23 shlokas
- 1
उच्चा ते जातम् अन्धस इति गायत्री भवति
uccā te jātam andhasa iti gāyatrī bhavati
- 2
उद्वद्वा एतद् अहर्यत्तृतीयं तद् एव तद् अभिवदति
udvadvā etad aharyattṛtīyaṃ tad eva tad abhivadati
- 3
अन्धस्वती भवत्य् अहर्वा अन्धो ऽह्न आरम्भः
andhasvatī bhavaty aharvā andho 'hna ārambhaḥ
- 4
अभि सोमास आयव इति
abhi somāsa āyava iti
- 5
अभीति रथन्तरस्य रूपं बृहद् इति बृहत उभयोः सह रूपम् उपैत्युभौ हि वर्णावेतद् अहः
abhīti rathantarasya rūpaṃ bṛhad iti bṛhata ubhayoḥ saha rūpam upaityubhau hi varṇāvetad ahaḥ
- 6
तिस्रो वाच ईरयति प्रवह्निर् इति तृतीयस्याह्नो रूपं तेन तृतीयम् अहर् आरभन्ते
tisro vāca īrayati pravahnir iti tṛtīyasyāhno rūpaṃ tena tṛtīyam ahar ārabhante
- 7
त्रिष्टुभः सत्यो जगत्यो रूपेण जागतं ह्येतद् अहः
triṣṭubhaḥ satyo jagatyo rūpeṇa jāgataṃ hyetad ahaḥ
- 8
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 9
वैष्टम्भं भवति
vaiṣṭambhaṃ bhavati
- 10
अहर्वा एतद् अव्लीयत तद्देवा वैष्टम्भैर्व्यष्टभ्नुवंस्तद्वैष्टम्भस्य वैष्टम्भत्वम्
aharvā etad avlīyata taddevā vaiṣṭambhairvyaṣṭabhnuvaṃstadvaiṣṭambhasya vaiṣṭambhatvam
- 11
दिश इति निधनम् उपयन्ति दिशां धृत्यै
diśa iti nidhanam upayanti diśāṃ dhṛtyai
- 12
पौरूमद्गं भवति
paurūmadgaṃ bhavati
- 13
अहर्वा एतद् अव्लीयमानं तद्रक्षांस्य् अन्वसचन्त तस्माद्देवाः पौरूमद्गेन रक्षांस्यपाघ्नन्न् अप पाप्मानं हते पौरूमद्गेन तुष्टुवानः
aharvā etad avlīyamānaṃ tadrakṣāṃsy anvasacanta tasmāddevāḥ paurūmadgena rakṣāṃsyapāghnann apa pāpmānaṃ hate paurūmadgena tuṣṭuvānaḥ
- 14
देवाश्च वासुराश्चास्पर्धन्त ते देवा असुराणां पौरूमद्गेन पुरो ऽमज्जयन्यत्पुरो ऽमज्जयंस्तस्मात्पौरूमद्गं पाप्मानम् एवैतेन भ्रातृव्यं मज्जयति
devāśca vāsurāścāspardhanta te devā asurāṇāṃ paurūmadgena puro 'majjayanyatpuro 'majjayaṃstasmātpaurūmadgaṃ pāpmānam evaitena bhrātṛvyaṃ majjayati
- 15
गौतमं भवति
gautamaṃ bhavati
- 16
यद् एव गौतमस्य ब्राह्मणम्
yad eva gautamasya brāhmaṇam
- 17
उभयतःस्तोभं तथा ह्य् एतस्याह्नो रूपम्
ubhayataḥstobhaṃ tathā hy etasyāhno rūpam
- 18
अन्तरिक्षं भवति
antarikṣaṃ bhavati
- 19
अन्तरिक्षदेवत्यम् एतद् अहर्यत्तृतीयम् अन्तरिक्ष एव तद् अन्तरिक्षेण स्तुवते प्रतिष्ठायै
antarikṣadevatyam etad aharyattṛtīyam antarikṣa eva tad antarikṣeṇa stuvate pratiṣṭhāyai
- 20
आष्कारणिधनं काण्वं भवति
āṣkāraṇidhanaṃ kāṇvaṃ bhavati
- 21
अस् इति वै राथन्तरं रूपं हस् इति बार्हतं तृतीयम् एव तद्रूपम् उपयन्ति समृद्ध्यै
as iti vai rāthantaraṃ rūpaṃ has iti bārhataṃ tṛtīyam eva tadrūpam upayanti samṛddhyai
- 22
अङ्गिरसां संक्रोशो भवति
aṅgirasāṃ saṃkrośo bhavati
- 23
एतेन वा अङ्गिरसः संक्रोशमानाः स्वर्गं लोकम् आपन्स्वर्गस्य लोकस्यानुख्यात्यै स्वर्गाल्लोकान्न च्यवते तुष्टुवानः स्तोमः
etena vā aṅgirasaḥ saṃkrośamānāḥ svargaṃ lokam āpansvargasya lokasyānukhyātyai svargāllokānna cyavate tuṣṭuvānaḥ stomaḥ

