11 shlokas
- 1
दविद्युतत्या रुचेति तृतीयस्याह्नः प्रतिपद्भवति
davidyutatyā ruceti tṛtīyasyāhnaḥ pratipadbhavati
- 2
दविद्युतती वै गायत्री परिष्टोभन्ती त्रिष्टुब्गवाशीर्जगती त्रीणि रूपाणि समारभते त्रिरात्रस्याविस्रंसाय
davidyutatī vai gāyatrī pariṣṭobhantī triṣṭubgavāśīrjagatī trīṇi rūpāṇi samārabhate trirātrasyāvisraṃsāya
- 3
एते असृग्रम् इन्दव इत्य् अनुरूपो भवति
ete asṛgram indava ity anurūpo bhavati
- 4
एत इति वै प्रजापतिर्देवान् असृजतासृग्रम् इति मनुष्यान् इन्दव इति पितॄंस्तद् एव तद् अभिवदति
eta iti vai prajāpatirdevān asṛjatāsṛgram iti manuṣyān indava iti pitṝṃstad eva tad abhivadati
- 5
पूर्वम् उ चैव तद्रूपम् अपरेण रूपेणानुवदति यत्पूर्वं रूपम् अपरेण रूपेणानुवदति तद् अनुरूपस्यानुरूपत्वम् अनुरूप एनं पुत्रो जायते य एवं वेद
pūrvam u caiva tadrūpam apareṇa rūpeṇānuvadati yatpūrvaṃ rūpam apareṇa rūpeṇānuvadati tad anurūpasyānurūpatvam anurūpa enaṃ putro jāyate ya evaṃ veda
- 6
स्तोत्रीयानुरूपौ तृचौ भवतः प्राणापानानाम् अवरुद्ध्यै
stotrīyānurūpau tṛcau bhavataḥ prāṇāpānānām avaruddhyai
- 7
राजा मेधाभिर् ईयते पवमानो मनाव् अध्य् अन्तरिक्षेण यातव इति
rājā medhābhir īyate pavamāno manāv adhy antarikṣeṇa yātava iti
- 8
अन्तरिक्षदेवत्यस्तृचो भवत्य् अन्तरिक्षदेवत्यम् एतद् अहर्यत्तृतीयं तद् एव तद् अभिवदति
antarikṣadevatyastṛco bhavaty antarikṣadevatyam etad aharyattṛtīyaṃ tad eva tad abhivadati
- 9
पञ्चर्चो भवति पञ्चपदा पङ्क्तिः पाङ्क्तम् अन्नम् अन्नाद्यस्यावरुद्ध्यै
pañcarco bhavati pañcapadā paṅktiḥ pāṅktam annam annādyasyāvaruddhyai
- 10
तृच उत्तमो भवति येनैव प्राणेन प्रयन्ति तम् अभ्युपयन्ति
tṛca uttamo bhavati yenaiva prāṇena prayanti tam abhyupayanti
- 11
सप्तदश एव स्तोमो भवति प्रतिष्ठायै प्रजात्यै
saptadaśa eva stomo bhavati pratiṣṭhāyai prajātyai

