22 shlokas
- 1
शस्ते वैश्वदेवे नाराशंसान्भक्षयन्ति
śaste vaiśvadeve nārāśaṃsānbhakṣayanti
- 2
भक्षितेष्व् अग्नीञ्छालाकान् उपकल्पयते
bhakṣiteṣv agnīñchālākān upakalpayate
- 3
सौम्येन चरन्ति
saumyena caranti
- 4
चरित्वैनम् आहरन्ति
caritvainam āharanti
- 5
तम् अवेक्षते यन्मे मनो यन्मे मनो यमं गतं यद्वा मे अपरागतम्राज्ञा सोमेन तद्वयं पुनर् अस्मासु दध्मसि
tam avekṣate yanme mano yanme mano yamaṃ gataṃ yadvā me aparāgatamrājñā somena tadvayaṃ punar asmāsu dadhmasi
- 6
मनसि मे चक्षुर् आधाश्चक्षुषि मे मनः आयुष्मत्या ऋचो मा छेत्सि मा साम्नो भागधेयाद्वि योषम् इति
manasi me cakṣur ādhāścakṣuṣi me manaḥ āyuṣmatyā ṛco mā chetsi mā sāmno bhāgadheyādvi yoṣam iti
- 7
तद्धापि छायां पर्यवेक्षेत आत्मनो ऽप्रणाशाय
taddhāpi chāyāṃ paryavekṣeta ātmano 'praṇāśāya
- 8
अथो सर्पिषो ऽक्ष्णोर् आदधीत चक्षुष आप्यायनाय
atho sarpiṣo 'kṣṇor ādadhīta cakṣuṣa āpyāyanāya
- 9
तद् अपि विज्ञानम् असत्
tad api vijñānam asat
- 10
य आत्मानं न परिपश्येद् अपेतासुः स स्यात्
ya ātmānaṃ na paripaśyed apetāsuḥ sa syāt
- 11
तस्मात्सत्याद् अप्य् आज्यं भूय आनीय पर्य् एवात्मानं दिदृक्षेत सर्वस्यायुषो ऽवरुद्ध्यै
tasmātsatyād apy ājyaṃ bhūya ānīya pary evātmānaṃ didṛkṣeta sarvasyāyuṣo 'varuddhyai
- 12
अथो सौम्यस्योपहत्याक्ष्णोर् आदधीत येन ह्य् आजिम् अजयन्नृचक्षा येन श्येनं शकुनं सुपर्णं यद् आहुश्चक्षुर् अदिताव् अनन्तं सोमो नृचक्षा मयि तद्दधात्व् इति
atho saumyasyopahatyākṣṇor ādadhīta yena hy ājim ajayannṛcakṣā yena śyenaṃ śakunaṃ suparṇaṃ yad āhuścakṣur aditāv anantaṃ somo nṛcakṣā mayi taddadhātv iti
- 13
तम् अवेक्ष्य दक्षिणेनौदुम्बरीं पर्याहृत्य जघनार्धे सदसः सादयति
tam avekṣya dakṣiṇenaudumbarīṃ paryāhṛtya jaghanārdhe sadasaḥ sādayati
- 14
प्रजापतेर्भागो ऽसीति
prajāpaterbhāgo 'sīti
- 15
यज्ञायज्ञीयस्य स्तोत्रम् आहरति
yajñāyajñīyasya stotram āharati
- 16
तेन प्रावृत उद्गायति
tena prāvṛta udgāyati
- 17
द्वितीयां रथंतरवर्णां करोति
dvitīyāṃ rathaṃtaravarṇāṃ karoti
- 18
निधनम् अनु पत्नीम् अवेक्षते वामी नाम संदृशि विश्वा वामानि धीमहीति
nidhanam anu patnīm avekṣate vāmī nāma saṃdṛśi viśvā vāmāni dhīmahīti
- 19
वृष्णस्ते वृष्ण्यावतो विश्वा रेतांसि धीमहीतीतरा प्रतिसमीक्षते
vṛṣṇaste vṛṣṇyāvato viśvā retāṃsi dhīmahītītarā pratisamīkṣate
- 20
भक्षितेषु यज्ञायज्ञीयस्य सोमेष्वपरया द्वारा सदसो ऽधि निष्क्रम्यापरया द्वाराग्नीध्रं प्रपद्याग्नीध्रे स्रुवाहुती जुहोति अपां पुष्पम् अस्य् ओषधीनां रस इन्द्रस्य प्रियतमं हविः स्वाहेति
bhakṣiteṣu yajñāyajñīyasya someṣvaparayā dvārā sadaso 'dhi niṣkramyāparayā dvārāgnīdhraṃ prapadyāgnīdhre sruvāhutī juhoti apāṃ puṣpam asy oṣadhīnāṃ rasa indrasya priyatamaṃ haviḥ svāheti
- 21
तूष्णीम् उत्तराम्
tūṣṇīm uttarām
- 22
इति तृतीयसवनम्
iti tṛtīyasavanam

