25 shlokas
- 1
पिबा सोमम् इन्द्र मन्दतु त्वा यं ते सुषाव हर्यश्वाद्रिः सोतुर्बाहुभ्यां सुयतो ऽनार्वेत्य् आयतम् इव वै चतुर्थम् अहस्तस्यैव यत्यै
pibā somam indra mandatu tvā yaṃ te suṣāva haryaśvādriḥ soturbāhubhyāṃ suyato 'nārvety āyatam iva vai caturtham ahastasyaiva yatyai
- 2
विश्वाः पृतना अभिभूतरं नर इत्य् अतिजगती वर्षीयश्छन्द आक्रमते ऽनपभ्रंशाय
viśvāḥ pṛtanā abhibhūtaraṃ nara ity atijagatī varṣīyaśchanda ākramate 'napabhraṃśāya
- 3
अपभ्रंश इव वा एष यज्ज्यायसश्छन्दसः कनीयश्छन्द उपैति यद् एषा चतुर्थे ऽहन्य् अतिजगती क्रियते ऽनपभ्रंशाय
apabhraṃśa iva vā eṣa yajjyāyasaśchandasaḥ kanīyaśchanda upaiti yad eṣā caturthe 'hany atijagatī kriyate 'napabhraṃśāya
- 4
यो राजा चर्षणीनाम् इति
yo rājā carṣaṇīnām iti
- 5
राज्ये ह्य् एतर्हि वाचो ऽगच्छन्राज्यम् एवैतया यजमानं गमयन्ति
rājye hy etarhi vāco 'gacchanrājyam evaitayā yajamānaṃ gamayanti
- 6
छन्दोभिर्वै देवा आदित्यं स्वर्गं लोकम् अहरन्स नाध्रियत तं वैराजस्य निधनेनादृंहंस्तस्मात्पराङ्चार्वाङ्चादित्यस्तपति पराङ्चार्वाङ्चेकारः
chandobhirvai devā ādityaṃ svargaṃ lokam aharansa nādhriyata taṃ vairājasya nidhanenādṛṃhaṃstasmātparāṅcārvāṅcādityastapati parāṅcārvāṅcekāraḥ
- 7
प्रस्तावं प्रस्तुत्य विष्टम्भान्विष्टभ्नोति मुखत एव तद् अन्नाद्यं धत्ते मुखं हि साम्नः प्रस्तावः
prastāvaṃ prastutya viṣṭambhānviṣṭabhnoti mukhata eva tad annādyaṃ dhatte mukhaṃ hi sāmnaḥ prastāvaḥ
- 8
दशकृत्वो विष्टभ्नोति दशाक्षरा विराड्वैराजम् अन्नम् अन्नाद्यस्यावरुद्ध्यै
daśakṛtvo viṣṭabhnoti daśākṣarā virāḍvairājam annam annādyasyāvaruddhyai
- 9
त्रिंशत्कृत्वो विष्टभ्नोति भूयसो ऽन्नाद्यस्यावरुद्ध्यै
triṃśatkṛtvo viṣṭabhnoti bhūyaso 'nnādyasyāvaruddhyai
- 10
वैराजं साम भवति विराट्सु स्तुवन्ति वैराजा विष्टम्भाः समीचीर्विराजो दधात्य् अन्नाद्याय
vairājaṃ sāma bhavati virāṭsu stuvanti vairājā viṣṭambhāḥ samīcīrvirājo dadhāty annādyāya
- 11
अनुतुन्नं गायति रेतोधेयायानुतुन्नाद्धि रेतो धीयते
anutunnaṃ gāyati retodheyāyānutunnāddhi reto dhīyate
- 12
दक्षिण ऊराव् उद्गातुर् अग्निं मन्थन्ति दक्षिणतो हि रेतः सिच्यते
dakṣiṇa ūrāv udgātur agniṃ manthanti dakṣiṇato hi retaḥ sicyate
- 13
उपाकृते ऽहिङ्कृते मन्थन्ति जातम् अभिहिङ्करोति
upākṛte 'hiṅkṛte manthanti jātam abhihiṅkaroti
- 14
तस्माज्जातं पुत्रं पशवो ऽभिहिङ्कुर्वन्ति
tasmājjātaṃ putraṃ paśavo 'bhihiṅkurvanti
- 15
तस्मै जातायामीमांसन्त गार्हपत्ये प्रहरामा३ आग्नीध्रा३ आहवनीया३ इति
tasmai jātāyāmīmāṃsanta gārhapatye praharāmā3 āgnīdhrā3 āhavanīyā3 iti
- 16
आहवनीये प्रहरन्त्य् एतदायतनो वै यजमानो यदाहवनीये स्वम् एव तद् आयतनं ज्योतिष्मत्करोति
āhavanīye praharanty etadāyatano vai yajamāno yadāhavanīye svam eva tad āyatanaṃ jyotiṣmatkaroti
- 17
ज्योतिष्मान्ब्रह्मवर्चसी भवति य एवं वेद
jyotiṣmānbrahmavarcasī bhavati ya evaṃ veda
- 18
अभिजुहोति शान्त्या आज्येनाभिजुहोति तेजो वा आज्यं तेज एव तद् आत्मन्धत्ते
abhijuhoti śāntyā ājyenābhijuhoti tejo vā ājyaṃ teja eva tad ātmandhatte
- 19
प्रेद्धो अग्ने दीदिहि पुरो न इति विराजाभिजुहोत्य् अन्नं विराड् अन्नाद्यस्यावरुद्ध्यै
preddho agne dīdihi puro na iti virājābhijuhoty annaṃ virāḍ annādyasyāvaruddhyai
- 20
त्रैशोकं ब्रह्मसाम भवति
traiśokaṃ brahmasāma bhavati
- 21
अतिजगतीषु स्तुवन्त्य् अह्न उत्क्रान्त्या उद्वा एतेनाह्ना क्रामन्ति
atijagatīṣu stuvanty ahna utkrāntyā udvā etenāhnā krāmanti
- 22
दिवेति निधनम् उपयन्ति पाप्मनो ऽपहत्या अप पाप्मानं हते त्रैशोकेन तुष्टुवानः
diveti nidhanam upayanti pāpmano 'pahatyā apa pāpmānaṃ hate traiśokena tuṣṭuvānaḥ
- 23
भारद्वाजस्य पृश्न्य् अछावाकसाम भवति
bhāradvājasya pṛśny achāvākasāma bhavati
- 24
अन्नं वै देवाः पृश्नीति वदन्त्य् अन्नाद्यस्यावरुद्ध्यै
annaṃ vai devāḥ pṛśnīti vadanty annādyasyāvaruddhyai
- 25
इडाभिर् ऐडं तथा ह्य् एतस्याह्नो रूपं स्तोमः
iḍābhir aiḍaṃ tathā hy etasyāhno rūpaṃ stomaḥ

