21 shlokas
- 1
अथातो ऽवान्तरदीक्षां व्याख्यास्यामः
athāto 'vāntaradīkṣāṃ vyākhyāsyāmaḥ
- 2
पर्वण्य् उदगयन आपूर्यमाणपक्षे पुण्ये नक्षत्रे ऽपराह्णे केशश्मश्रू वापयित्वा प्राचीम् उदीचीं वा दिशम् उपनिष्क्रम्य खिले ऽछदिर्दर्शे ऽग्निम् उपसमाधाय संपरिस्तीर्य पूर्ववद् उपाकृत्य मदन्तीर् उपस्पृश्य प्रथमेनानुवाकेन शान्तिं कृत्वा चतस्र औदुम्बरीः समिधो घृतान्वक्ता आदधाति पृथिवी समिद् इत्य् एतैर्मन्त्रैः
parvaṇy udagayana āpūryamāṇapakṣe puṇye nakṣatre 'parāhṇe keśaśmaśrū vāpayitvā prācīm udīcīṃ vā diśam upaniṣkramya khile 'chadirdarśe 'gnim upasamādhāya saṃparistīrya pūrvavad upākṛtya madantīr upaspṛśya prathamenānuvākena śāntiṃ kṛtvā catasra audumbarīḥ samidho ghṛtānvaktā ādadhāti pṛthivī samid ity etairmantraiḥ
- 3
अथ देवता उपतिष्ठते ऽग्ने व्रतपते शुक्रियं व्रतं चरिष्यामि तच्छकेयं तन्मे राध्यतां वायो व्रतपत आदित्य व्रतपते व्रतानां व्रतपते शुक्रियं व्रतं चरिष्यामि तच्छकेयं तन्मे राध्यताम् इति
atha devatā upatiṣṭhate 'gne vratapate śukriyaṃ vrataṃ cariṣyāmi tacchakeyaṃ tanme rādhyatāṃ vāyo vratapata āditya vratapate vratānāṃ vratapate śukriyaṃ vrataṃ cariṣyāmi tacchakeyaṃ tanme rādhyatām iti
- 4
अथैनं सर्वेषाम् अनुवाकानां प्रभृतीर् अभिव्याहारयति प्रथमोत्तमयोर्वा
athainaṃ sarveṣām anuvākānāṃ prabhṛtīr abhivyāhārayati prathamottamayorvā
- 5
जयादि प्रतिपद्यते
jayādi pratipadyate
- 6
परिषेचनान्तं कृत्वा मदन्तीर् उपस्पृश्योत्तमेनानुवाकेन शान्तिं कृत्वा ततः संमीलयति वाचं च यच्छति
pariṣecanāntaṃ kṛtvā madantīr upaspṛśyottamenānuvākena śāntiṃ kṛtvā tataḥ saṃmīlayati vācaṃ ca yacchati
- 7
अथास्याहतेन वाससा शिरः संमुखं वेष्टयति
athāsyāhatena vāsasā śiraḥ saṃmukhaṃ veṣṭayati
- 8
अस्तमित आदित्ये ग्रामं प्रपादयति
astamita āditye grāmaṃ prapādayati
- 9
वाग्यत एतां रात्रिं तिष्ठत्य् आस्ते वा
vāgyata etāṃ rātriṃ tiṣṭhaty āste vā
- 10
श्वो भूते खिले ऽछदिर्दर्शे ऽग्निम् उपसमाधाय संपरिस्तीर्याथास्य षट्त्रयम् अभिविदर्शयति सप्ततयम् इत्य् एके ऽग्निम् आदित्यम् उदकुम्भम् अश्मानं वत्सं महानग्नां हिरण्यं सप्तमम्
śvo bhūte khile 'chadirdarśe 'gnim upasamādhāya saṃparistīryāthāsya ṣaṭtrayam abhividarśayati saptatayam ity eke 'gnim ādityam udakumbham aśmānaṃ vatsaṃ mahānagnāṃ hiraṇyaṃ saptamam
- 11
अपि वादितस्त्रीण्य् अभिविदर्शयति
api vāditastrīṇy abhividarśayati
- 12
तत आदित्यम् उपतिष्ठते वयः सुपर्णा इत्य् एतयात्रैतद्वासो गुरवे दत्त्वा
tata ādityam upatiṣṭhate vayaḥ suparṇā ity etayātraitadvāso gurave dattvā
- 13
अथास्य ब्रह्मचर्यम् अधि नित्ये
athāsya brahmacaryam adhi nitye
- 14
न नक्तं भुञ्जीत
na naktaṃ bhuñjīta
- 15
यदि भुञ्जीतापज्वलितं भुञ्जीत
yadi bhuñjītāpajvalitaṃ bhuñjīta
- 16
न मृन्मयं प्रति धयीत
na mṛnmayaṃ prati dhayīta
- 17
न स्त्रिया न शूद्रेण सम्भाषेत
na striyā na śūdreṇa sambhāṣeta
- 18
न चक्रीवन्तम् आरोहेत्
na cakrīvantam ārohet
- 19
न कूपम् अवरोहेत्
na kūpam avarohet
- 20
नोपानहौ न छत्रं धारयीत
nopānahau na chatraṃ dhārayīta
- 21
न समाजम् ईक्षेत न हर्म्याणि न शरीराणि न शवं नान्तावसायिनम्
na samājam īkṣeta na harmyāṇi na śarīrāṇi na śavaṃ nāntāvasāyinam

