15 shlokas
- 1
स इत्थं विग्रहोऽनेन करणेनाहतौजसा
करोति सर्वदा कृत्यं यदा यदुपपद्यते
sa itthaṃ vigraho'nena karaṇenāhataujasā
karoti sarvadā kṛtyaṃ yadā yadupapadyate
- 2
तत्रादौ केवलाणूनां योग्यानां कुरुतेऽष्टकम्
वामादिशक्तिभिर्युक्तं सप्तकोटिपरिच्छदम्
tatrādau kevalāṇūnāṃ yogyānāṃ kurute'ṣṭakam
vāmādiśaktibhiryuktaṃ saptakoṭiparicchadam
- 3
तेषामनन्तः सूक्ष्मश्च तथा चैव शिवोत्तमः
एकनेत्रैकरुद्रौ च त्रिमूर्तिश्चामितद्युतिः
teṣāmanantaḥ sūkṣmaśca tathā caiva śivottamaḥ
ekanetraikarudrau ca trimūrtiścāmitadyutiḥ
- 4
श्रीकण्ठश्च शिखण्डी च राजराजेश्वरेश्वराः
ईषद् अप्राप्तयोगत्वान्नियोज्याः परमेष्ठिनः
śrīkaṇṭhaśca śikhaṇḍī ca rājarājeśvareśvarāḥ
īṣad aprāptayogatvānniyojyāḥ parameṣṭhinaḥ
- 5
सर्वज्ञत्वादियोगेऽपि नियोज्यत्वं मलांशतः
परस्परं विशिष्यन्ते मन्त्राश्चैवम् अधः स्थिताः
sarvajñatvādiyoge'pi niyojyatvaṃ malāṃśataḥ
parasparaṃ viśiṣyante mantrāścaivam adhaḥ sthitāḥ
- 6
ते च मन्त्रेश्वरव्यक्तशिवशक्तिप्रचोदिताः
कुर्वन्त्यनुग्रहं पुंसां यदा येषां स युज्यते
te ca mantreśvaravyaktaśivaśaktipracoditāḥ
kurvantyanugrahaṃ puṃsāṃ yadā yeṣāṃ sa yujyate
- 7
प्रयोक्तृदेहसापेक्षं तदर्धमखिलेऽध्वनि
कृत्वाधिकारं स्थित्यन्ते शिवं विशति सेश्वरम्
prayoktṛdehasāpekṣaṃ tadardhamakhile'dhvani
kṛtvādhikāraṃ sthityante śivaṃ viśati seśvaram
- 8
विनाधिकरणेनान्यत्प्रधानविकृतेर् अधः
कृत्वाधिकारमीशेष्टम् अपैति स्वाध्वसंहृतौ
vinādhikaraṇenānyatpradhānavikṛter adhaḥ
kṛtvādhikāramīśeṣṭam apaiti svādhvasaṃhṛtau
- 9
ततोऽनन्ताद्यभिव्यक्तः पतीनां ग्रन्थितत्त्वतः
कलाद्यारब्धदेहानां करोत्यष्टादशं शतम्
tato'nantādyabhivyaktaḥ patīnāṃ granthitattvataḥ
kalādyārabdhadehānāṃ karotyaṣṭādaśaṃ śatam
- 10
तान् अप्याविश्य भगवान्साञ्जनान्भुवनाधिपान्
येभ्यः सर्वमिदं येषां शक्तिः कर्मनिबन्धना
tān apyāviśya bhagavānsāñjanānbhuvanādhipān
yebhyaḥ sarvamidaṃ yeṣāṃ śaktiḥ karmanibandhanā
- 11
प्रणेतॄन्पशुशास्त्राणां पशूंस्तदनुवर्तकान्
स्वसाध्यकारकोपेतान्कालधामावधिस्थितान्
praṇetṝnpaśuśāstrāṇāṃ paśūṃstadanuvartakān
svasādhyakārakopetānkāladhāmāvadhisthitān
- 12
स्थितौ सकारकानेतान्समाक्रम्य स्वतेजसा
युनक्ति स्वार्थसिद्ध्यर्थं भूतैर् अनभिलक्षितः
sthitau sakārakānetānsamākramya svatejasā
yunakti svārthasiddhyarthaṃ bhūtair anabhilakṣitaḥ
- 13
भोगसाधनमाक्षिप्य कृत्वा कारणसंश्रयम्
तच्च सात्मकमाक्रम्य विश्रमायावतिष्ठते
bhogasādhanamākṣipya kṛtvā kāraṇasaṃśrayam
tacca sātmakamākramya viśramāyāvatiṣṭhate
- 14
भविनां भवखिन्नानां सर्वभूतहितो यतः
स्वापावसानम् आसाद्य पुनः प्राग्वत्प्रवर्तते
bhavināṃ bhavakhinnānāṃ sarvabhūtahito yataḥ
svāpāvasānam āsādya punaḥ prāgvatpravartate
- 15
स्वापेऽप्यास्ते बोधयन्बोधयोग्यान्रोध्यान्रुन्धन्पाचयन्कर्मिकर्म
मायाशक्तीर्व्यक्तियोग्याः प्रकुर्वन्पश्यन्सर्वं यद्यथा वस्तुजातम्
svāpe'pyāste bodhayanbodhayogyānrodhyānrundhanpācayankarmikarma
māyāśaktīrvyaktiyogyāḥ prakurvanpaśyansarvaṃ yadyathā vastujātam

