15 shlokas
- 1
रश्मयो देवा दैव्याश्चमसाध्वर्यवस्ते मे चमसाध्वर्यवः सन्त्व् इत्य् उपांशु दैव्यांश्चमसाध्वर्यून्वृत्वासौ चासौ मानुष इत्य् उच्चैर्मानुषान्वृणीते
raśmayo devā daivyāścamasādhvaryavaste me camasādhvaryavaḥ santv ity upāṃśu daivyāṃścamasādhvaryūnvṛtvāsau cāsau mānuṣa ity uccairmānuṣānvṛṇīte
- 2
यज्ञोपवीतं कृत्वाप आचम्य प्राङ्वोदङ्वा तिष्ठन्जपत्य् आसीनो वा भूर्भुवः सुवः
आयुर्मे प्रावोचो वर्चो मे प्रावोचो यशो मे प्रावोचः श्रियं मे प्रावोचः
आयुष्मान् अहं वर्चस्वी यशस्वी श्रीमान् अपचितिमान्भूयासम्
भूर्भुवः सुवः
सर्वं भूयासम् इत्य् उक्त्वा प्रति वा चष्टे प्रति वा जानीते
yajñopavītaṃ kṛtvāpa ācamya prāṅvodaṅvā tiṣṭhanjapaty āsīno vā bhūrbhuvaḥ suvaḥ
āyurme prāvoco varco me prāvoco yaśo me prāvocaḥ śriyaṃ me prāvocaḥ
āyuṣmān ahaṃ varcasvī yaśasvī śrīmān apacitimānbhūyāsam
bhūrbhuvaḥ suvaḥ
sarvaṃ bhūyāsam ity uktvā prati vā caṣṭe prati vā jānīte
- 3
स प्रतिज्ञाय देवो देवम् एतु सोमः सोमम् एत्व् ऋतस्य पथा
एमि विहाय दौष्कृत्यम् इत्य् अभिप्रव्रजति
sa pratijñāya devo devam etu somaḥ somam etv ṛtasya pathā
emi vihāya dauṣkṛtyam ity abhipravrajati
- 4
पद्वा नामासि स्रुतिः सोमसरणी सोमं गमेयम् इति पन्थानम् आतिष्ठते
padvā nāmāsi srutiḥ somasaraṇī somaṃ gameyam iti panthānam ātiṣṭhate
- 5
पितरो भूर् इति पितॄन्दक्षिणामुख उपतिष्ठते
pitaro bhūr iti pitṝndakṣiṇāmukha upatiṣṭhate
- 6
अथैनं गृहान् ओह्याह्वयति
athainaṃ gṛhān ohyāhvayati
- 7
आच्छाद्य चैनं कुण्डलिनं करोति
ācchādya cainaṃ kuṇḍalinaṃ karoti
- 8
एकधनं चास्मै ददाति
ekadhanaṃ cāsmai dadāti
- 9
अमावास्यायां दीक्षते पौर्णमास्यां वा
amāvāsyāyāṃ dīkṣate paurṇamāsyāṃ vā
- 10
तस्यापरिमिता दीक्षाः संवत्सरपरार्ध्याः
tasyāparimitā dīkṣāḥ saṃvatsaraparārdhyāḥ
- 11
न दर्शपूर्णमासाभ्याम् अनिष्ट्वा सोमेन यजेत
na darśapūrṇamāsābhyām aniṣṭvā somena yajeta
- 12
नाग्निष्टोमेनानिष्ट्वेतरैः क्रतुभिर् इति
nāgniṣṭomenāniṣṭvetaraiḥ kratubhir iti
- 13
अतिरात्रम् एके प्रथमं यज्ञं समामनन्ति
atirātram eke prathamaṃ yajñaṃ samāmananti
- 14
न रथन्तरपृष्ठम् अकृत्वा बृहत्पृष्ठं कुर्वीत
na rathantarapṛṣṭham akṛtvā bṛhatpṛṣṭhaṃ kurvīta
- 15
अमावास्यायां पौर्णमास्यां वा सुत्यम् अहर्भवति
amāvāsyāyāṃ paurṇamāsyāṃ vā sutyam aharbhavati

