279 shlokas
- 1
अथ शाक्तमुपायमण्डलं कथयामः परमात्मसंविदे
atha śāktamupāyamaṇḍalaṃ kathayāmaḥ paramātmasaṃvide
- 2
अनन्तराह्निकोक्ते ऽस्मिन्स्वभावे पारमेश्वरे
प्रविविक्षुर्विकल्पस्य कुर्यात्संस्कारमञ्जसा
anantarāhnikokte 'sminsvabhāve pārameśvare
pravivikṣurvikalpasya kuryātsaṃskāramañjasā
- 3
विकल्पः संस्कृतः सूते विकल्पं स्वात्मसंस्कृतम्
स्वतुल्यं सो ऽपि सो ऽप्यन्यं सो ऽप्यन्यं सदृशात्मकम्
vikalpaḥ saṃskṛtaḥ sūte vikalpaṃ svātmasaṃskṛtam
svatulyaṃ so 'pi so 'pyanyaṃ so 'pyanyaṃ sadṛśātmakam
- 4
चतुर्ष्वेव विकल्पेषु यः संस्कारः क्रमादसौ
अस्फुटः स्फुटताभावी प्रस्फुटन्स्फुटितात्मकः
caturṣveva vikalpeṣu yaḥ saṃskāraḥ kramādasau
asphuṭaḥ sphuṭatābhāvī prasphuṭansphuṭitātmakaḥ
- 5
ततः स्फुटतरो यावदन्ते स्फुटतमो भवेत्
अस्फुटादौ विकल्पे च भेदो ऽप्यस्त्यान्तरालिकः
tataḥ sphuṭataro yāvadante sphuṭatamo bhavet
asphuṭādau vikalpe ca bhedo 'pyastyāntarālikaḥ
- 6
ततः स्फुटतमोदारताद्रूप्यपरिबृंहिता
संविदभ्येति विमलामविकल्पस्वरूपताम्
tataḥ sphuṭatamodāratādrūpyaparibṛṃhitā
saṃvidabhyeti vimalāmavikalpasvarūpatām
- 7
अतश्च भैरवीयं यत्तेजः संवित्स्वभावकम्
भूयो भूयो विमृशतां जायते तत्स्फुटात्मता
ataśca bhairavīyaṃ yattejaḥ saṃvitsvabhāvakam
bhūyo bhūyo vimṛśatāṃ jāyate tatsphuṭātmatā
- 8
ननु संवित्पराम्रष्ट्री परामर्शमयी स्वतः
परामृश्या कथं ताथारूप्यसृष्टौ तु सा जडा
nanu saṃvitparāmraṣṭrī parāmarśamayī svataḥ
parāmṛśyā kathaṃ tāthārūpyasṛṣṭau tu sā jaḍā
- 9
उच्यते स्वात्मसंवित्तिः स्वभावादेव निर्भरा
नास्यामपास्यं नाधेयं किंचिदित्युदितं पुरा
ucyate svātmasaṃvittiḥ svabhāvādeva nirbharā
nāsyāmapāsyaṃ nādheyaṃ kiṃcidityuditaṃ purā
- 10
किंतु दुर्घटकारित्वात्स्वाच्छन्द्यान्निर्मलादसौ
स्वात्मप्रच्छादनक्रीडापण्डितः परमेश्वरः
kiṃtu durghaṭakāritvātsvācchandyānnirmalādasau
svātmapracchādanakrīḍāpaṇḍitaḥ parameśvaraḥ
- 11
अनावृत्ते स्वरूपे ऽपि यदात्माच्छादनं विभोः
सैव माया यतो भेद एतावान्विश्ववृत्तिकः
anāvṛtte svarūpe 'pi yadātmācchādanaṃ vibhoḥ
saiva māyā yato bheda etāvānviśvavṛttikaḥ
- 12
तथाभासनमेवास्य द्वैतमुक्तं महेशितुः
तद्द्वयापासनेनायं परामर्शो ऽभिधीयते
tathābhāsanamevāsya dvaitamuktaṃ maheśituḥ
taddvayāpāsanenāyaṃ parāmarśo 'bhidhīyate
- 13
दुर्भेदपादपस्यास्य मूलं कृन्तन्ति कोविदाः
धारारूढेन सत्तर्ककुठारेणेति निश्चयः
durbhedapādapasyāsya mūlaṃ kṛntanti kovidāḥ
dhārārūḍhena sattarkakuṭhāreṇeti niścayaḥ
- 14
तामेनां भावनामाहुः सर्वकामदुघां बुधाः
स्फुटयेद्वस्तु यापेतं मनोरथपदाद् अपि
tāmenāṃ bhāvanāmāhuḥ sarvakāmadughāṃ budhāḥ
sphuṭayedvastu yāpetaṃ manorathapadād api
- 15
श्रीपूर्वशास्त्रे तत्प्रोक्तं तर्को योगाङ्गमुत्तमम्
हेयाद्यालोचनात्तस्मात्तत्र यत्नः प्रशस्यते
śrīpūrvaśāstre tatproktaṃ tarko yogāṅgamuttamam
heyādyālocanāttasmāttatra yatnaḥ praśasyate
- 16
मार्गे चेतः स्थिरीभूतं हेये ऽपि विषयेच्छया
प्रेर्य तेन नयेत्तावद्यावत्पदम् अनामयम्
mārge cetaḥ sthirībhūtaṃ heye 'pi viṣayecchayā
prerya tena nayettāvadyāvatpadam anāmayam
- 17
मार्गो ऽत्र मोक्षोपायः स हेयः शास्त्रान्तरोदितः
विषिणोति निबध्नाति येच्छा नियतिसंगतम्
mārgo 'tra mokṣopāyaḥ sa heyaḥ śāstrāntaroditaḥ
viṣiṇoti nibadhnāti yecchā niyatisaṃgatam
- 18
रागतत्त्वं तयोक्तं यत्तेन तत्रानुरज्यते
यथा साम्राज्यसंभोगं दृष्ट्वादृष्ट्वाथवाधमे
rāgatattvaṃ tayoktaṃ yattena tatrānurajyate
yathā sāmrājyasaṃbhogaṃ dṛṣṭvādṛṣṭvāthavādhame
- 19
भोगे रज्येत दुर्बुद्धिस्तद्वन्मोक्षे ऽपि रागतः
स एवांशक इत्युक्तः स्वभावाख्यः स तु स्फुटम्
bhoge rajyeta durbuddhistadvanmokṣe 'pi rāgataḥ
sa evāṃśaka ityuktaḥ svabhāvākhyaḥ sa tu sphuṭam
- 20
सिद्ध्यङ्गमिति मोक्षाय प्रत्यूह इति कोविदाः
शिवशासनमाहात्म्यं विदन्नप्यत एव हि
siddhyaṅgamiti mokṣāya pratyūha iti kovidāḥ
śivaśāsanamāhātmyaṃ vidannapyata eva hi
- 21
वैष्णवाद्येषु रज्येत मूढो रागेण रञ्जितः
यतस्तावति सा तस्य वामाख्या शक्तिरैश्वरी
vaiṣṇavādyeṣu rajyeta mūḍho rāgeṇa rañjitaḥ
yatastāvati sā tasya vāmākhyā śaktiraiśvarī
- 22
पाञ्चरात्रिकवैरिञ्चसौगतादेर्विजृम्भते
दृष्टाः साम्राज्यसंभोगं निन्दन्तः के ऽपि बालिशाः
pāñcarātrikavairiñcasaugatādervijṛmbhate
dṛṣṭāḥ sāmrājyasaṃbhogaṃ nindantaḥ ke 'pi bāliśāḥ
- 23
न तु संतोषतः स्वेषु भोगेष्वाशीःप्रवर्तनात्
एवंचिद्भैरवावेशनिन्दातत्परमानसाः
na tu saṃtoṣataḥ sveṣu bhogeṣvāśīḥpravartanāt
evaṃcidbhairavāveśanindātatparamānasāḥ
- 24
भवन्त्यतिसुघोराभिः शक्तिभिः पातिता यतः
तेन शांभवमाहात्म्यं जानन्यः शासनान्तरे
bhavantyatisughorābhiḥ śaktibhiḥ pātitā yataḥ
tena śāṃbhavamāhātmyaṃ jānanyaḥ śāsanāntare
- 25
आश्वस्तो नोत्तरीतव्यं तेन भेदमहार्णवात्
श्रीकामिकायां प्रोक्तं च पाशप्रकरणे स्फुटम्
āśvasto nottarītavyaṃ tena bhedamahārṇavāt
śrīkāmikāyāṃ proktaṃ ca pāśaprakaraṇe sphuṭam
- 26
वेदसांख्यपुराणज्ञाः पाञ्चरात्रपरायणाः
ये केचिदृषयो धीराः शास्त्रान्तरपरायणाः
vedasāṃkhyapurāṇajñāḥ pāñcarātraparāyaṇāḥ
ye kecidṛṣayo dhīrāḥ śāstrāntaraparāyaṇāḥ
- 27
बौद्धार्हताद्याः सर्वे ते विद्यारागेण रञ्जिताः
मायापाशेन बद्धत्वाच्छिवदीक्षां न विन्दते
bauddhārhatādyāḥ sarve te vidyārāgeṇa rañjitāḥ
māyāpāśena baddhatvācchivadīkṣāṃ na vindate
- 28
रागशब्देन च प्रोक्तं रागतत्त्वं नियामकम्
मायीये तच्च तं तस्मिञ्छास्त्रे नियमयेदिति
rāgaśabdena ca proktaṃ rāgatattvaṃ niyāmakam
māyīye tacca taṃ tasmiñchāstre niyamayediti
- 29
मोक्षो ऽपि वैष्णवादेर्यः स्वसंकल्पेन भावितः
परप्रकृतिसायुज्यं यद्वाप्य् आनन्दरूपता
mokṣo 'pi vaiṣṇavāderyaḥ svasaṃkalpena bhāvitaḥ
paraprakṛtisāyujyaṃ yadvāpy ānandarūpatā
- 30
विशुद्धचित्तमात्रं वा दीपवत्संततिक्षयः
स सवेद्यापवेद्यात्मप्रलयाकलतामयः
viśuddhacittamātraṃ vā dīpavatsaṃtatikṣayaḥ
sa savedyāpavedyātmapralayākalatāmayaḥ

