33 shlokas
- 1
अथातो विनायकान्व्याख्यास्यामः
athāto vināyakānvyākhyāsyāmaḥ
- 2
शालकटङ्कटश्च कूष्माण्डराजपुत्रश्चोस्मितश्च देवयजनश्चेति
śālakaṭaṅkaṭaśca kūṣmāṇḍarājaputraścosmitaśca devayajanaśceti
- 3
एतैर् अधिगतानाम् इमानि रूपाणि भवन्ति
etair adhigatānām imāni rūpāṇi bhavanti
- 4
लोष्ठं मृद्नाति
loṣṭhaṃ mṛdnāti
- 5
तृणानि छिनत्ति
tṛṇāni chinatti
- 6
अङ्गेषु लेखान्लिखति
aṅgeṣu lekhānlikhati
- 7
अपः स्वप्नं पश्यति
apaḥ svapnaṃ paśyati
- 8
मुण्डान्पश्यति
muṇḍānpaśyati
- 9
जटिलान्पश्यति
jaṭilānpaśyati
- 10
काषायवाससः पश्यति
kāṣāyavāsasaḥ paśyati
- 11
उष्ट्रान्सूकरान्गर्दभान्दिवाकीर्त्यादीन् अन्यांश्चाप्रयतान्स्वप्नान्पश्यति
uṣṭrānsūkarāngardabhāndivākīrtyādīn anyāṃścāprayatānsvapnānpaśyati
- 12
अन्तरिक्षं क्रामति
antarikṣaṃ krāmati
- 13
अध्वानं व्रजन्मन्यते पृष्ठतो मे कश्चिद् अनुव्रजति
adhvānaṃ vrajanmanyate pṛṣṭhato me kaścid anuvrajati
- 14
एतैः खलु विनायकैर् आविष्टा राजपुत्रा लक्षणवन्तो राज्यं न लभन्ते
etaiḥ khalu vināyakair āviṣṭā rājaputrā lakṣaṇavanto rājyaṃ na labhante
- 15
कन्याः पतिकामा लक्षणवत्यो भर्तॄन्न लभन्ते
kanyāḥ patikāmā lakṣaṇavatyo bhartṝnna labhante
- 16
स्त्रियः प्रजाकामा लक्षणवत्यः प्रजां न लभन्ते
striyaḥ prajākāmā lakṣaṇavatyaḥ prajāṃ na labhante
- 17
स्त्रीणाम् आचारवतीनाम् अपत्यानि म्रियन्ते
strīṇām ācāravatīnām apatyāni mriyante
- 18
श्रोत्रियो ऽध्यापक आचार्यत्वं न प्राप्नोति
śrotriyo 'dhyāpaka ācāryatvaṃ na prāpnoti
- 19
अध्येतॄणाम् अध्ययने महाविघ्नानि भवन्ति
adhyetṝṇām adhyayane mahāvighnāni bhavanti
- 20
वणिजां वणिक्पथो विनश्यति
vaṇijāṃ vaṇikpatho vinaśyati
- 21
कृषिकराणां कृषिर् अल्पफला भवति
kṛṣikarāṇāṃ kṛṣir alpaphalā bhavati
- 22
तेषां प्रायश्चित्तम्
teṣāṃ prāyaścittam
- 23
मृगाखरकुलायमृत्तिकारोचनागुग्गुलाः
mṛgākharakulāyamṛttikārocanāguggulāḥ
- 24
चतुर्भ्यः प्रस्रवणेभ्यश्चतुरुदकुम्भान् अव्यङ्गान् आहरेत्
caturbhyaḥ prasravaṇebhyaścaturudakumbhān avyaṅgān āharet
- 25
सर्वगन्धसर्वरससर्वौषधीः सर्वरत्नानि चोपकल्प्य प्रतिसरदधिमधुघृतम् इति
sarvagandhasarvarasasarvauṣadhīḥ sarvaratnāni copakalpya pratisaradadhimadhughṛtam iti
- 26
एतान्संभारान्संसृज्य
ऋषभचर्मारुह्याथैनं
सहस्राक्षं शतधारम् ऋषिभिः पावनं कृतम्
ताभिष्ट्वाभिषिञ्चामि पावमानीः पुनन्तु त्वा
अग्निना दत्ता इन्द्रेण दत्ताः सोमेन दत्ता वरुणेन दत्ता वायुना दत्ता विष्णुना दत्ता बृहस्पतिना दत्ता विश्वैर्देवैर्दत्ताः सर्वैर्देवैर्दत्ता ओषधय आपो वरुणसंमितास्ताभिष्ट्वाभिषिञ्चामि पावमानीः पुनन्तु त्वेति सर्वत्रानुषजति
यत्ते केशेषु दौर्भाग्यं सीमन्ते यच्च मूर्धनि
ललाटे कर्णयोर् अक्ष्णोर् आपस्तद्घ्नन्तु ते सदा
भगं ते वरुणो राजा भगं सूर्यो बृहस्पतिः
भगम् इन्द्रश्च वायुश्च भगं सप्तर्षयो ददुः
इति
etānsaṃbhārānsaṃsṛjya
ṛṣabhacarmāruhyāthainaṃ
sahasrākṣaṃ śatadhāram ṛṣibhiḥ pāvanaṃ kṛtam
tābhiṣṭvābhiṣiñcāmi pāvamānīḥ punantu tvā
agninā dattā indreṇa dattāḥ somena dattā varuṇena dattā vāyunā dattā viṣṇunā dattā bṛhaspatinā dattā viśvairdevairdattāḥ sarvairdevairdattā oṣadhaya āpo varuṇasaṃmitāstābhiṣṭvābhiṣiñcāmi pāvamānīḥ punantu tveti sarvatrānuṣajati
yatte keśeṣu daurbhāgyaṃ sīmante yacca mūrdhani
lalāṭe karṇayor akṣṇor āpastadghnantu te sadā
bhagaṃ te varuṇo rājā bhagaṃ sūryo bṛhaspatiḥ
bhagam indraśca vāyuśca bhagaṃ saptarṣayo daduḥ
iti
- 27
अधिस्नातस्य निशायां सद्यः पीडितसर्षपतैलम् औदुम्बरेण स्रुवेण मूर्धनि चतस्र आहुतीर्जुहोति
शालकटङ्कटाय स्वाहा
कूष्माण्डराजपुत्राय स्वाहा
उस्मिताय स्वाहा
देवयजनाय स्वाहेति
adhisnātasya niśāyāṃ sadyaḥ pīḍitasarṣapatailam audumbareṇa sruveṇa mūrdhani catasra āhutīrjuhoti
śālakaṭaṅkaṭāya svāhā
kūṣmāṇḍarājaputrāya svāhā
usmitāya svāhā
devayajanāya svāheti
- 28
अत ऊर्ध्वं ग्रामचतुष्पथे नगरचतुष्पथे निगमचतुष्पथे वा सर्वतोमुखान्दर्भान् आस्तीर्य नवे शूर्पे बलिम् उपहरति फलीकृतांस्तण्डुलान् अफलीकृतांस्तण्डुलानामं मांसं पक्वं मांसम् आमान्मत्स्यान्पक्वान्मत्स्यान् आमान् अपूपान्पक्वान् अपूपान्पिष्टान्गन्धान् अपिष्टान्गन्धान्गन्धपानं मधुपानं मैरेयपानं सुरापानं मुक्तं माल्यं ग्रथितं माल्यं रक्तं माल्यं शुक्लं माल्यं रक्तपीतशुक्लकृष्णनीलहरितचित्रवासांसि माषकल्माषमूलफलमिति
ata ūrdhvaṃ grāmacatuṣpathe nagaracatuṣpathe nigamacatuṣpathe vā sarvatomukhāndarbhān āstīrya nave śūrpe balim upaharati phalīkṛtāṃstaṇḍulān aphalīkṛtāṃstaṇḍulānāmaṃ māṃsaṃ pakvaṃ māṃsam āmānmatsyānpakvānmatsyān āmān apūpānpakvān apūpānpiṣṭāngandhān apiṣṭāngandhāngandhapānaṃ madhupānaṃ maireyapānaṃ surāpānaṃ muktaṃ mālyaṃ grathitaṃ mālyaṃ raktaṃ mālyaṃ śuklaṃ mālyaṃ raktapītaśuklakṛṣṇanīlaharitacitravāsāṃsi māṣakalmāṣamūlaphalamiti
- 29
अथ देवानाम् आवाहनं विमुखः श्येनो बको यक्षः कलहो भीरुर्विनायकः कूष्माण्डराजपुत्रो यज्ञाविक्षेपी कुलङ्गापमारी यूपकेशी सूपरक्रोडी हैमवतो जम्भको विरूपाक्षो लोहिताक्षो वैश्रवणो महासेनो महादेवो महाराज इति
एते मे देवाः प्रीयन्तां प्रीता मां प्रीणयन्तु तृप्ता मां तर्पयन्त्विति
atha devānām āvāhanaṃ vimukhaḥ śyeno bako yakṣaḥ kalaho bhīrurvināyakaḥ kūṣmāṇḍarājaputro yajñāvikṣepī kulaṅgāpamārī yūpakeśī sūparakroḍī haimavato jambhako virūpākṣo lohitākṣo vaiśravaṇo mahāseno mahādevo mahārāja iti
ete me devāḥ prīyantāṃ prītā māṃ prīṇayantu tṛptā māṃ tarpayantviti
- 30
अधिष्ठिते ऽर्धरात्र आचार्यो ग्रहान् उपतिष्ठते
भगवति भगं मे देहि वर्णवति वर्णं मे देहि रूपवति रूपं मे देहि तेजस्विनि तेजो मे देहि यशस्विनि यशो मे देहि पुत्रवति पुत्रान्मे देहि सर्ववति सर्वान्कामान्मे प्रदेहीति
adhiṣṭhite 'rdharātra ācāryo grahān upatiṣṭhate
bhagavati bhagaṃ me dehi varṇavati varṇaṃ me dehi rūpavati rūpaṃ me dehi tejasvini tejo me dehi yaśasvini yaśo me dehi putravati putrānme dehi sarvavati sarvānkāmānme pradehīti

