18 shlokas
- 1
चमसं व्रतप्रदानम् अभिमन्त्रयत उरुव्यचा असि जनधाः सपत्नो मा पाह्यस्य यज्ञस्योदृचः
camasaṃ vratapradānam abhimantrayata uruvyacā asi janadhāḥ sapatno mā pāhyasya yajñasyodṛcaḥ
- 2
अथाङ्गुलीर्न्यञ्चति
स्वाहा यज्ञं मनसेति द्वे
स्वाहा द्यावापृथिवीभ्याम् इति द्वे
स्वाहोरोर् अन्तरिक्षाद् इति द्वे
athāṅgulīrnyañcati
svāhā yajñaṃ manaseti dve
svāhā dyāvāpṛthivībhyām iti dve
svāhoror antarikṣād iti dve
- 3
स्वाहा यज्ञं वातादारभ इति मुष्टी करोति
svāhā yajñaṃ vātādārabha iti muṣṭī karoti
- 4
अथैनं संभारयजूंषि वाचयत्य् अग्निर्यजुर्भिर् इति
athainaṃ saṃbhārayajūṃṣi vācayaty agniryajurbhir iti
- 5
ततो वाचं यच्छत्य् आ नक्षत्राणाम् उदयात्
tato vācaṃ yacchaty ā nakṣatrāṇām udayāt
- 6
यदि पुरा नक्षत्रेभ्यो वाचं विसृजेद्वैष्णवीम् आग्नावैष्णवीं सारस्वतीं बार्हस्पत्याम् इत्य् अनूच्य पुनर् एव वाचं यच्छेत्
yadi purā nakṣatrebhyo vācaṃ visṛjedvaiṣṇavīm āgnāvaiṣṇavīṃ sārasvatīṃ bārhaspatyām ity anūcya punar eva vācaṃ yacchet
- 7
त्वम् अग्ने व्रतपा असीति ब्रूयाद्यदि मुष्टी वाचं वा विसृजेत्
tvam agne vratapā asīti brūyādyadi muṣṭī vācaṃ vā visṛjet
- 8
अथैनम् आवेदयत्य् अदीक्षिष्टायं ब्राह्मणो ऽसाव् आमुष्यायणो ऽमुष्य पुत्रो ऽमुष्य पौत्रो ऽमुष्य नप्तामुष्याः पुत्रो ऽमुष्याः पौत्रो ऽमुष्या नप्तेति
त्रिर् उपांशु त्रिर् उच्चैः
athainam āvedayaty adīkṣiṣṭāyaṃ brāhmaṇo 'sāv āmuṣyāyaṇo 'muṣya putro 'muṣya pautro 'muṣya naptāmuṣyāḥ putro 'muṣyāḥ pautro 'muṣyā napteti
trir upāṃśu trir uccaiḥ
- 9
यः कश्चन दीक्षेत ब्राह्मण इत्य् एवैनम् आवेदयेत्
yaḥ kaścana dīkṣeta brāhmaṇa ity evainam āvedayet
- 10
अपराह्णे दीक्षते
aparāhṇe dīkṣate
- 11
यं कामयेत तपस्वी स्याद् इति तं प्रातर्दीक्षयेत्
yaṃ kāmayeta tapasvī syād iti taṃ prātardīkṣayet
- 12
उत्थाय कृष्णाजिनं प्रतिमुञ्चति
utthāya kṛṣṇājinaṃ pratimuñcati
- 13
स एतद्व्रतं चरति
न मांसम् अश्नाति न स्त्रियम् उपैति नोपर्यास्ते जुगुप्सेतानृतात्
sa etadvrataṃ carati
na māṃsam aśnāti na striyam upaiti noparyāste jugupsetānṛtāt
- 14
परिह्वालं मानुषीं वाचं वदति चनसितं विचक्षणं वानुषजन्
parihvālaṃ mānuṣīṃ vācaṃ vadati canasitaṃ vicakṣaṇaṃ vānuṣajan
- 15
चनसितेति ब्राह्मणम् आमन्त्रयीत
विचक्षणेति राजन्यवैश्याव् इति विज्ञायते
canasiteti brāhmaṇam āmantrayīta
vicakṣaṇeti rājanyavaiśyāv iti vijñāyate
- 16
ब्राह्मणेन चैव क्षत्रियेण वा वैश्येन वा सम्भाषेत
brāhmaṇena caiva kṣatriyeṇa vā vaiśyena vā sambhāṣeta
- 17
तत एवैनम् अनुप्रयुज्येरन्
tata evainam anuprayujyeran
- 18
यद्य् एनं शूद्रेण संवाद उपपद्येतैतेषाम् एवैकं ब्रूयाद् इमं नु विचक्ष्वेति
yady enaṃ śūdreṇa saṃvāda upapadyetaiteṣām evaikaṃ brūyād imaṃ nu vicakṣveti

