28 shlokas
- 1
शस्ते मरुत्वतीये नाराशंसान्भक्षयन्ति
śaste marutvatīye nārāśaṃsānbhakṣayanti
- 2
भक्षितेषु नाराशंसेषु पूर्वया द्वारा सदसो ऽधि निष्क्रम्यापरया द्वाराग्नीध्रं प्रपद्याग्नीध्रे पृष्ठाहुती जुहोति
bhakṣiteṣu nārāśaṃseṣu pūrvayā dvārā sadaso 'dhi niṣkramyāparayā dvārāgnīdhraṃ prapadyāgnīdhre pṛṣṭhāhutī juhoti
- 3
रथंतरं पिबतु सोम्यं मध्व् आयुर्दधद्यज्ञपताव् अविह्रुतम्
rathaṃtaraṃ pibatu somyaṃ madhv āyurdadhadyajñapatāv avihrutam
- 4
इमं यज्ञम् अभिसंवसाना होत्रास्तृप्यन्तु सुमनस्यमानाः स्वाहेति
imaṃ yajñam abhisaṃvasānā hotrāstṛpyantu sumanasyamānāḥ svāheti
- 5
तूष्णीम् उत्तराम्
tūṣṇīm uttarām
- 6
बृहद् इति वा
bṛhad iti vā
- 7
यत्पृष्ठं स्यात्तद् आदिशेत्
yatpṛṣṭhaṃ syāttad ādiśet
- 8
रथन्तरस्य स्तोत्रम् आहरति
rathantarasya stotram āharati
- 9
तत्प्रतिगृह्य पृथिवीम् अभिमृशति नमो मात्रे पृथिव्यै रथंतरं मा मा हिंसीर् इति
tatpratigṛhya pṛthivīm abhimṛśati namo mātre pṛthivyai rathaṃtaraṃ mā mā hiṃsīr iti
- 10
अथ महिम्नः संभरति यस्ते अग्नौ महिमा यस्ते अप्सु रथे यस्ते महिमा स्तनयित्नौ य उ ते वाते यस्ते महिमा तेन संभव रथंतर द्रविणस्वन्न एधीति
atha mahimnaḥ saṃbharati yaste agnau mahimā yaste apsu rathe yaste mahimā stanayitnau ya u te vāte yaste mahimā tena saṃbhava rathaṃtara draviṇasvanna edhīti
- 11
अथ वामदेव्यं पुरस्ताच्छान्तिम् अभिव्याहरति प्रजापतिर् असि वामदेव्यं ब्रह्मणः शरणं तन्मा पाहीति
atha vāmadevyaṃ purastācchāntim abhivyāharati prajāpatir asi vāmadevyaṃ brahmaṇaḥ śaraṇaṃ tanmā pāhīti
- 12
अथैता अमृता व्याहृतीर् अभिव्याहरति भूर्भुवः स्वः
athaitā amṛtā vyāhṛtīr abhivyāharati bhūrbhuvaḥ svaḥ
- 13
क इदम् उद्गास्यति स इदम् उद्गास्यतीत्य् एतद् उक्त्वाभ्यनिति
ka idam udgāsyati sa idam udgāsyatīty etad uktvābhyaniti
- 14
यदि बार्हतं स्तोत्रं स्याद्बृहतः स्तोत्रं प्रतिगृह्य ब्रूयाद्दिवं पितरम् उपश्रये बृहन्मा मा हिंसीर् इति
yadi bārhataṃ stotraṃ syādbṛhataḥ stotraṃ pratigṛhya brūyāddivaṃ pitaram upaśraye bṛhanmā mā hiṃsīr iti
- 15
समानं परम्
samānaṃ param
- 16
स रथन्तरेण स्तुते बृहता वा
sa rathantareṇa stute bṛhatā vā
- 17
रथन्तरे स्तुते हो इत्य् उक्त्वादिम् आददीत
rathantare stute ho ity uktvādim ādadīta
- 18
बृहति प्रस्तुत आ इति
bṛhati prastuta ā iti
- 19
रथन्तरे प्रस्तूयमाने संमीलयेत्
rathantare prastūyamāne saṃmīlayet
- 20
स्वर्दृशं प्रति विपश्येत्
svardṛśaṃ prati vipaśyet
- 21
यावत्स्तोभेत्तावत्पृथिव्यां हस्तौ स्यातां देवरथस्यानपव्याथाय
yāvatstobhettāvatpṛthivyāṃ hastau syātāṃ devarathasyānapavyāthāya
- 22
वामदेव्यस्य स्तोत्रम् आहरति
vāmadevyasya stotram āharati
- 23
तत्प्रतिगृह्यैता व्याहृतीर् अभिव्याहरति गौश्चाश्वश्चाजाश्चाविश्च व्रीहिश्च यवश्चापो वायुर् आपो वायुर् इति
tatpratigṛhyaitā vyāhṛtīr abhivyāharati gauścāśvaścājāścāviśca vrīhiśca yavaścāpo vāyur āpo vāyur iti
- 24
स वामदेव्येन मध्यमया वाचानेजन्
sa vāmadevyena madhyamayā vācānejan
- 25
आ प्रतिहाराद् अनवानं गायेत्
ā pratihārād anavānaṃ gāyet
- 26
प्रतिहार एव प्रतिह्रियमाणे वाग् इत्य् उद्गाता ब्रूयात्
pratihāra eva pratihriyamāṇe vāg ity udgātā brūyāt
- 27
अथ नौधसेनाथ कालेयेनेति
atha naudhasenātha kāleyeneti
- 28
संतिष्ठते माध्यन्दिनं सवनम्
saṃtiṣṭhate mādhyandinaṃ savanam

