10 shlokas
- 1
प्र त आश्विनीः पवमान धेनव इति चतुर्थस्याह्नः प्रतिपद्भवति
pra ta āśvinīḥ pavamāna dhenava iti caturthasyāhnaḥ pratipadbhavati
- 2
आप्ते त्रिरात्रे गायत्र्या रूपेण प्रयन्ति प्रति वै गायत्र्या रूपम्
āpte trirātre gāyatryā rūpeṇa prayanti prati vai gāyatryā rūpam
- 3
जगती प्रतिपद्भवति जागतम् एतद् अहर्यत्तृतीयं जगत्या एव तज्जगतीम् अभिसंक्रामन्ति
jagatī pratipadbhavati jāgatam etad aharyattṛtīyaṃ jagatyā eva tajjagatīm abhisaṃkrāmanti
- 4
यद् अतो ऽन्या प्रतिपत्स्यात्प्रतिकूलं वानुकूलं वा स्यात्
yad ato 'nyā pratipatsyātpratikūlaṃ vānukūlaṃ vā syāt
- 5
पवमानो अजीजनद् इत्य् अनुरूपो भवति
pavamāno ajījanad ity anurūpo bhavati
- 6
जनद्वद्वा एतद् अहर्यच्चतुर्थम् अन्नाद्यं जनयति विराजं जनयत्य् एकविंशं स्तोमं जनयति
janadvadvā etad aharyaccaturtham annādyaṃ janayati virājaṃ janayaty ekaviṃśaṃ stomaṃ janayati
- 7
पूर्वम् उ चैव तद्रूपम् अपरेण रूपेणानुवदति यत्पूर्वं रूपम् अपरेण रूपेणानुवदति तद् अनुरूपस्यानुरूपत्वम् अनुरूप एनं पुत्रो जायते य एवं वेद
pūrvam u caiva tadrūpam apareṇa rūpeṇānuvadati yatpūrvaṃ rūpam apareṇa rūpeṇānuvadati tad anurūpasyānurūpatvam anurūpa enaṃ putro jāyate ya evaṃ veda
- 8
स्तोत्रीयानुरूपौ तृचौ भवतः प्राणापानानाम् अवरुद्ध्यै
stotrīyānurūpau tṛcau bhavataḥ prāṇāpānānām avaruddhyai
- 9
षडृचौ भवत ऋतूनां धृत्यै
ṣaḍṛcau bhavata ṛtūnāṃ dhṛtyai
- 10
तृच उत्तमो भवति येनैव प्राणेन प्रयन्ति तम् अभ्युद्यन्त्य् एकविंश एव स्तोमो भवति प्रतिष्ठायै प्रतितिष्ठति
tṛca uttamo bhavati yenaiva prāṇena prayanti tam abhyudyanty ekaviṃśa eva stomo bhavati pratiṣṭhāyai pratitiṣṭhati

