7 shlokas
- 1
यदि दुःस्वप्नं पश्येद्व्याहृतिभिस्तिलान्हुत्वा दिश उपतिष्ठेत
बोधश्च मा प्रतिबोधश्च पुरस्ताद्गोपायताम्
अस्वप्नश्च मानवद्राणश्च दक्षिणतो गोपायताम्
गोपायमानं च मां रक्षमाणं च पश्चाद्गोपायताम्
जागृविश्च मारुन्धती चोत्तरतो गोपायताम्
विष्णुश्च मा पृथिवी च नागाश्चाधस्ताद्गोपायताम्
बृहस्पतयश्च मा विश्वे च मा देवा द्यौश्चोपरिष्टाद्गोपायताम्
yadi duḥsvapnaṃ paśyedvyāhṛtibhistilānhutvā diśa upatiṣṭheta
bodhaśca mā pratibodhaśca purastādgopāyatām
asvapnaśca mānavadrāṇaśca dakṣiṇato gopāyatām
gopāyamānaṃ ca māṃ rakṣamāṇaṃ ca paścādgopāyatām
jāgṛviśca mārundhatī cottarato gopāyatām
viṣṇuśca mā pṛthivī ca nāgāścādhastādgopāyatām
bṛhaspatayaśca mā viśve ca mā devā dyauścopariṣṭādgopāyatām
- 2
एवं यस्मिंश्चोत्पन्ने ऽनर्थाञ्शङ्केत
evaṃ yasmiṃścotpanne 'narthāñśaṅketa
- 3
व्याहृतिभिस्तिलान्हुत्वा तपः प्रतिपद्येत द्वादशरात्रं षड्रात्रं त्रिरात्रम् एकरात्रं वा
vyāhṛtibhistilānhutvā tapaḥ pratipadyeta dvādaśarātraṃ ṣaḍrātraṃ trirātram ekarātraṃ vā
- 4
यदि समुत्पातं मन्येत तद्वा
yadi samutpātaṃ manyeta tadvā
- 5
यदि पर्वसु मार्त्तिकं भिद्यते पार्थिवम् असि पृथिवीं दृंहस्व योनिं गच्छ स्वाहेत्य् अप्सु प्रहरेत्
yadi parvasu mārttikaṃ bhidyate pārthivam asi pṛthivīṃ dṛṃhasva yoniṃ gaccha svāhety apsu praharet
- 6
यद्यर्चा दह्येद्वा नश्येद्वा प्रपतेद्वा प्रभजेद्वा प्रहसेद्वा प्रचलेद्वा स्थाल्या वा स्थालीम् आसिच्य दक्षिणोत्तरा वा स्थाली भिद्येतोत्तरा वोपलाशे नियम्य द्वारवंशो वा स्फुटेत्
गौर्वा गां धयेत्स्त्री वा स्त्रियम् आहन्यात्कर्तसंसर्गे हलसंसर्गे मुसलप्रपतने मुसलं वावशीर्येतान्यस्मिंश्चाद्भुत एताभिर्जुहुयात्
स्वस्ति न इन्द्रो वृद्धश्रवाः स्वस्ति नः पूषा विश्ववेदाः
स्वस्ति नस्तार्क्ष्यो अरिष्टनेमिः स्वस्ति नो बृहस्पतिर्दधातु
स्वस्ति नो मिमीताम् अश्विना भगः स्वस्ति देव्य् अदितिर् अनर्वणः
स्वस्ति पूषा असुरो दधातु नः स्वस्ति द्यावापृथिवी सुचेतुना
स्वस्तये वायुम् उपब्रवामहै सोमं स्वस्ति भुवनस्य यस्पतिः
बृहस्पतिं सर्वगणं स्वस्तये स्वस्तय आदित्यासो भवन्तु नः
विश्वे देवा नो अद्या स्वस्तये वैश्वानरो वसुर् अग्निः स्वस्तये
देवा अवन्त्व् ऋभवः स्वस्तये स्वस्ति नो रुद्रः पात्व् अंहसः
स्वस्ति नः पथ्यासु धन्वसु स्वस्त्य् अप्सु व्रजने स्वर्वतः
स्वस्ति नः पथ्याकृतेषु योनिषु स्वस्ति राये मरुतो दधातु नः
त्रातारम् इन्द्रं मा ते अस्यां वि न इन्द्र मृगो न भीमस्तं शं योर् आवृणीमह इति दशाहुतयः
yadyarcā dahyedvā naśyedvā prapatedvā prabhajedvā prahasedvā pracaledvā sthālyā vā sthālīm āsicya dakṣiṇottarā vā sthālī bhidyetottarā vopalāśe niyamya dvāravaṃśo vā sphuṭet
gaurvā gāṃ dhayetstrī vā striyam āhanyātkartasaṃsarge halasaṃsarge musalaprapatane musalaṃ vāvaśīryetānyasmiṃścādbhuta etābhirjuhuyāt
svasti na indro vṛddhaśravāḥ svasti naḥ pūṣā viśvavedāḥ
svasti nastārkṣyo ariṣṭanemiḥ svasti no bṛhaspatirdadhātu
svasti no mimītām aśvinā bhagaḥ svasti devy aditir anarvaṇaḥ
svasti pūṣā asuro dadhātu naḥ svasti dyāvāpṛthivī sucetunā
svastaye vāyum upabravāmahai somaṃ svasti bhuvanasya yaspatiḥ
bṛhaspatiṃ sarvagaṇaṃ svastaye svastaya ādityāso bhavantu naḥ
viśve devā no adyā svastaye vaiśvānaro vasur agniḥ svastaye
devā avantv ṛbhavaḥ svastaye svasti no rudraḥ pātv aṃhasaḥ
svasti naḥ pathyāsu dhanvasu svasty apsu vrajane svarvataḥ
svasti naḥ pathyākṛteṣu yoniṣu svasti rāye maruto dadhātu naḥ
trātāram indraṃ mā te asyāṃ vi na indra mṛgo na bhīmastaṃ śaṃ yor āvṛṇīmaha iti daśāhutayaḥ
- 7
जयप्रभृति समानम्
jayaprabhṛti samānam

