12 shlokas
- 1
अपरेण गार्हपत्यम् उपविश्याधीहि भो इत्य् उक्त्वा सावित्रीं सहस्रकृत्व आवर्तयेच्छतकृत्वो वा
apareṇa gārhapatyam upaviśyādhīhi bho ity uktvā sāvitrīṃ sahasrakṛtva āvartayecchatakṛtvo vā
- 2
दशवारं वेदादीन्जपेच्छन्दांसि कूश्माण्डानि चाधीयीताग्निम् ईडे पुरोहितम् इत्य् ऋग्वेदस्येषे त्वोर्जे त्वेति यजुर्वेदस्याग्न आयाहि वीतय इति सामवेदस्य शं नो देवीर् अभिष्टय इत्य् अथर्ववेदस्याग्निर्मूर्धेति छन्दांसि यद्देवा देवहेडनम् इति कूश्माण्ड्यः
daśavāraṃ vedādīnjapecchandāṃsi kūśmāṇḍāni cādhīyītāgnim īḍe purohitam ity ṛgvedasyeṣe tvorje tveti yajurvedasyāgna āyāhi vītaya iti sāmavedasya śaṃ no devīr abhiṣṭaya ity atharvavedasyāgnirmūrdheti chandāṃsi yaddevā devaheḍanam iti kūśmāṇḍyaḥ
- 3
यद् अधीते स ब्रह्मयज्ञः
yad adhīte sa brahmayajñaḥ
- 4
यज्जुहोति स देवयज्ञः
yajjuhoti sa devayajñaḥ
- 5
यत्पितृभ्यः स्वधाकरोति स पितृयज्ञः
yatpitṛbhyaḥ svadhākaroti sa pitṛyajñaḥ
- 6
यद्भूतेभ्यो बलिं हरति स भूतयज्ञः
yadbhūtebhyo baliṃ harati sa bhūtayajñaḥ
- 7
यद् अतिथिभ्यो ऽन्नं ददाति स मनुष्ययज्ञ इति
yad atithibhyo 'nnaṃ dadāti sa manuṣyayajña iti
- 8
एते वै पञ्च महायज्ञाः सतति सुप्रयुक्ता नयन्ति परमां गतिम्
ete vai pañca mahāyajñāḥ satati suprayuktā nayanti paramāṃ gatim
- 9
एतेभ्यो यस्य पञ्चभ्यो यज्ञ एकोऽपि हीयते
मनस्वत्य् आहुतिस्तस्य प्रायश्चित्तं विधीयते
etebhyo yasya pañcabhyo yajña eko'pi hīyate
manasvaty āhutistasya prāyaścittaṃ vidhīyate
- 10
द्व्यहं त्र्यहं वापि प्रमादाद् अकृतेषु तिस्रस्तन्तुमतीर्हुत्वा चतस्रो वारुणीर्जपेत्
dvyahaṃ tryahaṃ vāpi pramādād akṛteṣu tisrastantumatīrhutvā catasro vāruṇīrjapet
- 11
दशाहं द्वादशाहं वा विच्छिन्नेषु स्वस्त्ययनेषु तु सर्वशश्चतस्रो ऽभ्यावर्तिनीर्हुत्वा कार्यस्तान्तुमतश्चरुः
daśāhaṃ dvādaśāhaṃ vā vicchinneṣu svastyayaneṣu tu sarvaśaścatasro 'bhyāvartinīrhutvā kāryastāntumataścaruḥ
- 12
यस्य स्त्री वानुपेतो वा गृहेष्व् एतान्बलीन्हरेत्
कूश्माण्ड्यस्तत्र होतव्या हुत्वा यज्ञसमृद्धये
प्रवासं गच्छतो यस्य गृहे कर्ता न विद्यते
पञ्चानां महताम् एषां स यज्ञैः सह गच्छति
प्रवासे कुरुते चैतान्यद् अन्नम् उपपद्यते
न चेद् उत्पद्यते त्व् अन्नम् अद्भिर् एनान्समापयेत्
अद्भिर् एव व्रतं कृत्वा यथालाभम् अनुव्रतः
देवानां देवयज्ञेन द्विजा गच्छन्ति सात्मताम्
पितॄणां पितृयज्ञेन भूतियज्ञेन भूतीनाम्
मनोर्मनुष्ययज्ञेन ब्रह्मयज्ञेन ब्रह्मणः
एतेषां सात्मतां गत्वा देवतानां शतं समाः
आनन्दं ब्रह्म गच्छन्ति ध्रुवं शाश्वतम् अव्ययम् इति
yasya strī vānupeto vā gṛheṣv etānbalīnharet
kūśmāṇḍyastatra hotavyā hutvā yajñasamṛddhaye
pravāsaṃ gacchato yasya gṛhe kartā na vidyate
pañcānāṃ mahatām eṣāṃ sa yajñaiḥ saha gacchati
pravāse kurute caitānyad annam upapadyate
na ced utpadyate tv annam adbhir enānsamāpayet
adbhir eva vrataṃ kṛtvā yathālābham anuvrataḥ
devānāṃ devayajñena dvijā gacchanti sātmatām
pitṝṇāṃ pitṛyajñena bhūtiyajñena bhūtīnām
manormanuṣyayajñena brahmayajñena brahmaṇaḥ
eteṣāṃ sātmatāṃ gatvā devatānāṃ śataṃ samāḥ
ānandaṃ brahma gacchanti dhruvaṃ śāśvatam avyayam iti

