19 shlokas
- 1
प्रायणीयायास्तन्त्रं प्रक्रमयति
prāyaṇīyāyāstantraṃ prakramayati
- 2
तत्रैतानि न क्रियन्ते ऽग्न्यन्वाधानं व्रतोपायनं पत्नीसंनहनम् अन्वाहार्य इति
tatraitāni na kriyante 'gnyanvādhānaṃ vratopāyanaṃ patnīsaṃnahanam anvāhārya iti
- 3
ये के च सोम इष्टिपशुबन्धाः सर्वेष्व् एवैतानि न क्रियन्ते
ye ke ca soma iṣṭipaśubandhāḥ sarveṣv evaitāni na kriyante
- 4
उदयनीयायाम् अनूबन्ध्यायां व्रतोपायनं पत्नीसंनहनम् इति क्रियन्ते
udayanīyāyām anūbandhyāyāṃ vratopāyanaṃ patnīsaṃnahanam iti kriyante
- 5
सर्वाण्य् उदवसानीयायां क्रियन्ते ऽन्यत्रान्वाहार्यात्
sarvāṇy udavasānīyāyāṃ kriyante 'nyatrānvāhāryāt
- 6
तत्रैषो ऽत्यन्तप्रदेशः
यत्किं च प्रतते तन्त्रे हविर् आगच्छति यानि कृतानि न तानि पुनः क्रियन्ते
यथा पशुपुरोडाशे प्रयाजानूयाजा यानि चान्यान्य् एवंरूपाणि भवन्ति
tatraiṣo 'tyantapradeśaḥ
yatkiṃ ca pratate tantre havir āgacchati yāni kṛtāni na tāni punaḥ kriyante
yathā paśupuroḍāśe prayājānūyājā yāni cānyāny evaṃrūpāṇi bhavanti
- 7
अदित्यै प्रायणीयं चरुं निर्वपति
adityai prāyaṇīyaṃ caruṃ nirvapati
- 8
पयसि शृतो भवति
payasi śṛto bhavati
- 9
समानम् आ सदनात्
samānam ā sadanāt
- 10
उद्धृत्य चरुं षड्ढोत्रा सादयति
uddhṛtya caruṃ ṣaḍḍhotrā sādayati
- 11
एतस्याम् एव स्थाल्यां मेक्षणे निष्कासम् इति प्रज्ञातं निदधाति
etasyām eva sthālyāṃ mekṣaṇe niṣkāsam iti prajñātaṃ nidadhāti
- 12
सप्तदश सामिधेन्यो भवन्ति
saptadaśa sāmidhenyo bhavanti
- 13
समानम् आज्यभागाभ्याम्
samānam ājyabhāgābhyām
- 14
चतुर आज्यभागान्यजति पथ्यां स्वस्तिं पुरस्ताद् अग्निं दक्षिणतः सोमं पश्चात्सवितारम् उत्तरतः
catura ājyabhāgānyajati pathyāṃ svastiṃ purastād agniṃ dakṣiṇataḥ somaṃ paścātsavitāram uttarataḥ
- 15
हविषादितिं मध्ये
haviṣāditiṃ madhye
- 16
शंयुवन्ता प्रायणीया संतिष्ठते
śaṃyuvantā prāyaṇīyā saṃtiṣṭhate
- 17
अत्रैके राज्ञो निवपनं समामनन्ति
atraike rājño nivapanaṃ samāmananti
- 18
यत्प्रायणीयाया ध्रौवम् आज्यं ततो जुह्वां चतुर्गृहीत्वा दर्भेण हिरण्यं निष्टर्क्यं बद्ध्वावदधातीयं ते शुक्र तनूर् इदं वर्च इति
yatprāyaṇīyāyā dhrauvam ājyaṃ tato juhvāṃ caturgṛhītvā darbheṇa hiraṇyaṃ niṣṭarkyaṃ baddhvāvadadhātīyaṃ te śukra tanūr idaṃ varca iti
- 19
एषा सोमक्रयणी भवति
अकूटा चेद् अकर्णाकाणाश्रोणासप्तशफारुणा पिङ्गाक्ष्य् एकहायनी द्विहायनी वा
या शुण्ठाधीलोधकर्णी तया षोडशिनः सोमं क्रीणातीति विज्ञायते
eṣā somakrayaṇī bhavati
akūṭā ced akarṇākāṇāśroṇāsaptaśaphāruṇā piṅgākṣy ekahāyanī dvihāyanī vā
yā śuṇṭhādhīlodhakarṇī tayā ṣoḍaśinaḥ somaṃ krīṇātīti vijñāyate

