27 shlokas
- 1
यद्द्याव इन्द्र ते शतम् इति शतवत्यो भवन्ति
yaddyāva indra te śatam iti śatavatyo bhavanti
- 2
शतवद्वै पशूनां रूपं सहस्रवत्पशूनाम् एवैताभी रूपम् अवरुन्द्धे
śatavadvai paśūnāṃ rūpaṃ sahasravatpaśūnām evaitābhī rūpam avarunddhe
- 3
वयं घ त्वा सुतावन्त इति सतोबृहत्यो वर्षीयश्छन्द आक्रमते ऽनपभ्रंशाय
vayaṃ gha tvā sutāvanta iti satobṛhatyo varṣīyaśchanda ākramate 'napabhraṃśāya
- 4
तरणिर् इत्सिषासति वाजं पुरन्ध्या युजा आ व इन्द्रं पुरुहूतं नमे गिरेत्य् आवद् अक्षरम् उद्धतम् इव वै तृतीयम् अहर्यद् एतद् आवदक्षरं भवत्य् अहर् एवैतेन प्रतिष्ठापयति
taraṇir itsiṣāsati vājaṃ purandhyā yujā ā va indraṃ puruhūtaṃ name girety āvad akṣaram uddhatam iva vai tṛtīyam aharyad etad āvadakṣaraṃ bhavaty ahar evaitena pratiṣṭhāpayati
- 5
पञ्चनिधनं वैरूपं पृष्ठं भवति दिशां धृत्यै
pañcanidhanaṃ vairūpaṃ pṛṣṭhaṃ bhavati diśāṃ dhṛtyai
- 6
पञ्चपदा पङ्क्तिः पाङ्क्तम् अन्नम् अन्नाद्यस्यावरुद्ध्यै
pañcapadā paṅktiḥ pāṅktam annam annādyasyāvaruddhyai
- 7
दिशां वा एतत्साम यद्वैरूपं दिशो ह्य् एवैतेनाभिवदति
diśāṃ vā etatsāma yadvairūpaṃ diśo hy evaitenābhivadati
- 8
अथ यत्पञ्चनिधनं तेनर्तूनां पञ्च ह्य् ऋतवः
atha yatpañcanidhanaṃ tenartūnāṃ pañca hy ṛtavaḥ
- 9
ऋतुभिश्च वा इमे लोका दिग्भिश्चावृतास्तेष्व् एवोभयेषु यजमानं प्रतिष्ठापयति यजमानं वा अनुप्रतितिष्ठन्तम् उद्गाता प्रतितिष्ठति य एवं विद्वान्वैरूपेणोद्गायति
ṛtubhiśca vā ime lokā digbhiścāvṛtāsteṣv evobhayeṣu yajamānaṃ pratiṣṭhāpayati yajamānaṃ vā anupratitiṣṭhantam udgātā pratitiṣṭhati ya evaṃ vidvānvairūpeṇodgāyati
- 10
दिग्वद्भवति भ्रातृव्यस्यापनुत्त्यै
digvadbhavati bhrātṛvyasyāpanuttyai
- 11
दिशं विशम् इति निधनम् उपयन्ति दिशां धृत्यै
diśaṃ viśam iti nidhanam upayanti diśāṃ dhṛtyai
- 12
हस् इत्य् उपरिष्टाद्दिशां निधनम् उपयन्ति तेन बार्हतम्
has ity upariṣṭāddiśāṃ nidhanam upayanti tena bārhatam
- 13
राथन्तरो वा अयं लोको बार्हतो ऽसाव् उभे एव तद्बृहद्रथन्तरयो रूपेणापराध्नोति
rāthantaro vā ayaṃ loko bārhato 'sāv ubhe eva tadbṛhadrathantarayo rūpeṇāparādhnoti
- 14
अनड्वाहौ वा एतौ देवयानौ यजमानस्य यद्बृहद्रथन्तरे ताव् एव तद्युनक्ति स्वर्गस्य लोकस्य समष्ट्यै
anaḍvāhau vā etau devayānau yajamānasya yadbṛhadrathantare tāv eva tadyunakti svargasya lokasya samaṣṭyai
- 15
अश्ववद्भवति प्रजात्यै
aśvavadbhavati prajātyai
- 16
यथा मण्डूक आट्करोत्य् एवं निधनम् उपयन्त्य् अयातयामतायै
yathā maṇḍūka āṭkaroty evaṃ nidhanam upayanty ayātayāmatāyai
- 17
द्वादश वैरूपाणि भवन्ति द्वादशमासाः संवत्सरः संवत्सर एव प्रतितिष्ठति
dvādaśa vairūpāṇi bhavanti dvādaśamāsāḥ saṃvatsaraḥ saṃvatsara eva pratitiṣṭhati
- 18
विरूपः संवत्सरो विरूपम् अन्नम् अन्नाद्यस्यावरुद्ध्यै
virūpaḥ saṃvatsaro virūpam annam annādyasyāvaruddhyai
- 19
महावैष्टम्भं ब्रह्मसाम भवत्य् अन्नाद्यस्यावरुद्ध्यै
mahāvaiṣṭambhaṃ brahmasāma bhavaty annādyasyāvaruddhyai
- 20
यदा वै पुरुषो ऽन्नम् अत्त्य् अथान्तरतो विष्टब्धः
yadā vai puruṣo 'nnam atty athāntarato viṣṭabdhaḥ
- 21
दिश इति निधनम् उपयन्ति दिशां धृत्यै
diśa iti nidhanam upayanti diśāṃ dhṛtyai
- 22
सतोबृहतीषु स्तुवन्ति पूर्वयोर् अह्नोः प्रत्युद्यमाय
satobṛhatīṣu stuvanti pūrvayor ahnoḥ pratyudyamāya
- 23
रौरवम् अच्छावाकसाम भवति
rauravam acchāvākasāma bhavati
- 24
अग्निर्वै रूरो रुद्रो ऽग्निः
agnirvai rūro rudro 'gniḥ
- 25
अग्निर्वा एतस्य पशून् अपक्रमयति यस्य पशवो ऽपक्रामन्त्य् अग्निर् एव तस्य पशून् अभिक्रमयति यस्य पशवो ऽभिक्रामन्ति
agnirvā etasya paśūn apakramayati yasya paśavo 'pakrāmanty agnir eva tasya paśūn abhikramayati yasya paśavo 'bhikrāmanti
- 26
अभ्य् अभ्य् एवास्य पशवः क्रामन्ति य एवं विद्वान्रौरवेण स्तुवते
abhy abhy evāsya paśavaḥ krāmanti ya evaṃ vidvānrauraveṇa stuvate
- 27
परिष्टुब्धेडं तथा ह्य् एतस्याह्नो रूपं स्तोमः
pariṣṭubdheḍaṃ tathā hy etasyāhno rūpaṃ stomaḥ

