16 shlokas
- 1
अथैनम् एकविंशत्या दर्भपुञ्जीलैः सप्तभिः सप्तभिस्त्रिः पवयति चित्पतिस्त्वा पुनातु
वाक्पतिस्त्वा पुनातु
देवस्त्वा सविता पुनात्व् इत्य् एतैर्मन्त्रैः
athainam ekaviṃśatyā darbhapuñjīlaiḥ saptabhiḥ saptabhistriḥ pavayati citpatistvā punātu
vākpatistvā punātu
devastvā savitā punātv ity etairmantraiḥ
- 2
अच्छिद्रेण पवित्रेणेत्य् एतं मन्त्रं सर्वत्रानुषजति
acchidreṇa pavitreṇety etaṃ mantraṃ sarvatrānuṣajati
- 3
द्विर् ऊर्ध्वं नाभेर् उन्मार्ष्टि सकृद् अवाङ्
dvir ūrdhvaṃ nābher unmārṣṭi sakṛd avāṅ
- 4
पवमानः सुवर्जन इत्य् एतम् अनुवाकं पाव्यमानो जपति
pavamānaḥ suvarjana ity etam anuvākaṃ pāvyamāno japati
- 5
यद्देवा देवहेडनम् इति च
तस्य ते पवित्रपते पवित्रेण यस्मै कं पुने तच्छकेयम् इति चैतं मन्त्रम्
yaddevā devaheḍanam iti ca
tasya te pavitrapate pavitreṇa yasmai kaṃ pune tacchakeyam iti caitaṃ mantram
- 6
आ वो देवास ईमह इति पूर्वया द्वारा प्राग्वंशं प्रविश्यापरेणाहवनीयम् अतिक्रम्य दक्षिणतस्तिष्ठन्न् आहवनीयम् अभिमन्त्रयत इन्द्राग्नी द्यावापृथिवीत्य् अनुवाकशेषेण
ā vo devāsa īmaha iti pūrvayā dvārā prāgvaṃśaṃ praviśyāpareṇāhavanīyam atikramya dakṣiṇatastiṣṭhann āhavanīyam abhimantrayata indrāgnī dyāvāpṛthivīty anuvākaśeṣeṇa
- 7
तस्यैष एव संचरो भवत्य् आ सुत्यायाः
tasyaiṣa eva saṃcaro bhavaty ā sutyāyāḥ
- 8
अत्रैके दीक्षणीयाम् इष्टिं समामनन्ति
atraike dīkṣaṇīyām iṣṭiṃ samāmananti
- 9
यद्दीक्षणीयायां ध्रौवम् आज्यं ततः स्रुवेण चतस्रो दीक्षाहुतीर्जुहोत्य् आकूत्यै प्रयुजे ऽग्नये स्वाहेत्य् एतैर्मन्त्रैः
yaddīkṣaṇīyāyāṃ dhrauvam ājyaṃ tataḥ sruveṇa catasro dīkṣāhutīrjuhoty ākūtyai prayuje 'gnaye svāhety etairmantraiḥ
- 10
स्रुचा पञ्चमीम् आपो देवीर्बृहतीर्विश्वशंभुव इति
srucā pañcamīm āpo devīrbṛhatīrviśvaśaṃbhuva iti
- 11
चतुर्गृहीतेन स्रुचं पूरयित्वा द्वादशगृहीतेन वा पूर्णाहुतिं जुहोति विश्वे देवस्य नेतुर् इत्य् एतया
caturgṛhītena srucaṃ pūrayitvā dvādaśagṛhītena vā pūrṇāhutiṃ juhoti viśve devasya netur ity etayā
- 12
बिलावकाशं कृत्वा जुहोतीत्य् एकेषाम्
bilāvakāśaṃ kṛtvā juhotīty ekeṣām
- 13
कृष्णाजिनस्य दक्षिणं पूर्वपादं परिषीव्यति
kṛṣṇājinasya dakṣiṇaṃ pūrvapādaṃ pariṣīvyati
- 14
द्वे वा समीची मांससंहिते कृत्वा
dve vā samīcī māṃsasaṃhite kṛtvā
- 15
अन्तर्वेदि कृष्णाजिनं प्राचीनग्रीवम् उत्तरलोमास्तीर्य शुक्लां च कृष्णां च राजिं यजमानः संमृशत्य् ऋक्सामयोः शिल्पे स्थ इति
antarvedi kṛṣṇājinaṃ prācīnagrīvam uttaralomāstīrya śuklāṃ ca kṛṣṇāṃ ca rājiṃ yajamānaḥ saṃmṛśaty ṛksāmayoḥ śilpe stha iti
- 16
भसत्तो जान्वक्न आरोहतीमां धियं शिक्षमाणस्य
सुत्रामाणम् इति द्वाभ्याम्
bhasatto jānvakna ārohatīmāṃ dhiyaṃ śikṣamāṇasya
sutrāmāṇam iti dvābhyām

