34 shlokas
- 1
इन्द्रश्च बृहच्च समभवतां तम् इन्द्रं बृहद् एकया तन्वात्यरिच्यत तस्या अबिभेदनया माभिभविष्यतीति सो ऽब्रवीत्षोडशी ते ऽयं यज्ञक्रतुर् अस्त्व् इति स षोडश्य् अभवत्तद् अस्य जन्म
indraśca bṛhacca samabhavatāṃ tam indraṃ bṛhad ekayā tanvātyaricyata tasyā abibhedanayā mābhibhaviṣyatīti so 'bravītṣoḍaśī te 'yaṃ yajñakratur astv iti sa ṣoḍaśy abhavattad asya janma
- 2
अति श्रिया भ्रातृव्यं रिच्यते यो गायत्रीषु द्विपदासु बृहता षोडशिना स्तुते
ati śriyā bhrātṛvyaṃ ricyate yo gāyatrīṣu dvipadāsu bṛhatā ṣoḍaśinā stute
- 3
उप नो हरिभिः सुतम् इत्य् एता वै गायत्र्यो द्विपदा एतासु स्तोतव्यम्
upa no haribhiḥ sutam ity etā vai gāyatryo dvipadā etāsu stotavyam
- 4
इन्द्रः प्रजापतिम् उपाधावद्वृत्रं हनानीति तस्मा एताम् अनुष्टुभम् अपहरसं प्रायच्छत्तया नास्तृणुत यद् अस्तृतो व्यनदत्तन्नानदस्य नानदत्वम्
indraḥ prajāpatim upādhāvadvṛtraṃ hanānīti tasmā etām anuṣṭubham apaharasaṃ prāyacchattayā nāstṛṇuta yad astṛto vyanadattannānadasya nānadatvam
- 5
तं पुनर् उपाधावत्तस्मै सप्तानां होत्राणां हरो निर्माय प्रायच्छत्तम् अस्तृणुत
taṃ punar upādhāvattasmai saptānāṃ hotrāṇāṃ haro nirmāya prāyacchattam astṛṇuta
- 6
स्तृणुते तं यं तुस्तूर्षते य एवं वेद
stṛṇute taṃ yaṃ tustūrṣate ya evaṃ veda
- 7
तस्माद्धरिवतीषु स्तुवन्ति हरिवतीः शंसन्ति हरिवतीषु ग्रहो गृह्यते हरो ह्य् अस्मै निर्माय प्रायच्छत्
tasmāddharivatīṣu stuvanti harivatīḥ śaṃsanti harivatīṣu graho gṛhyate haro hy asmai nirmāya prāyacchat
- 8
एकविंशायतनो वा एष यत्षोडशी सप्त हि प्रातस्सवने होत्रा वषट्कुर्वन्ति सप्त माध्यन्दिने सवने सप्त तृतीयसवने
ekaviṃśāyatano vā eṣa yatṣoḍaśī sapta hi prātassavane hotrā vaṣaṭkurvanti sapta mādhyandine savane sapta tṛtīyasavane
- 9
गौरीवितं भवति
gaurīvitaṃ bhavati
- 10
गौरीवितिर्वा एतच्छाक्त्यो ब्रह्मणो ऽतिरिक्तम् अपश्यत्तद्गौरीवितम् अभवद् अतिरिक्तं एतद् अतिरिक्तेन स्तुवन्ति यद्गौरीवितेन षोडशिनं श्वस्तनवान्भवत्य् अपि प्रजाया उपकॢप्तः
gaurīvitirvā etacchāktyo brahmaṇo 'tiriktam apaśyattadgaurīvitam abhavad atiriktaṃ etad atiriktena stuvanti yadgaurīvitena ṣoḍaśinaṃ śvastanavānbhavaty api prajāyā upakḷptaḥ
- 11
विशालं लिबुजया भूत्याभ्यधाद् इति होवाचोपोदितिर्गोपालेयो ऽनुष्टुभि नानदम् अकर्गौरीवितेन षोडशिनम् अस्तोष्टाञ्जसा श्रियम् उपागान्न श्रिया अवपद्यत इति
viśālaṃ libujayā bhūtyābhyadhād iti hovācopoditirgopāleyo 'nuṣṭubhi nānadam akargaurīvitena ṣoḍaśinam astoṣṭāñjasā śriyam upāgānna śriyā avapadyata iti
- 12
एष वै विशालं लिबुजया भूत्याभिदधाति यो ऽनुष्टुभि नानदं कृत्वा गौरीवितेन षोडशिना स्तुते ऽञ्जसा श्रियम् उपैति न श्रिया अवपद्यते
eṣa vai viśālaṃ libujayā bhūtyābhidadhāti yo 'nuṣṭubhi nānadaṃ kṛtvā gaurīvitena ṣoḍaśinā stute 'ñjasā śriyam upaiti na śriyā avapadyate
- 13
शक्वरीषु षोडशिना स्तुवीत यः कामयेत वज्री स्याम् इति
śakvarīṣu ṣoḍaśinā stuvīta yaḥ kāmayeta vajrī syām iti
- 14
वज्रो वै षोडशी वज्रः शक्वर्यो वज्रेणैवास्मै वज्रं स्पृणोति वज्री भवति
vajro vai ṣoḍaśī vajraḥ śakvaryo vajreṇaivāsmai vajraṃ spṛṇoti vajrī bhavati
- 15
अनुष्टुप्सु षोडशिना स्तुवीत यः कामयेत न मा वाग् अतिवदेत्
anuṣṭupsu ṣoḍaśinā stuvīta yaḥ kāmayeta na mā vāg ativadet
- 16
वज्रो वै षोडशी वाग् अनुष्टुब्वज्रेणैवास्मै वाचं स्पृणोति नैनं वाग् अतिवदति
vajro vai ṣoḍaśī vāg anuṣṭubvajreṇaivāsmai vācaṃ spṛṇoti nainaṃ vāg ativadati
- 17
असावि सोम इन्द्र त इत्य् एतासु स्तोतव्यम्
asāvi soma indra ta ity etāsu stotavyam
- 18
विराट्स्व् अन्नाद्यकामः षोडशिना स्तुवीत वज्रो वै षोडशी वैराजम् अन्नं वज्रेणैवास्मा अन्नं स्पृणोत्य् अन्नादो भवति
virāṭsv annādyakāmaḥ ṣoḍaśinā stuvīta vajro vai ṣoḍaśī vairājam annaṃ vajreṇaivāsmā annaṃ spṛṇoty annādo bhavati
- 19
प्र वो महे महे वृधे भरध्वम् इत्य् एतासु स्तोतव्यम्
pra vo mahe mahe vṛdhe bharadhvam ity etāsu stotavyam
- 20
त्रयस्त्रिंशदक्षरा वा एता विराजो यद् एकविंशतिः प्रतिष्ठा सा यद्द्वादश प्रजातिः सा
trayastriṃśadakṣarā vā etā virājo yad ekaviṃśatiḥ pratiṣṭhā sā yaddvādaśa prajātiḥ sā
- 21
प्रतिष्ठाय प्रजायते नो चान्तस्थायां जीयते य एवं वेद
pratiṣṭhāya prajāyate no cāntasthāyāṃ jīyate ya evaṃ veda
- 22
अथ वा एता एकपदास्त्र्यक्षरा विष्णोश्छन्दो भुरिजः शक्वर्यः
atha vā etā ekapadāstryakṣarā viṣṇośchando bhurijaḥ śakvaryaḥ
- 23
एताभिर्वा इन्द्रो वृत्रम् अहन्क्षिप्रं वा एताभिः पाप्मानं हन्ति क्षिप्रं वसीयान्भवति
etābhirvā indro vṛtram ahankṣipraṃ vā etābhiḥ pāpmānaṃ hanti kṣipraṃ vasīyānbhavati
- 24
चतुस्त्रिंशदक्षराः संस्तुतो भवति त्रयस्त्रिंशद्देवताः प्रजापतिश्चतुस्त्रिंशो देवतानां प्रजापतिम् एवोपयन्त्य् अरिष्ट्यै
catustriṃśadakṣarāḥ saṃstuto bhavati trayastriṃśaddevatāḥ prajāpatiścatustriṃśo devatānāṃ prajāpatim evopayanty ariṣṭyai
- 25
हिरण्यं संप्रदायं षोडशिना स्तुवते ज्योतिष्मान् अस्य षोडशी भवति
hiraṇyaṃ saṃpradāyaṃ ṣoḍaśinā stuvate jyotiṣmān asya ṣoḍaśī bhavati
- 26
अश्वः कृष्ण उपतिष्ठति साम्येक्ष्याय भ्रातृव्यलोकम् एव स विधमंस्तिष्ठति
aśvaḥ kṛṣṇa upatiṣṭhati sāmyekṣyāya bhrātṛvyalokam eva sa vidhamaṃstiṣṭhati
- 27
एकाक्षरं वै देवानाम् अवमं छन्द आसीत्सप्ताक्षरं परमं नवाक्षरम् असुराणाम् अवमं छन्द आसीत्पञ्चदशाक्षरं परमं देवाश्च वा असुराश्चास्पर्धन्त तान्प्रजापतिर् आनुष्टुभो भूत्वान्तरातिष्ठत्तं देवासुरा व्यह्वयन्त स देवान् उपावर्तत ततो देवा अभवन्परासुराः
ekākṣaraṃ vai devānām avamaṃ chanda āsītsaptākṣaraṃ paramaṃ navākṣaram asurāṇām avamaṃ chanda āsītpañcadaśākṣaraṃ paramaṃ devāśca vā asurāścāspardhanta tānprajāpatir ānuṣṭubho bhūtvāntarātiṣṭhattaṃ devāsurā vyahvayanta sa devān upāvartata tato devā abhavanparāsurāḥ
- 28
भवत्य् आत्मना परास्य भ्रातृव्यो भवति य एवं वेद
bhavaty ātmanā parāsya bhrātṛvyo bhavati ya evaṃ veda
- 29
ते देवा असुराणाम् एकाक्षरेणैव पञ्चदशाक्षरम् अवृञ्जत द्व्यक्षरेण चतुर्दशाक्षरं त्र्यक्षरेण त्रयोदशाक्षरं चतुरक्षरेण द्वादशाक्षरं पञ्चाक्षरेणैकादशाक्षरं षडक्षरेण दशाक्षरं सप्ताक्षरेण नवाक्षरम् अष्टाभिर् एवाष्टाव् अवृञ्जत
te devā asurāṇām ekākṣareṇaiva pañcadaśākṣaram avṛñjata dvyakṣareṇa caturdaśākṣaraṃ tryakṣareṇa trayodaśākṣaraṃ caturakṣareṇa dvādaśākṣaraṃ pañcākṣareṇaikādaśākṣaraṃ ṣaḍakṣareṇa daśākṣaraṃ saptākṣareṇa navākṣaram aṣṭābhir evāṣṭāv avṛñjata
- 30
एवम् एव भ्रातृव्याद्भूतिं वृङ्क्ते य एवं वेद
evam eva bhrātṛvyādbhūtiṃ vṛṅkte ya evaṃ veda

