13 shlokas
- 1
प्र मंहिष्ठाय गायतेति
pra maṃhiṣṭhāya gāyateti
- 2
यद्गायतेति महस एव तद्रूपं क्रियते
yadgāyateti mahasa eva tadrūpaṃ kriyate
- 3
तं ते मदं गृणीमसीति मदवद्वै रसवत्तृतीयसवनं मदम् एव तद्रसं दधाति
taṃ te madaṃ gṛṇīmasīti madavadvai rasavattṛtīyasavanaṃ madam eva tadrasaṃ dadhāti
- 4
श्रुधी हवं तिरश्च्या इति श्रुत्या एव
śrudhī havaṃ tiraścyā iti śrutyā eva
- 5
प्रमंहिष्ठीयं भवति
pramaṃhiṣṭhīyaṃ bhavati
- 6
प्रमंहिष्ठीयेन वा इन्द्रो वृत्राय वज्रं प्रावर्तयत्तम् अस्तृणुत भ्रातृव्यवान्प्रमंहिष्ठीयेनोक्थानि प्रणयेत स्तृणुते भ्रातृव्यं वसीयान् आत्मना भवति
pramaṃhiṣṭhīyena vā indro vṛtrāya vajraṃ prāvartayattam astṛṇuta bhrātṛvyavānpramaṃhiṣṭhīyenokthāni praṇayeta stṛṇute bhrātṛvyaṃ vasīyān ātmanā bhavati
- 7
हारिवर्णं भवति
hārivarṇaṃ bhavati
- 8
इन्द्रश्च वै नमुचिश्चासुरः समदधातां न नो नक्तं न दिवा हनन्नार्द्रेण न शुष्केणेति तस्य व्युष्टायाम् अनुदित आदित्ये ऽपां फेनेन शिरो ऽछिनद् एतद्वै न नक्तं न दिवा यत्व्युष्टायाम् अनुदित आदित्य एतन्नार्द्रं न शुष्कं यद् अपां फेनस्तद् एनं पापीयं वाचं वदद् अन्ववर्तत वीरहन्नद्रुहो ऽद्रुह इति तन्नर्चा न साम्नापहन्तुम् अशक्नोत्
indraśca vai namuciścāsuraḥ samadadhātāṃ na no naktaṃ na divā hanannārdreṇa na śuṣkeṇeti tasya vyuṣṭāyām anudita āditye 'pāṃ phenena śiro 'chinad etadvai na naktaṃ na divā yatvyuṣṭāyām anudita āditya etannārdraṃ na śuṣkaṃ yad apāṃ phenastad enaṃ pāpīyaṃ vācaṃ vadad anvavartata vīrahannadruho 'druha iti tannarcā na sāmnāpahantum aśaknot
- 9
हारिवर्णस्यैव निधनेनापाहत
hārivarṇasyaiva nidhanenāpāhata
- 10
अप शुचं हते हारिवर्णस्य निधनेन श्रियं च हरश्चोपैति तुष्टुवानः
apa śucaṃ hate hārivarṇasya nidhanena śriyaṃ ca haraścopaiti tuṣṭuvānaḥ
- 11
तैरश्च्यं भवति
tairaścyaṃ bhavati
- 12
अङ्गिरसः स्वर्गं लोकं यन्तो रक्षांस्य् अन्वसचन्त तान्य् एतेन तिरश्च्याङ्गिरसस्तिर्यङ्पर्यवैद्यत्तिर्यङ्पर्यवैत्तस्मात्तैरश्च्यं पाप्मा वाव स तान् असचत तं तैरश्च्येनापाघ्नताप पाप्मानं हते तैरश्च्येन तुष्टुवानः
aṅgirasaḥ svargaṃ lokaṃ yanto rakṣāṃsy anvasacanta tāny etena tiraścyāṅgirasastiryaṅparyavaidyattiryaṅparyavaittasmāttairaścyaṃ pāpmā vāva sa tān asacata taṃ tairaścyenāpāghnatāpa pāpmānaṃ hate tairaścyena tuṣṭuvānaḥ
- 13
सप्तदश एव स्तोमो भवति प्रतिष्ठायै प्रजात्यै
saptadaśa eva stomo bhavati pratiṣṭhāyai prajātyai

