24 shlokas
- 1
क्रीते राजनि सुब्रह्मण्यम् आमन्त्रयन्ते
krīte rājani subrahmaṇyam āmantrayante
- 2
स यज्ञोपवीतं कृत्वाप आचम्य दक्षिणेन पाणिना पलाशशाखां शमीशाखां वादायान्तरेण चक्रं चानड्वाहं च दक्षिणाम् ईषाम् अनुप्रसृप्य राजवाहनस्यान्तरीषे तिष्ठन्सुब्रह्मण्याम् आह्वयति त्रिर् अनिरुक्ताम्
sa yajñopavītaṃ kṛtvāpa ācamya dakṣiṇena pāṇinā palāśaśākhāṃ śamīśākhāṃ vādāyāntareṇa cakraṃ cānaḍvāhaṃ ca dakṣiṇām īṣām anuprasṛpya rājavāhanasyāntarīṣe tiṣṭhansubrahmaṇyām āhvayati trir aniruktām
- 3
सुब्रह्मण्यों सुब्रह्मण्यों सुब्रह्मण्योम् इत्य् उपांशु
subrahmaṇyoṃ subrahmaṇyoṃ subrahmaṇyom ity upāṃśu
- 4
एवम् एव प्राग्वर्तमान एवं दक्षिणत एवम् उदगावर्ते
evam eva prāgvartamāna evaṃ dakṣiṇata evam udagāvarte
- 5
द्विर्दक्षिणम् अनड्वाहं शाखया संस्पृशति सकृद्वामम्
dvirdakṣiṇam anaḍvāhaṃ śākhayā saṃspṛśati sakṛdvāmam
- 6
पर्यावहन्ति राजवाहनम्
paryāvahanti rājavāhanam
- 7
विमुक्तयोर् अनडुहो राजानं प्रपादयन्ति
vimuktayor anaḍuho rājānaṃ prapādayanti
- 8
प्रपन्ने राजनि यथैतम् उपनिःसृप्य पूर्वया द्वारा शालां प्रपद्योत्तरतः शाखाम् उपगूहति यजमानस्य पशून्पाहीति
prapanne rājani yathaitam upaniḥsṛpya pūrvayā dvārā śālāṃ prapadyottarataḥ śākhām upagūhati yajamānasya paśūnpāhīti
- 9
अत्रैतद् अनो युक्तं ददाति सुब्रह्मण्याय
atraitad ano yuktaṃ dadāti subrahmaṇyāya
- 10
अतिथ्यया चरन्ति
atithyayā caranti
- 11
अतिथ्यया चरित्वा प्रवर्ग्योपसद्भ्यां चरन्ति
atithyayā caritvā pravargyopasadbhyāṃ caranti
- 12
संस्थितायाम् उपसद्य् उत्करे तिष्ठन्सुब्रह्मण्याम् आह्वयति त्रिर्निरुक्ताम्
saṃsthitāyām upasady utkare tiṣṭhansubrahmaṇyām āhvayati trirniruktām
- 13
सुब्रह्मण्यों सुब्रह्मण्यों सुब्रह्मण्योम् इन्द्रागच्छ हरिव आगच्छ मेधातिथेर्मेष वृषणश्वस्य मेने गौरावस्कन्दिन्नहल्यायै जार कौशिक ब्राह्मण कौशिक ब्रुवाण सुत्याम् आगच्छ मघवन्देवा ब्रह्माण आगच्छतागच्छतागच्छतेति
subrahmaṇyoṃ subrahmaṇyoṃ subrahmaṇyom indrāgaccha hariva āgaccha medhātithermeṣa vṛṣaṇaśvasya mene gaurāvaskandinnahalyāyai jāra kauśika brāhmaṇa kauśika bruvāṇa sutyām āgaccha maghavandevā brahmāṇa āgacchatāgacchatāgacchateti
- 14
आहूय सुब्रह्मण्यां यजमानं वाचयति
āhūya subrahmaṇyāṃ yajamānaṃ vācayati
- 15
ब्रह्मासि सुब्रह्मण्ये तस्यास्ते पृथिवी पादो ऽग्निर्वत्सस्तेन मे प्रस्नुतेषम् ऊर्जं धुक्ष्व
brahmāsi subrahmaṇye tasyāste pṛthivī pādo 'gnirvatsastena me prasnuteṣam ūrjaṃ dhukṣva
- 16
ब्रह्मासि सुब्रह्मण्ये तस्यास्ते ऽन्तरिक्षं पादो वायुर्वत्सस्तेन मे प्रस्नुतेषम् ऊर्जं धुक्ष्व
brahmāsi subrahmaṇye tasyāste 'ntarikṣaṃ pādo vāyurvatsastena me prasnuteṣam ūrjaṃ dhukṣva
- 17
ब्रह्मासि सुब्रह्मण्ये तस्यास्ते द्यौः पाद आदित्यो वत्सस्तेन मे प्रस्नुतेषम् ऊर्जं धुक्ष्व
brahmāsi subrahmaṇye tasyāste dyauḥ pāda ādityo vatsastena me prasnuteṣam ūrjaṃ dhukṣva
- 18
ब्रह्मासि सुब्रह्मण्ये तस्यास्ते दिशः पादो ऽवान्तरदिशा वत्सस्तेन मे प्रस्नुतेषम् ऊर्जं धुक्ष्व
brahmāsi subrahmaṇye tasyāste diśaḥ pādo 'vāntaradiśā vatsastena me prasnuteṣam ūrjaṃ dhukṣva
- 19
ब्रह्मासि सुब्रह्मण्ये परोरजास्ते पञ्चमः पादः समुद्रः स्तनश्चन्द्रमा वत्सस्तेन मे प्रस्नुतेषम् ऊर्जं धुक्ष्व प्रजां पशून्स्वर्गं लोकं मह्यं यजमानाय धुक्ष्वेत्य् उपांशु
brahmāsi subrahmaṇye parorajāste pañcamaḥ pādaḥ samudraḥ stanaścandramā vatsastena me prasnuteṣam ūrjaṃ dhukṣva prajāṃ paśūnsvargaṃ lokaṃ mahyaṃ yajamānāya dhukṣvety upāṃśu
- 20
एवम् एवापराह्ण उपसदि संस्थितायाम्
evam evāparāhṇa upasadi saṃsthitāyām
- 21
एते एवोपवसथाद् अनुवर्तयते
ete evopavasathād anuvartayate
- 22
सुत्याम् इत्य् उपवसथात्
sutyām ity upavasathāt
- 23
श्वः सुत्याम् इत्य् उपवसथे
śvaḥ sutyām ity upavasathe
- 24
अद्य सुत्याम् इति सवे
adya sutyām iti save

