7 shlokas
- 1
अथ विश्वनिमित्तस्य प्राप्तं लक्षणमात्मनः
तदीशोक्तौ गतप्रायं तथाप्युद्देश उच्यते
atha viśvanimittasya prāptaṃ lakṣaṇamātmanaḥ
tadīśoktau gataprāyaṃ tathāpyuddeśa ucyate
- 2
कार्यं क्षित्यादि कर्तेशस्तत्कर्तुर्नोपयुज्यते
न स्वार्थमप्यचिद्भावान्नानर्थ्यं कर्तृगौरवात्
kāryaṃ kṣityādi karteśastatkarturnopayujyate
na svārthamapyacidbhāvānnānarthyaṃ kartṛgauravāt
- 3
पारिशेष्यात्परार्थं तत्क्षेत्रज्ञः स परस्तयोः
परो देहस्तदर्थत्वात्परार्थाः क्ष्मादयो ननु
pāriśeṣyātparārthaṃ tatkṣetrajñaḥ sa parastayoḥ
paro dehastadarthatvātparārthāḥ kṣmādayo nanu
- 4
कायो ऽप्य् अचित्त्वादान्यार्थ्यं सुतरां प्रतिपद्यते
चेतनश्चेत्न भोग्यत्वाद्विकारित्वाच्च जातुचित्
kāyo 'py acittvādānyārthyaṃ sutarāṃ pratipadyate
cetanaścetna bhogyatvādvikāritvācca jātucit
- 5
भोग्या विकारिणो दृष्टाश्चिद्विहीनाः पटादयः
यस्मिन्सति च सत्त्वाद्वा न सत्यपि शवे चितिः
bhogyā vikāriṇo dṛṣṭāścidvihīnāḥ paṭādayaḥ
yasminsati ca sattvādvā na satyapi śave citiḥ
- 6
परिणामस्य वैशिष्ट्यादस्ति चेत्न स्मृतिस्तदा
नाप्येवं सुप्रतीतत्वात्स्मर्ता कायेतरोऽस्त्यतः
pariṇāmasya vaiśiṣṭyādasti cetna smṛtistadā
nāpyevaṃ supratītatvātsmartā kāyetaro'styataḥ
- 7
नाव्यापको न क्षणिको नैको नापि जडात्मकः
नाकर्ता भिन्नचिद्योगी पाशान्ते शिवताश्रुतेः
nāvyāpako na kṣaṇiko naiko nāpi jaḍātmakaḥ
nākartā bhinnacidyogī pāśānte śivatāśruteḥ

