14 shlokas
- 1
अथोपलभ्य देहादि वस्तु कार्यत्वधर्मकम्
कर्तारम् अस्य जानीमो विशिष्टम् अनुमानतः
athopalabhya dehādi vastu kāryatvadharmakam
kartāram asya jānīmo viśiṣṭam anumānataḥ
- 2
यद्यथा यादृशं यावत्कार्यं तत्कारणं तथा
नित्यं कालानवच्छेदाद्वैतत्यान्न प्रदेशगम्
yadyathā yādṛśaṃ yāvatkāryaṃ tatkāraṇaṃ tathā
nityaṃ kālānavacchedādvaitatyānna pradeśagam
- 3
क्रमाक्रमसमुत्पत्तेः क्रमाद्युत्पत्तिशक्तिमत्
तस्यास्ति करणं येन दृष्टा नाकरणा कृतिः
kramākramasamutpatteḥ kramādyutpattiśaktimat
tasyāsti karaṇaṃ yena dṛṣṭā nākaraṇā kṛtiḥ
- 4
अनागामि च तज्ज्ञेयं कार्यस्यानादिसंस्थितेः
करणं च न शक्त्यन्यच्छक्तिर्नाचेतना चितः
anāgāmi ca tajjñeyaṃ kāryasyānādisaṃsthiteḥ
karaṇaṃ ca na śaktyanyacchaktirnācetanā citaḥ
- 5
विषयानियमादेकं बोधे कृत्ये च तत्तथा
कार्यं न स्थितिजन्मादि बीजस्य प्रकृतेरणोः
viṣayāniyamādekaṃ bodhe kṛtye ca tattathā
kāryaṃ na sthitijanmādi bījasya prakṛteraṇoḥ
- 6
पारिशेष्यान्महेशस्य मुक्तस्य शिव एव सः
सम्बन्धाग्रहणे बाधा मानस्याभ्येति कस्यचित्
pāriśeṣyānmaheśasya muktasya śiva eva saḥ
sambandhāgrahaṇe bādhā mānasyābhyeti kasyacit
- 7
सा परस्यापि धूमोऽन्यो गिरौ माहानसाद्यतः
लोके वपुष्मतो दृष्टं कृत्यं सो ऽप्य् अस्मदादिवत्
sā parasyāpi dhūmo'nyo girau māhānasādyataḥ
loke vapuṣmato dṛṣṭaṃ kṛtyaṃ so 'py asmadādivat
- 8
मूलाद्यसंभवाच्छाक्तं वपुर्नस्तादृशं प्रभोः
तद्वपुः पञ्चभिर्मन्त्रैः पञ्चकृत्योपयोगिभिः
mūlādyasaṃbhavācchāktaṃ vapurnastādṛśaṃ prabhoḥ
tadvapuḥ pañcabhirmantraiḥ pañcakṛtyopayogibhiḥ
- 9
ईशतत्पुरुषाघोरवामाजैर्मस्तकादिकम्
ईष्टे येन जगत्सर्वं गुणेनोपरिवर्तिना
īśatatpuruṣāghoravāmājairmastakādikam
īṣṭe yena jagatsarvaṃ guṇenoparivartinā
- 10
स मूर्धसमदेशत्वान्मूर्धा नावयवस्तनोः
तस्य तस्य तनुर्या पूस्तस्याम् उषति येन सः
sa mūrdhasamadeśatvānmūrdhā nāvayavastanoḥ
tasya tasya tanuryā pūstasyām uṣati yena saḥ
- 11
तत्त्राणाद्व्यञ्जनाच्चापि स तत्पुरुषवक्त्रकः
हृदयं बोधपर्यायः सो ऽस्य घोरः शिवो यतः
tattrāṇādvyañjanāccāpi sa tatpuruṣavaktrakaḥ
hṛdayaṃ bodhaparyāyaḥ so 'sya ghoraḥ śivo yataḥ
- 12
परिग्रहस्य घोरत्वाद्घोरोक्तिर् उपचारतः
वामस्त्रिवर्गवामत्वाद्रहस्यश्च स्वभावतः
parigrahasya ghoratvādghoroktir upacārataḥ
vāmastrivargavāmatvādrahasyaśca svabhāvataḥ
- 13
वामं धाम परं गुह्यं यस्यासौ वामगुह्यकः
सद्योऽणूनां मूर्तयः सम्भवन्ति यस्येच्छातस्तेन सद्योऽभिधानः
सद्यो मूर्तीर्योगिनां वा विधत्ते सद्योमूर्तिः कृत्यशैघ्र्यान्न मूर्तेः
vāmaṃ dhāma paraṃ guhyaṃ yasyāsau vāmaguhyakaḥ
sadyo'ṇūnāṃ mūrtayaḥ sambhavanti yasyecchātastena sadyo'bhidhānaḥ
sadyo mūrtīryogināṃ vā vidhatte sadyomūrtiḥ kṛtyaśaighryānna mūrteḥ
- 14
इत्थं शक्तिः कुर्वती देहकृत्यं देहाभावादुच्यते देहशब्दैः
तस्या भेदा ये ऽपि वामादयः स्युस्ते ऽपि प्रोक्ताः कृत्यभेदेन सद्भिः
itthaṃ śaktiḥ kurvatī dehakṛtyaṃ dehābhāvāducyate dehaśabdaiḥ
tasyā bhedā ye 'pi vāmādayaḥ syuste 'pi proktāḥ kṛtyabhedena sadbhiḥ

