14 shlokas
- 1
जनयत्यै त्वा संयौमीति संयुत्य मखस्य शिरो ऽसीति पिण्डं कृत्वा यथाभागं व्यावर्तेथाम् इति विभजति
janayatyai tvā saṃyaumīti saṃyutya makhasya śiro 'sīti piṇḍaṃ kṛtvā yathābhāgaṃ vyāvartethām iti vibhajati
- 2
समौ पिण्डौ कृत्वेदम् अग्नय इत्य् आग्नेयम् अभिमृशतीदम् अमुष्मा इति यथादेवतम्
samau piṇḍau kṛtvedam agnaya ity āgneyam abhimṛśatīdam amuṣmā iti yathādevatam
- 3
इदम् अहं सेनाया इति वेदेन दक्षिणकपालयोगाद् अङ्गारान् अपोहत्य् उत्तरस्माच्च
idam ahaṃ senāyā iti vedena dakṣiṇakapālayogād aṅgārān apohaty uttarasmācca
- 4
मखस्य शिरो ऽसीति दक्षिणं पिण्डम् आदाय घर्मो ऽसि विश्वायुर् इति दक्षिणस्मिन्न् अधिश्रयति
makhasya śiro 'sīti dakṣiṇaṃ piṇḍam ādāya gharmo 'si viśvāyur iti dakṣiṇasminn adhiśrayati
- 5
एवम् उत्तरम्
evam uttaram
- 6
अनुच्चम् अनतिनीचं कूर्मस्येव प्रतिकृतिं करोति
anuccam anatinīcaṃ kūrmasyeva pratikṛtiṃ karoti
- 7
उरु प्रथस्वेति यावत्कपालं प्रथयति
uru prathasveti yāvatkapālaṃ prathayati
- 8
पात्र्याम् अप आनीय त्वचं गृह्णीष्वेति प्रदक्षिणं सलेपाद्भिः श्लक्ष्णीकुर्वन्न् अनतिक्षारयन्न् अनुपरिमार्ष्टि
pātryām apa ānīya tvacaṃ gṛhṇīṣveti pradakṣiṇaṃ salepādbhiḥ ślakṣṇīkurvann anatikṣārayann anuparimārṣṭi
- 9
दध्य् उपनिधायान्तरितं रक्ष इत्य् उल्मुकेन त्रिः सर्वाणि हवींषि पर्यग्निकरोति
dadhy upanidhāyāntaritaṃ rakṣa ity ulmukena triḥ sarvāṇi havīṃṣi paryagnikaroti
- 10
देवस्त्वा सविता श्रपयत्व् इति दक्षिणं पुरोडाशं दर्भैर् अभिज्वलयञ्छ्रपयति
devastvā savitā śrapayatv iti dakṣiṇaṃ puroḍāśaṃ darbhair abhijvalayañchrapayati
- 11
अग्ने हव्यं रक्षस्वेति गार्हपत्याग्निम् अभिमन्त्रयते
agne havyaṃ rakṣasveti gārhapatyāgnim abhimantrayate
- 12
सं ब्रह्मणा पृच्यस्वेति वेदेन पुरोडाशे साङ्गारं भस्माभिवासयति
saṃ brahmaṇā pṛcyasveti vedena puroḍāśe sāṅgāraṃ bhasmābhivāsayati
- 13
अविदहन्तः श्रपयतेति वाचं विसृजते
avidahantaḥ śrapayateti vācaṃ visṛjate
- 14
अङ्गुलिप्रक्षालनं पात्रनिर्णेजनं चोल्मुकेनाभितप्य हृत्वान्तर्वेदि स्फ्येनोदीचीस्तिस्रो लेखाः कृत्वैकताय स्वाहेति त्रिभिः पश्चात्तिसृषु लेखास्व् असंसृष्टं निनयति
aṅguliprakṣālanaṃ pātranirṇejanaṃ colmukenābhitapya hṛtvāntarvedi sphyenodīcīstisro lekhāḥ kṛtvaikatāya svāheti tribhiḥ paścāttisṛṣu lekhāsv asaṃsṛṣṭaṃ ninayati

