26 shlokas
- 1
परि प्रिया दिवः कविर् इति परिवत्यो भवन्त्य् अन्तो वै चतुर्थम् अहस्तस्यैताः पर्याप्त्यै
pari priyā divaḥ kavir iti parivatyo bhavanty anto vai caturtham ahastasyaitāḥ paryāptyai
- 2
त्वं ह्य् अङ्ग दैव्येति त्वम् इति बृहतो रूपं बार्हतं ह्य् एतद् अहः
tvaṃ hy aṅga daivyeti tvam iti bṛhato rūpaṃ bārhataṃ hy etad ahaḥ
- 3
सोमः पुनान ऊर्मिणाव्यवारं विधावति अग्रे वाचः पवमानः कनिक्रदद् इति
somaḥ punāna ūrmiṇāvyavāraṃ vidhāvati agre vācaḥ pavamānaḥ kanikradad iti
- 4
अग्रं ह्य् एतर्हि वाचो ऽगच्छन्न् अग्रम् एवैतया यजमानं गमयन्ति
agraṃ hy etarhi vāco 'gacchann agram evaitayā yajamānaṃ gamayanti
- 5
पुरोजिती वो अन्धस इति विराजौ वैराजं ह्य् एतद् अहः
purojitī vo andhasa iti virājau vairājaṃ hy etad ahaḥ
- 6
सोमः पवते जनिता मतीनाम् इति प्रातस्सवने षोडशिनं गृहीतं तं तृतीयसवने प्रजनयन्ति
somaḥ pavate janitā matīnām iti prātassavane ṣoḍaśinaṃ gṛhītaṃ taṃ tṛtīyasavane prajanayanti
- 7
त्रिष्टुभः सत्यो जगत्यो रूपेण तस्माज्जगतीनां लोके क्रियन्ते
triṣṭubhaḥ satyo jagatyo rūpeṇa tasmājjagatīnāṃ loke kriyante
- 8
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 9
और्णायवं भवति
aurṇāyavaṃ bhavati
- 10
अङ्गिरसो वै सत्त्रम् आसत तेषाम् आप्तः स्पृतः स्वर्गो लोक आसीत्पन्थानं तु देवयानं न प्राजानंस्तेषां कल्याण आङ्गिरसो ध्यायम् उदव्रजत्स ऊर्णायुं गन्धर्वम् अप्सरसां मध्ये प्रेङ्खयमाणम् उपैत्स इयाम् इति यां याम् अभ्यदिशत्सैनम् अकामयत तम् अभ्यवदत्कल्याणा३ इत्य् आप्तो वै वः स्पृतः स्वर्गो लोकः पन्थानं तु देवयानं न प्रजानीथेदं साम स्वर्ग्यं तेन स्तुत्वा स्वर्गं लोकम् एष्य् अथ मा तु वोचो ऽहम् अदर्शम् इति
aṅgiraso vai sattram āsata teṣām āptaḥ spṛtaḥ svargo loka āsītpanthānaṃ tu devayānaṃ na prājānaṃsteṣāṃ kalyāṇa āṅgiraso dhyāyam udavrajatsa ūrṇāyuṃ gandharvam apsarasāṃ madhye preṅkhayamāṇam upaitsa iyām iti yāṃ yām abhyadiśatsainam akāmayata tam abhyavadatkalyāṇā3 ity āpto vai vaḥ spṛtaḥ svargo lokaḥ panthānaṃ tu devayānaṃ na prajānīthedaṃ sāma svargyaṃ tena stutvā svargaṃ lokam eṣy atha mā tu voco 'ham adarśam iti
- 11
स ऐत्कल्याणः सो ऽब्रवीद् आप्तो वै नः स्पृतः स्वर्गो लोकः पन्थानं तु देवयानं न प्रजानीम इदं साम स्वर्ग्यं तेन स्तुत्वा स्वर्गं लोकम् एष्याम इति कस्ते ऽवोचद् इत्य् अहम् एवादर्शम् इति तेन स्तुत्वा स्वर्गं लोकम् आयन्न् अहीयत कल्याणो ऽनृतं हि सो ऽवदत्स एषः श्वित्रः
sa aitkalyāṇaḥ so 'bravīd āpto vai naḥ spṛtaḥ svargo lokaḥ panthānaṃ tu devayānaṃ na prajānīma idaṃ sāma svargyaṃ tena stutvā svargaṃ lokam eṣyāma iti kaste 'vocad ity aham evādarśam iti tena stutvā svargaṃ lokam āyann ahīyata kalyāṇo 'nṛtaṃ hi so 'vadatsa eṣaḥ śvitraḥ
- 12
स्वर्ग्यं वा एतत्साम स्वर्गलोकः पुण्यलोको भवत्य् और्णायवेन तुष्टुवानः
svargyaṃ vā etatsāma svargalokaḥ puṇyaloko bhavaty aurṇāyavena tuṣṭuvānaḥ
- 13
बृहत्कं भवति
bṛhatkaṃ bhavati
- 14
सामार्षेयेण प्रशस्तं त्वं हीत्य् अन्नाद्यस्यावरुद्ध्यै हीति वा अन्नं प्रदीयते षोडशिनम् उ चैवैतेनोद्यच्छति
sāmārṣeyeṇa praśastaṃ tvaṃ hīty annādyasyāvaruddhyai hīti vā annaṃ pradīyate ṣoḍaśinam u caivaitenodyacchati
- 15
आतीषादीयं भवति
ātīṣādīyaṃ bhavati
- 16
आयुर्वा आतीषादीयम् आयुषो ऽवरुद्ध्यै
āyurvā ātīṣādīyam āyuṣo 'varuddhyai
- 17
आ तमितोर्निधनम् उपयन्त्य् आयुर् एव सर्वम् आप्नुवन्ति
ā tamitornidhanam upayanty āyur eva sarvam āpnuvanti
- 18
नानदं भवति
nānadaṃ bhavati
- 19
ज्यायोऽभ्यारम्भम् अतिहाय पञ्चमम् अहः षष्ठस्याह्न आरम्भस्तेन षष्ठम् अहर् आरभन्ते सन्तत्यै
jyāyo'bhyārambham atihāya pañcamam ahaḥ ṣaṣṭhasyāhna ārambhastena ṣaṣṭham ahar ārabhante santatyai
- 20
षोडशाक्षरेण प्रस्तौति षोडशिनम् उ चैवैतेनोद्यच्छति
ṣoḍaśākṣareṇa prastauti ṣoḍaśinam u caivaitenodyacchati
- 21
आन्धीगवं भवति
āndhīgavaṃ bhavati
- 22
पद्या वा अन्या विराड् अक्षर्यान्यास्माल्लोकात्पद्यया विराजान्नाद्यमवरुन्द्धे ऽमुष्माद् अक्षर्ययोभयोर् अनयोर्लोकयोर् अन्नाद्यम् अवरुन्द्ध आन्धीगवेन तुष्टुवानः
padyā vā anyā virāḍ akṣaryānyāsmāllokātpadyayā virājānnādyamavarunddhe 'muṣmād akṣaryayobhayor anayorlokayor annādyam avarunddha āndhīgavena tuṣṭuvānaḥ
- 23
वात्सप्रं भवति
vātsapraṃ bhavati
- 24
एतस्मिन्वै वैराजं प्रतिष्ठितं प्रतितिष्ठति वात्सप्रेण तुष्टुवानः
etasminvai vairājaṃ pratiṣṭhitaṃ pratitiṣṭhati vātsapreṇa tuṣṭuvānaḥ
- 25
वत्सप्रीर्भालन्दनः श्रद्धां नाविन्दत स तपो ऽतप्यत स एतद्वात्सप्रम् अपश्यत्स श्रद्धाम् अविन्दत श्रद्धां विन्दामहा इति वै सत्त्रम् आसते विन्दते श्रद्धाम्
vatsaprīrbhālandanaḥ śraddhāṃ nāvindata sa tapo 'tapyata sa etadvātsapram apaśyatsa śraddhām avindata śraddhāṃ vindāmahā iti vai sattram āsate vindate śraddhām
- 26
ईनिधनं तथा ह्य् एतस्याह्नो रूपं निधनान्ताः पवमाना भवन्त्य् अह्नो धृत्यै स्तोमः
īnidhanaṃ tathā hy etasyāhno rūpaṃ nidhanāntāḥ pavamānā bhavanty ahno dhṛtyai stomaḥ

