12 shlokas
- 1
आज्यम् अधिश्रित्योत्पूय स्रुवं च जुहूं च निष्टप्य संमृज्य चतुर्गृहीतेन स्रुचं पूरयित्वा द्वादशगृहीतेन वा पूर्णाहुतिं जुहोति
ājyam adhiśrityotpūya sruvaṃ ca juhūṃ ca niṣṭapya saṃmṛjya caturgṛhītena srucaṃ pūrayitvā dvādaśagṛhītena vā pūrṇāhutiṃ juhoti
- 2
सप्त ते अग्ने समिधः सप्त जिह्वा इत्य् एताम् अनुद्रुत्य स्वाहाकारेण जुहोति
sapta te agne samidhaḥ sapta jihvā ity etām anudrutya svāhākāreṇa juhoti
- 3
हुतायां पूर्णाहुतौ वरं ददाति धेनुं वासो ऽनड्वाहं हिरण्यं वा
hutāyāṃ pūrṇāhutau varaṃ dadāti dhenuṃ vāso 'naḍvāhaṃ hiraṇyaṃ vā
- 4
स्रुचि चतुर्गृहीतं गृहीत्वा तिस्रस्तन्तुमतीर्जुहोति तन्तुं तन्वन्न् उद्बुध्यस्वाग्ने त्रयस्त्रिंशत्तन्तव इति
sruci caturgṛhītaṃ gṛhītvā tisrastantumatīrjuhoti tantuṃ tanvann udbudhyasvāgne trayastriṃśattantava iti
- 5
अपरं चतुर्गृहीतं गृहीत्वा चतस्रो ऽभ्यावर्तिनीर्जुहोत्य् अग्ने ऽभ्यावर्तिन्न् अग्ने अङ्गिरः पुनर् ऊर्जा सह रय्येति
aparaṃ caturgṛhītaṃ gṛhītvā catasro 'bhyāvartinīrjuhoty agne 'bhyāvartinn agne aṅgiraḥ punar ūrjā saha rayyeti
- 6
अपरं चतुर्गृहीतं गृहीत्वानुख्यां जुहोत्य् अन्व् अग्निर् उषसाम् अग्रम् अख्यद् इत्य् एतया
aparaṃ caturgṛhītaṃ gṛhītvānukhyāṃ juhoty anv agnir uṣasām agram akhyad ity etayā
- 7
अपरं चतुर्गृहीतं गृहीत्वा मनस्वत्या जुहोति मनो ज्योतिर्जुषताम् इत्येतया
aparaṃ caturgṛhītaṃ gṛhītvā manasvatyā juhoti mano jyotirjuṣatām ityetayā
- 8
अपरं चतुर्गृहीतं गृहीत्वा प्राजापत्या जुहोति प्रजापतय इत्येतया
aparaṃ caturgṛhītaṃ gṛhītvā prājāpatyā juhoti prajāpataya ityetayā
- 9
अपरं चतुर्गृहीतं गृहीत्वा व्याहृतीभिर्जुहोत्य् एकैकशः समस्ताभिश्च
aparaṃ caturgṛhītaṃ gṛhītvā vyāhṛtībhirjuhoty ekaikaśaḥ samastābhiśca
- 10
प्रत्येकं चतुर्गृहीतं जुहुयाद् इत्य् एकं
pratyekaṃ caturgṛhītaṃ juhuyād ity ekaṃ
- 11
यथा समादिष्टम् इत्य् अपरम्
yathā samādiṣṭam ity aparam
- 12
यथाकामी सर्वदर्विहोमेषु जयाभ्यातानान्राष्ट्रभृत इति हुत्वा
yathākāmī sarvadarvihomeṣu jayābhyātānānrāṣṭrabhṛta iti hutvā

