12 shlokas
- 1
वसन्ते ज्योतिष्टोमेन यक्ष्यमाणो ब्राह्मणान् आर्षेयान् ऋत्विजो वृणीते यूनः स्थविरान्वानूचानान् अनङ्गहीनान् ऊर्ध्ववाचश्चतुरः
vasante jyotiṣṭomena yakṣyamāṇo brāhmaṇān ārṣeyān ṛtvijo vṛṇīte yūnaḥ sthavirānvānūcānān anaṅgahīnān ūrdhvavācaścaturaḥ
- 2
सर्वान्वा
sarvānvā
- 3
चतुरो वृणानो महर्त्विजो वृणीते ऽध्वर्युं ब्रह्माणं होतारम् उद्गातरम् इति
caturo vṛṇāno mahartvijo vṛṇīte 'dhvaryuṃ brahmāṇaṃ hotāram udgātaram iti
- 4
आदित्यो देवो दैव्यो ऽध्वर्युः स मे ऽध्वर्युर् अस्त्व् इत्य् उपांशु दैव्यम् अध्वर्युं वृत्वासौ मानुष इत्य् उच्चैर्मानुषं वृणीते
ādityo devo daivyo 'dhvaryuḥ sa me 'dhvaryur astv ity upāṃśu daivyam adhvaryuṃ vṛtvāsau mānuṣa ity uccairmānuṣaṃ vṛṇīte
- 5
चन्द्रमा देवो दैव्यो ब्रह्मा स मे ब्रह्मास्त्व् इत्य् उपांशु दैव्यं ब्रह्माणं वृत्वासौ मानुष इत्य् उच्चैर्मानुषं वृणीते
candramā devo daivyo brahmā sa me brahmāstv ity upāṃśu daivyaṃ brahmāṇaṃ vṛtvāsau mānuṣa ity uccairmānuṣaṃ vṛṇīte
- 6
अग्निर्देवो दैव्यो होता स मे होतास्त्व् इत्य् उपांशु दैव्यं होतारं वृत्वासौ मानुष इत्य् उच्चैर्मानुषं वृणीते
agnirdevo daivyo hotā sa me hotāstv ity upāṃśu daivyaṃ hotāraṃ vṛtvāsau mānuṣa ity uccairmānuṣaṃ vṛṇīte
- 7
पर्जन्यो देवो दैव्य उद्गाता स म उद्गातास्त्व् इत्य् उपांशु दैव्यं उद्गातारं वृत्वासौ मानुष इत्य् उच्चैर्मानुषं वृणीते
parjanyo devo daivya udgātā sa ma udgātāstv ity upāṃśu daivyaṃ udgātāraṃ vṛtvāsau mānuṣa ity uccairmānuṣaṃ vṛṇīte
- 8
सदस्यं महर्त्विजं पञ्चमं कौषीतकिनः समामनन्ति
sadasyaṃ mahartvijaṃ pañcamaṃ kauṣītakinaḥ samāmananti
- 9
स कृताकृतकर्मणाम् उपद्रष्टा भवति
sa kṛtākṛtakarmaṇām upadraṣṭā bhavati
- 10
तं वृणीते
taṃ vṛṇīte
- 11
आकाशो देवो दैव्यः सदस्यः स मे सदस्यो ऽस्त्व् इत्य् उपांशु दैव्यं सदस्यं वृत्वासौ मानुष इत्य् उच्चैर्मानुषं वृणीते
ākāśo devo daivyaḥ sadasyaḥ sa me sadasyo 'stv ity upāṃśu daivyaṃ sadasyaṃ vṛtvāsau mānuṣa ity uccairmānuṣaṃ vṛṇīte
- 12
आपो देवीर्दैव्या होत्राशंसिनस्ते मे होत्राशंसिनः सन्त्व् इत्य् उपांशु दैव्यान्होत्राशंसिनो वृत्वासौ चासौ मानुष इत्य् उच्चैर्मानुषान्वृणीते
āpo devīrdaivyā hotrāśaṃsinaste me hotrāśaṃsinaḥ santv ity upāṃśu daivyānhotrāśaṃsino vṛtvāsau cāsau mānuṣa ity uccairmānuṣānvṛṇīte

