15 shlokas
- 1
अथ तृतीयसवने प्रपदनस्यावृता प्रपद्य वेद्याक्रमणेन वेदिम् आक्रम्यादित्यम् उपतिष्ठते ऽध्वनाम् अध्वपत इत्य् एतेनैव
atha tṛtīyasavane prapadanasyāvṛtā prapadya vedyākramaṇena vedim ākramyādityam upatiṣṭhate 'dhvanām adhvapata ity etenaiva
- 2
अथैन्द्रीम् आवृतम् अन्वावर्त इति दक्षिणं बाहुम् अनु पर्यावृत्योत्तरेणाग्नीध्रं च सदश्च परीत्य पश्चात्सदस ईक्षमाणः समस्तान्धिष्ण्यान् उपतिष्ठते ऽग्नयः सगरा इत्य् एतेनैव
athaindrīm āvṛtam anvāvarta iti dakṣiṇaṃ bāhum anu paryāvṛtyottareṇāgnīdhraṃ ca sadaśca parītya paścātsadasa īkṣamāṇaḥ samastāndhiṣṇyān upatiṣṭhate 'gnayaḥ sagarā ity etenaiva
- 3
अथ सदः प्रपद्यैतयैवावृतोपविश्य दक्षिणेन होतुर्धिष्ण्यं पूर्वया द्वारा सदसो ऽधि निष्क्रम्य पूर्वया द्वारा हविर्धानं प्रपद्योत्तरस्मिन्हविर्धाने पूतभृतं पवयति वसवस्त्वा पुनन्त्व् इत्य् एतेनैव
atha sadaḥ prapadyaitayaivāvṛtopaviśya dakṣiṇena hoturdhiṣṇyaṃ pūrvayā dvārā sadaso 'dhi niṣkramya pūrvayā dvārā havirdhānaṃ prapadyottarasminhavirdhāne pūtabhṛtaṃ pavayati vasavastvā punantv ity etenaiva
- 4
पूर्व एव पूतभृद् अपर आधवनीयः
pūrva eva pūtabhṛd apara ādhavanīyaḥ
- 5
पूतभृतो मुखे पवित्रं वितनोति पवित्रं ते विततं ब्रह्मणस्पत इत्य् एतेनैव
pūtabhṛto mukhe pavitraṃ vitanoti pavitraṃ te vitataṃ brahmaṇaspata ity etenaiva
- 6
तत्र यथादेशं शुक्रपवितारः कुर्वन्ति
tatra yathādeśaṃ śukrapavitāraḥ kurvanti
- 7
तयैवावृता संप्रसर्प्य सदसि पवमानेन स्तुवते
tayaivāvṛtā saṃprasarpya sadasi pavamānena stuvate
- 8
साम्ने साम्ने हिंकुर्वन्ति
sāmne sāmne hiṃkurvanti
- 9
अनवानम् उष्णिक्ककुभौ गायत्य् आ प्रतिहारात्
anavānam uṣṇikkakubhau gāyaty ā pratihārāt
- 10
स्तुते पशुना चरन्ति
stute paśunā caranti
- 11
अथ पुरोडाशैर् अथ राज्ञा
atha puroḍāśair atha rājñā
- 12
राजनि भक्षिते सीदन्ति नाराशंसाः
rājani bhakṣite sīdanti nārāśaṃsāḥ
- 13
सन्नेषु नाराशंसेषु त्र्यावृत्पुरोडाशशकलान्य् उपास्यन्त्य् अत्र पितरो मादयध्वं यथाभागम् आवृषायध्वम् इति
sanneṣu nārāśaṃseṣu tryāvṛtpuroḍāśaśakalāny upāsyanty atra pitaro mādayadhvaṃ yathābhāgam āvṛṣāyadhvam iti
- 14
अत्र पितामहाः
atra pitāmahāḥ
- 15
अत्र प्रपितामहा इति
atra prapitāmahā iti

