 'dhvanām adhvapate svasti me 'smindevayāne pathi kṛṇu raudreṇānīkena svasty agne paridehīti
- 3
धिष्ण्यान् उपतिष्ठते
dhiṣṇyān upatiṣṭhate
- 4
सम्राड् असि कृशानू रौद्रेणानीकेन पाहि माग्ने पिपृहि मा नमस्ते अस्तु मा मा हिंसीर् इत्य् आहवनीयम्
samrāḍ asi kṛśānū raudreṇānīkena pāhi māgne pipṛhi mā namaste astu mā mā hiṃsīr ity āhavanīyam
- 5
तुथो ऽसि जनधा इति बाहिष्पवमानीयम् आस्तावम्
tutho 'si janadhā iti bāhiṣpavamānīyam āstāvam
- 6
नभो ऽसि प्रतक्वा इति चात्वालम्
nabho 'si pratakvā iti cātvālam
- 7
असंमृष्टो ऽसि हव्यसूदन इति शामित्रम्
asaṃmṛṣṭo 'si havyasūdana iti śāmitram
- 8
कृष्णो ऽस्य् आखरेष्ठ इत्य् उत्करम्
kṛṣṇo 'sy ākhareṣṭha ity utkaram
- 9
ऐन्द्रीम् आवृतम् अन्वावर्त इति दक्षिणं बाहुम् अनु पर्यावृत्योत्तरेणाग्नीध्रं परीत्य पश्चात्प्रागावृत्तस्तिष्ठन्विभूर् असि प्रवाहण इत्य् आग्नीध्रम् उपतिष्ठते
aindrīm āvṛtam anvāvarta iti dakṣiṇaṃ bāhum anu paryāvṛtyottareṇāgnīdhraṃ parītya paścātprāgāvṛttastiṣṭhanvibhūr asi pravāhaṇa ity āgnīdhram upatiṣṭhate
- 10
पुरस्तात्सदसः प्रत्यगावृत्तस्तिष्ठन्वह्निर् असि हव्यवाहन इति होतुर्धिष्ण्यम्
purastātsadasaḥ pratyagāvṛttastiṣṭhanvahnir asi havyavāhana iti hoturdhiṣṇyam
- 11
श्वात्रो ऽसि प्रचेता इति मैत्रावरुणस्य
śvātro 'si pracetā iti maitrāvaruṇasya
- 12
तुथो ऽसि विश्ववेदा इति ब्राह्मणाच्छंसिनः
tutho 'si viśvavedā iti brāhmaṇācchaṃsinaḥ
- 13
उशिग् असि कविर् इति पोतुः
uśig asi kavir iti potuḥ
- 14
अंघारिर् असि बम्भारिर् इति नेष्टुः
aṃghārir asi bambhārir iti neṣṭuḥ
- 15
अवस्युर् असि दुवस्वान् इत्य् अच्छावाकस्य
avasyur asi duvasvān ity acchāvākasya
- 16
शुन्ध्युर् असि मार्जालीय इति मार्जालीयम्
śundhyur asi mārjālīya iti mārjālīyam
- 17
अमृतधामासि स्वर्ज्योतिर् इत्य् औदुम्बरीम्
amṛtadhāmāsi svarjyotir ity audumbarīm
- 18
परिषद्यो ऽस्य् आस्ताव इत्य् आस्तावम्
pariṣadyo 'sy āstāva ity āstāvam
- 19
समुद्रो ऽस्य् उरुव्यचा इति ब्रह्मसदनम्
samudro 'sy uruvyacā iti brahmasadanam
- 20
समुद्रो ऽसि विश्वव्यचा इति होतृषदनम्
samudro 'si viśvavyacā iti hotṛṣadanam
- 21
उत्तरेण सदः परीत्य पश्चात्प्रत्यगावृत्तस्तिष्ठन्न् अजो ऽस्य् एकपात् इति गार्हपत्यम् उपतिष्ठते
uttareṇa sadaḥ parītya paścātpratyagāvṛttastiṣṭhann ajo 'sy ekapāt iti gārhapatyam upatiṣṭhate
- 22
अहिर् असि बुध्न्य इति प्राजहितम्
ahir asi budhnya iti prājahitam
- 23
सगरो ऽसि बुध्न्य इतीतरं प्राजहितम्
sagaro 'si budhnya itītaraṃ prājahitam
- 24
कव्यो ऽसि कव्यवाहन इति दक्षिणं वेद्यन्तम्
kavyo 'si kavyavāhana iti dakṣiṇaṃ vedyantam
- 25
सव्यम् अंसम् अनु पर्यावृत्य समस्तान्धिष्ण्यान् उपतिष्ठते ऽग्नयः सगराः सगरैर्नामभी रौद्रैर् अनीकैः पात माग्नयः पिपृत मा
नमो वो अस्तु मा मा हिंसिष्टेति
savyam aṃsam anu paryāvṛtya samastāndhiṣṇyān upatiṣṭhate 'gnayaḥ sagarāḥ sagarairnāmabhī raudrair anīkaiḥ pāta māgnayaḥ pipṛta mā
namo vo astu mā mā hiṃsiṣṭeti
- 26
सदसो द्वारौ समीक्षत ऋतस्य द्वारौ विजिहाथां मा मा संताप्तं लोकं मे लोककृतौ कृतम् इति
sadaso dvārau samīkṣata ṛtasya dvārau vijihāthāṃ mā mā saṃtāptaṃ lokaṃ me lokakṛtau kṛtam iti
- 27
सदसस्पतिम् अद्भुतं प्रियम् इन्द्रस्य काम्यं सनिं मेधाम् अयासिषम् इत्य् एतयर्चा सदः प्रपद्य दक्षिणेनौदुम्बरीं परीत्योत्तरत उपवेशनस्यावृतोपविशन्ति उदगावृत्त उद्गाता पुरस्तात्प्रस्तोता प्रत्यङ्मुखः पश्चात्प्रतिहर्ता दक्षिणामुखः
sadasaspatim adbhutaṃ priyam indrasya kāmyaṃ saniṃ medhām ayāsiṣam ity etayarcā sadaḥ prapadya dakṣiṇenaudumbarīṃ parītyottarata upaveśanasyāvṛtopaviśanti udagāvṛtta udgātā purastātprastotā pratyaṅmukhaḥ paścātpratihartā dakṣiṇāmukhaḥ

