14 shlokas
- 1
यदि शकटं न स्याद् अपरेण गार्हपत्यं स्फ्यं निधाय तस्मिन्पात्रीं तस्यां पुरोडाश्यान् ओप्य तस्याः पूर्वार्धं धूर् असीत्य् अभिमृश्य सर्वाञ्छकटमन्त्रान् उक्त्वा
yadi śakaṭaṃ na syād apareṇa gārhapatyaṃ sphyaṃ nidhāya tasminpātrīṃ tasyāṃ puroḍāśyān opya tasyāḥ pūrvārdhaṃ dhūr asīty abhimṛśya sarvāñchakaṭamantrān uktvā
- 2
इदं देवानाम् इति निरुप्तान् अभिमृशति
idaṃ devānām iti niruptān abhimṛśati
- 3
इदम् उ नः सहेत्य् अपादानस्थानम्
idam u naḥ sahety apādānasthānam
- 4
स्फात्यै त्वेति निरुप्तान् एव
sphātyai tveti niruptān eva
- 5
इदम् अहं निर्वरुणस्य पाशाद् इति पुरोडाश्यान् आदाय निर्गच्छति
idam ahaṃ nirvaruṇasya pāśād iti puroḍāśyān ādāya nirgacchati
- 6
सुवर् अभि वि ख्येषम् इति सर्वं यज्ञम् अनुवीक्षते
suvar abhi vi khyeṣam iti sarvaṃ yajñam anuvīkṣate
- 7
आग्नेयो ऽष्टाकपाल उपांशुयाजश्चाज्यं हविः प्राजापत्यो वैष्णवो ऽग्नीषोमीयो वाग्नीषोमीयश्चैकादशकपालः पौर्णमास्यां प्रधानानि
āgneyo 'ṣṭākapāla upāṃśuyājaścājyaṃ haviḥ prājāpatyo vaiṣṇavo 'gnīṣomīyo vāgnīṣomīyaścaikādaśakapālaḥ paurṇamāsyāṃ pradhānāni
- 8
नासोमयाजिनो ब्राह्मणस्याग्नीषोमीयः पुरोडाशो विद्यत इत्य् एके
nāsomayājino brāhmaṇasyāgnīṣomīyaḥ puroḍāśo vidyata ity eke
- 9
आग्नेयो ऽष्टाकपाल ऐन्द्रं सांनाय्यम् अमावास्यायां संनयतः
āgneyo 'ṣṭākapāla aindraṃ sāṃnāyyam amāvāsyāyāṃ saṃnayataḥ
- 10
असंनयत आग्नेयो ऽष्टाकपाल ऐन्द्राग्न एकादशकपालो द्वादशकपालो वा
asaṃnayata āgneyo 'ṣṭākapāla aindrāgna ekādaśakapālo dvādaśakapālo vā
- 11
तद् अङ्गम् इतरे होमाः
tad aṅgam itare homāḥ
- 12
पौर्णमास्याम् इन्द्राय वैमृधाय पुरोडाशम् एकादशकपालम् अनुनिर्वपेत्
paurṇamāsyām indrāya vaimṛdhāya puroḍāśam ekādaśakapālam anunirvapet
- 13
यदि समानतन्त्रो वैमृधो ऽग्नीषोमाभ्यां निरुप्येन्द्राय वैमृधाय निर्वपति
yadi samānatantro vaimṛdho 'gnīṣomābhyāṃ nirupyendrāya vaimṛdhāya nirvapati
- 14
संस्थितायां पौर्णमास्यां वैमृधम् अनुनिर्वपतीत्य् एके
saṃsthitāyāṃ paurṇamāsyāṃ vaimṛdham anunirvapatīty eke

