23 shlokas
- 1
काल एनम् आमन्त्रयन्ते
kāla enam āmantrayante
- 2
स यज्ञोपवीतं कृत्वाप आचम्यान्तरेण चात्वालं चोत्करं च प्रपद्यते
sa yajñopavītaṃ kṛtvāpa ācamyāntareṇa cātvālaṃ cotkaraṃ ca prapadyate
- 3
ज्या असि सुधां मे धेह्य् आयुष्मन्तस्तद्वर्चस्वन्त उद्गेष्म
jyā asi sudhāṃ me dhehy āyuṣmantastadvarcasvanta udgeṣma
- 4
एतद् एव प्रपदनम् एतद् उदयनम् आज्यग्रहान्गृह्णत्सूत्करे तिष्ठन्सुब्रह्मण्याम् आह्वयत्य् अद्य सुत्याम् इति
etad eva prapadanam etad udayanam ājyagrahāngṛhṇatsūtkare tiṣṭhansubrahmaṇyām āhvayaty adya sutyām iti
- 5
तं यदि ब्रूयुर्विश्वरूपा गायेत्य् अकर्मण एतत्त्रयोदशं स्तोत्रम् इति ब्रूयाद्विराजं लोभयतीति
taṃ yadi brūyurviśvarūpā gāyety akarmaṇa etattrayodaśaṃ stotram iti brūyādvirājaṃ lobhayatīti
- 6
संसवे तु कार्यम्
saṃsave tu kāryam
- 7
अभिषवस्य काल आगच्छति स पूर्वया द्वारा हविर्धानं प्रपद्य विष्णोः पृष्ठम् असीति दक्षिणं हविर्धानम् अभिमृशति
abhiṣavasya kāla āgacchati sa pūrvayā dvārā havirdhānaṃ prapadya viṣṇoḥ pṛṣṭham asīti dakṣiṇaṃ havirdhānam abhimṛśati
- 8
विष्णो रराटम् असीत्य् उत्तरम्
viṣṇo rarāṭam asīty uttaram
- 9
सो ऽन्तरेण हविर्धाने गत्वा दक्षिणस्य हविर्धानस्य पश्चाद् अक्षम् उपविशति
so 'ntareṇa havirdhāne gatvā dakṣiṇasya havirdhānasya paścād akṣam upaviśati
- 10
अहे दैधिषव्योद् अतस्तिष्ठान्यस्य सदने सीद यो ऽस्मत्पाकतरस्तस्य सदने सीद निरस्तः परावसुर् इति
ahe daidhiṣavyod atastiṣṭhānyasya sadane sīda yo 'smatpākatarastasya sadane sīda nirastaḥ parāvasur iti
- 11
तृणं निरस्यति यत्प्रतिशुष्काग्रं भवति यद्वा प्रतिच्छिन्नाग्रम्
tṛṇaṃ nirasyati yatpratiśuṣkāgraṃ bhavati yadvā praticchinnāgram
- 12
अप उपस्पृश्य आ वसोः सदने सीदामीति सीदति
apa upaspṛśya ā vasoḥ sadane sīdāmīti sīdati
- 13
एतेनैवोपविशति यत्र यत्र करिष्यन्भवति
etenaivopaviśati yatra yatra kariṣyanbhavati
- 14
अथाह नमः पितृभ्यः पूर्वसद्भ्यो नमः साकं निषद्भ्यः
athāha namaḥ pitṛbhyaḥ pūrvasadbhyo namaḥ sākaṃ niṣadbhyaḥ
- 15
युञ्जते वाचं शतपदीं गाये सहस्रवर्तनीम्
yuñjate vācaṃ śatapadīṃ gāye sahasravartanīm
- 16
गायत्रं त्रैष्टुभं जगद्विश्वा रूपाणि संभृतं देवा ओकांसि चक्रिर इति
gāyatraṃ traiṣṭubhaṃ jagadviśvā rūpāṇi saṃbhṛtaṃ devā okāṃsi cakrira iti
- 17
अथास्मा अधो ऽक्षं द्रोणकलशं प्रयच्छति
athāsmā adho 'kṣaṃ droṇakalaśaṃ prayacchati
- 18
तं प्रतिगृह्णाति देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्यां प्रतिगृह्णामीति
taṃ pratigṛhṇāti devasya tvā savituḥ prasave 'śvinorbāhubhyāṃ pūṣṇo hastābhyāṃ pratigṛhṇāmīti
- 19
तं प्रतिगृह्य दक्षिण ऊरौ निधायोपर्यक्षं पवित्रम् अपहृत्य पवयति
taṃ pratigṛhya dakṣiṇa ūrau nidhāyoparyakṣaṃ pavitram apahṛtya pavayati
- 20
वसवस्त्वा पुनन्तु गायत्रेण छन्दसा सुप्रजावनिं रायस्पोषवनिम् इति
vasavastvā punantu gāyatreṇa chandasā suprajāvaniṃ rāyaspoṣavanim iti
- 21
तं पवयित्वा पश्चाद् अक्षं सादयति
taṃ pavayitvā paścād akṣaṃ sādayati
- 22
बार्हस्पत्यम् असि वानस्पत्यं प्रजापतेर्मूर्धात्यायुपात्रम् इति
bārhaspatyam asi vānaspatyaṃ prajāpatermūrdhātyāyupātram iti
- 23
तं पश्चाद् अक्षं सादयित्वा गायत्रं विश्वरूपासु गायतीति ब्राह्मणम्
taṃ paścād akṣaṃ sādayitvā gāyatraṃ viśvarūpāsu gāyatīti brāhmaṇam

