11 shlokas
- 1
आग्रहायण्यां पौर्णमास्यां पयसि स्थालीपाकं श्रपयित्वा तस्य जुहोति
अपः श्वेतपदागहि पूर्वेण चापरेण च
सप्त च वारुणीरिमाः प्रजाः सर्वाश्च राजबान्धव्यः स्वाहा
श्वेतो रुषत्यो विदधात्यश्वो दधद्गर्भं वृषः सृत्वर्यां ज्योक्
समं जनाश्चक्रमयो वसानाः प्रोषादसाविरसि विश्वमेजत्
श्वेताय रौषिदश्वाय स्वाहा
न वै श्वेतस्याभ्याचारे अहिर्जघान किंचन
श्वेताय वैतहव्याय स्वाहा
अभयं नः प्राजापत्येभ्यो भूयात्स्वाहा
इति
āgrahāyaṇyāṃ paurṇamāsyāṃ payasi sthālīpākaṃ śrapayitvā tasya juhoti
apaḥ śvetapadāgahi pūrveṇa cāpareṇa ca
sapta ca vāruṇīrimāḥ prajāḥ sarvāśca rājabāndhavyaḥ svāhā
śveto ruṣatyo vidadhātyaśvo dadhadgarbhaṃ vṛṣaḥ sṛtvaryāṃ jyok
samaṃ janāścakramayo vasānāḥ proṣādasāvirasi viśvamejat
śvetāya rauṣidaśvāya svāhā
na vai śvetasyābhyācāre ahirjaghāna kiṃcana
śvetāya vaitahavyāya svāhā
abhayaṃ naḥ prājāpatyebhyo bhūyātsvāhā
iti
- 2
स्रस्तरे ऽहतं वास उदग्दशम् आस्तीर्योदकांस्ये ऽश्मानं व्रीहीन्यवान्वास्य परिषिञ्चति स्योना पृथिवि भवेति द्वाभ्यां सुत्रामाणमिति द्वाभ्याम्
srastare 'hataṃ vāsa udagdaśam āstīryodakāṃsye 'śmānaṃ vrīhīnyavānvāsya pariṣiñcati syonā pṛthivi bhaveti dvābhyāṃ sutrāmāṇamiti dvābhyām
- 3
शमीशाखया च सपलाशयोदञ्चं त्रिः समुन्मार्ष्टि स्योना पृथिवि भवेति द्वाभ्यां सुत्रामाणमिति द्वाभ्यां नमो अस्तु सर्पेभ्य इति तिसृभिश्च
śamīśākhayā ca sapalāśayodañcaṃ triḥ samunmārṣṭi syonā pṛthivi bhaveti dvābhyāṃ sutrāmāṇamiti dvābhyāṃ namo astu sarpebhya iti tisṛbhiśca
- 4
शाम्यन्तु सर्पाः स्वशया भवन्तु ये अन्तरिक्ष उत ये दिवि श्रिताः
इमां महीं प्रत्यवरोहेम
शिवामजस्रां शिवां शान्तां सुहेमन्ताम् उत्तरामुत्तरां समां क्रियासम्
इति ज्येष्ठप्रथमान् उदीच आवेशयति
śāmyantu sarpāḥ svaśayā bhavantu ye antarikṣa uta ye divi śritāḥ
imāṃ mahīṃ pratyavarohema
śivāmajasrāṃ śivāṃ śāntāṃ suhemantām uttarāmuttarāṃ samāṃ kriyāsam
iti jyeṣṭhaprathamān udīca āveśayati
- 5
उदीर्घं जीवो असुर्न आगाद् अपः प्रागात्तम आ ज्योतिरेति
आरैक्पन्थां यातवे सूर्यायागन्म यत्र प्रतरं न आयुः
इति कनिष्ठप्रथमानुज्जिहते
udīrghaṃ jīvo asurna āgād apaḥ prāgāttama ā jyotireti
āraikpanthāṃ yātave sūryāyāganma yatra prataraṃ na āyuḥ
iti kaniṣṭhaprathamānujjihate
- 6
चैत्र्याम् उद्रोहणम्
caitryām udrohaṇam
- 7
न तत्र स्थालीपाको न शाखया समुन्मार्ष्टि
na tatra sthālīpāko na śākhayā samunmārṣṭi
- 8
अयं तल्पः प्रतरणो वसूनां विश्वाबिभ्य तल्पो अस्मान्
ज्योग्जीवेम सर्ववीरा वयं तम
इति तल्पमभिमन्त्रयते
ayaṃ talpaḥ prataraṇo vasūnāṃ viśvābibhya talpo asmān
jyogjīvema sarvavīrā vayaṃ tama
iti talpamabhimantrayate
- 9
त्रीणि नाभ्यानि फाल्गुन्यामाषाढ्यां कार्त्तिक्याम्
trīṇi nābhyāni phālgunyāmāṣāḍhyāṃ kārttikyām
- 10
तासु नाधीयीत
tāsu nādhīyīta
- 11
तासु पयसि स्थालीपाकः स व्याख्यातः
tāsu payasi sthālīpākaḥ sa vyākhyātaḥ

