25 shlokas
- 1
तिस्रो वाच उदीरत इति तृतीयस्याह्नो रूपं तेन तृतीयम् अहर् आरभन्ते
tisro vāca udīrata iti tṛtīyasyāhno rūpaṃ tena tṛtīyam ahar ārabhante
- 2
उद्वद्वा एतत्त्रिवद् अहर्यत्तृतीयं तद् एव तद् अभिवदति
udvadvā etattrivad aharyattṛtīyaṃ tad eva tad abhivadati
- 3
आ सोता परिषिञ्चतेति परिवत्यो भवन्ति
ā sotā pariṣiñcateti parivatyo bhavanti
- 4
अन्तो वै तृतीयम् अहस्तस्यैताः पर्याप्त्यै
anto vai tṛtīyam ahastasyaitāḥ paryāptyai
- 5
सखाय आनिषीदतेत्य् उद्धतम् इव वै तृतीयम् अहर्यद् आह निषीदतेत्य् अहर् एवैतेन प्रतिष्ठापयति
sakhāya āniṣīdatety uddhatam iva vai tṛtīyam aharyad āha niṣīdatety ahar evaitena pratiṣṭhāpayati
- 6
सुतासो मधुमत्तमा इत्य् अनुष्टुभः सत्यो जगत्यो रूपेण जागतं ह्य् एतद् अहः
sutāso madhumattamā ity anuṣṭubhaḥ satyo jagatyo rūpeṇa jāgataṃ hy etad ahaḥ
- 7
पवित्रं ते विततं ब्रह्मणस्पत इति
pavitraṃ te vitataṃ brahmaṇaspata iti
- 8
विततम् इव वा इदम् अन्तरिक्षम् अन्तरेमे अन्तरिक्षदेवत्यम् एतद् अहर्यत्तृतीयं तद् एव तद् अभिवदति
vitatam iva vā idam antarikṣam antareme antarikṣadevatyam etad aharyattṛtīyaṃ tad eva tad abhivadati
- 9
गायत्रं भवति यद् एव गायत्रस्य ब्राह्मणम्
gāyatraṃ bhavati yad eva gāyatrasya brāhmaṇam
- 10
पाष्ठौहं भवति
pāṣṭhauhaṃ bhavati
- 11
पष्ठवाड्वा एतेनाङ्गिरसश्चतुर्थस्याह्नो वाचं वदन्तीम् उपाशृणोत्स हो वाग् इति निधनम् उपैत्तद् अस्याभ्युदितं तद् अहर् अवसत्
paṣṭhavāḍvā etenāṅgirasaścaturthasyāhno vācaṃ vadantīm upāśṛṇotsa ho vāg iti nidhanam upaittad asyābhyuditaṃ tad ahar avasat
- 12
वाचः साम भवति
vācaḥ sāma bhavati
- 13
वाग्वै द्वादशाहो वाच्य् एव तद्वाचा स्तुवते यज्ञस्य प्रभूत्यै
vāgvai dvādaśāho vācy eva tadvācā stuvate yajñasya prabhūtyai
- 14
निष्किरीयाः सत्त्रम् आसत ते तृतीयम् अहर्न प्राजानंस्तान् एतत्साम गायमानान्वाग् उपाप्लवत्तेन तृतीयम् अहः प्राजानंस्ते ऽब्रुवन्न् इयं वाव नस्तृतीयम् अहर् अदीदृशद् इति तृतीयस्यैवैषाह्नो दृष्टिः
niṣkirīyāḥ sattram āsata te tṛtīyam aharna prājānaṃstān etatsāma gāyamānānvāg upāplavattena tṛtīyam ahaḥ prājānaṃste 'bruvann iyaṃ vāva nastṛtīyam ahar adīdṛśad iti tṛtīyasyaivaiṣāhno dṛṣṭiḥ
- 15
शौक्तं भवति
śauktaṃ bhavati
- 16
शुक्तिर्वा एतेनाङ्गिरसो ऽञ्जसा स्वर्गं लोकम् अपश्यत्स्वर्गस्य लोकस्यानुख्यात्यै स्वर्गाल्लोकान्न च्यवते तुष्टुवानः
śuktirvā etenāṅgiraso 'ñjasā svargaṃ lokam apaśyatsvargasya lokasyānukhyātyai svargāllokānna cyavate tuṣṭuvānaḥ
- 17
गौरीवितं भवति यद् एव गौरीवितस्य ब्राह्मणम्
gaurīvitaṃ bhavati yad eva gaurīvitasya brāhmaṇam
- 18
त्वाष्ट्रीसाम भवति
tvāṣṭrīsāma bhavati
- 19
इन्द्रं वा अक्ष्यामयिणं भूतानि नास्वापयंस्तम् एतेन त्वाष्ट्र्यो ऽस्वापयंस्तद्वाव तास्तर्ह्य् अकामयन्त
indraṃ vā akṣyāmayiṇaṃ bhūtāni nāsvāpayaṃstam etena tvāṣṭryo 'svāpayaṃstadvāva tāstarhy akāmayanta
- 20
कामसनि साम त्वाष्ट्रीसाम कामम् एवैतेनावरुन्द्धे
kāmasani sāma tvāṣṭrīsāma kāmam evaitenāvarunddhe
- 21
इन्द्रो वृत्राद्बिभ्यद्गां प्राविशत्तं त्वाष्ट्र्यो ऽब्रुवञ्जनयामेति तम् एतैः सामभिर् अजनयञ्जायामहा इति वै सत्त्रम् आसते जायन्त एव
indro vṛtrādbibhyadgāṃ prāviśattaṃ tvāṣṭryo 'bruvañjanayāmeti tam etaiḥ sāmabhir ajanayañjāyāmahā iti vai sattram āsate jāyanta eva
- 22
अरिष्टं भवति
ariṣṭaṃ bhavati
- 23
देवाश्च वा असुराश्चास्पर्धन्त यं देवानाम् अघ्नन्न स समभवद्यम् असुराणां सं सो ऽभवत्ते देवास्तपो ऽतप्यन्त त एतद् अरिष्टम् अपश्यंस्ततो यं देवानाम् अघ्नत्सं सो ऽभवद्यम् असुराणां न स समभवद् अनेनारिषामेति तद् अरिष्टस्यारिष्टत्वम् अरिष्ट्या एवारिष्टम् अन्ततः क्रियते
devāśca vā asurāścāspardhanta yaṃ devānām aghnanna sa samabhavadyam asurāṇāṃ saṃ so 'bhavatte devāstapo 'tapyanta ta etad ariṣṭam apaśyaṃstato yaṃ devānām aghnatsaṃ so 'bhavadyam asurāṇāṃ na sa samabhavad anenāriṣāmeti tad ariṣṭasyāriṣṭatvam ariṣṭyā evāriṣṭam antataḥ kriyate
- 24
त्रीडं भवति त्रिरात्रस्य धृत्यै
trīḍaṃ bhavati trirātrasya dhṛtyai
- 25
द्रवन्तीम् इडाम् उत्तमाम् उपयन्ति चतुर्थस्याह्नः सन्तत्यै स्तोमः
dravantīm iḍām uttamām upayanti caturthasyāhnaḥ santatyai stomaḥ

