16 shlokas
- 1
सर्वेषु पाकयज्ञेषु स्त्रियाश्चानुपेतस्य बलिमन्त्रो न विद्यते
sarveṣu pākayajñeṣu striyāścānupetasya balimantro na vidyate
- 2
अपि वा स्त्री जुहुयान्मन्त्रवर्जं न चानुपेतः
api vā strī juhuyānmantravarjaṃ na cānupetaḥ
- 3
उपेतो व्याख्यातः
upeto vyākhyātaḥ
- 4
गृहमेधिनो यद् अशनीयस्य होमा बलयश्च स्वर्गपुष्टिसंयुक्तास्तेषां मन्त्राणाम् उपयोगे द्वादशाहम् अधःशय्या ब्रह्मचर्यं क्षारलवणवर्जनं च
gṛhamedhino yad aśanīyasya homā balayaśca svargapuṣṭisaṃyuktāsteṣāṃ mantrāṇām upayoge dvādaśāham adhaḥśayyā brahmacaryaṃ kṣāralavaṇavarjanaṃ ca
- 5
उत्तमस्यैकरात्रम् उपवासः
uttamasyaikarātram upavāsaḥ
- 6
स्त्री वैश्वदेवं निर्वपेत्
strī vaiśvadevaṃ nirvapet
- 7
युक्तो वा स्वयं निर्वपेद्देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्यां विश्वेभ्यो देवेभ्यो जुष्टं निर्वपामीति त्रिर्यजुषा तूष्णीं चतुर्थम्
yukto vā svayaṃ nirvapeddevasya tvā savituḥ prasave 'śvinorbāhubhyāṃ pūṣṇo hastābhyāṃ viśvebhyo devebhyo juṣṭaṃ nirvapāmīti triryajuṣā tūṣṇīṃ caturtham
- 8
पत्नी प्रयता फलीकरोति
patnī prayatā phalīkaroti
- 9
पत्न्या उपदिशति
patnyā upadiśati
- 10
प्रक्षालितपाणिपादाधिश्रयीत शृतं वेदयीत
prakṣālitapāṇipādādhiśrayīta śṛtaṃ vedayīta
- 11
भूतम् इति भर्तुः प्रतिवेदयते
bhūtam iti bhartuḥ prativedayate
- 12
तत्सुभृतं विराड् अन्नं तन्मा क्षायीति वचनम्
tatsubhṛtaṃ virāḍ annaṃ tanmā kṣāyīti vacanam
- 13
अभिघार्योद्वास्य प्रतिष्ठितम् अभिघार्योपरिष्टाद् अद्भिर्मार्जयित्वाधस्ताद्गोमयेन
abhighāryodvāsya pratiṣṭhitam abhighāryopariṣṭād adbhirmārjayitvādhastādgomayena
- 14
नात्रेध्माबर्हिर्भवति नाघारौ नाज्यभागौ
nātredhmābarhirbhavati nāghārau nājyabhāgau
- 15
व्याहृतीभिश्चतस्रः समिधो ऽभ्याधाय परिषिच्य हस्तेन जुहोत्य् अग्नये स्वाहा सोमाय स्वाहा प्रजापतये स्वाहा धन्वन्तरये स्वाहा ध्रुवाय स्वाहा ध्रुवाय भौमाय स्वाहा ध्रुवक्षितये स्वाहाच्युतक्षितये स्वाहा विश्वेभ्यो देवेभ्यः स्वाहा सर्वाभ्यो देवताभ्यः स्वाहाग्नये स्वाहाग्नये ऽमवते स्वाहाग्नये ऽन्नादाय स्वाहाग्नये स्विष्टकृते स्वाहेति
vyāhṛtībhiścatasraḥ samidho 'bhyādhāya pariṣicya hastena juhoty agnaye svāhā somāya svāhā prajāpataye svāhā dhanvantaraye svāhā dhruvāya svāhā dhruvāya bhaumāya svāhā dhruvakṣitaye svāhācyutakṣitaye svāhā viśvebhyo devebhyaḥ svāhā sarvābhyo devatābhyaḥ svāhāgnaye svāhāgnaye 'mavate svāhāgnaye 'nnādāya svāhāgnaye sviṣṭakṛte svāheti
- 16
व्याहृतीभिर्जुहोत्य् एकैकशः समस्ताभिश्च
मा नस्तोके तनये मा न आयुषि मा नो गोषु मा नो अश्वेषु रीरिषः
वीरान्मा नो रुद्र भामितो वधीर्हविष्मन्तो नमसा विधेम ते स्वाहा
कामाय स्वाहा मन्यवे स्वाहेत्य् अथ परिषिञ्चति मन्त्रांश्च संनमति
vyāhṛtībhirjuhoty ekaikaśaḥ samastābhiśca
mā nastoke tanaye mā na āyuṣi mā no goṣu mā no aśveṣu rīriṣaḥ
vīrānmā no rudra bhāmito vadhīrhaviṣmanto namasā vidhema te svāhā
kāmāya svāhā manyave svāhety atha pariṣiñcati mantrāṃśca saṃnamati

