14 shlokas
- 1
तृतीयस्य वर्षस्य भूयिष्ठे गते चूडाः कारयेत्
उदगयने ज्यौत्स्ने पुण्ये नक्षत्रे ऽन्यत्र नवम्याम्
tṛtīyasya varṣasya bhūyiṣṭhe gate cūḍāḥ kārayet
udagayane jyautsne puṇye nakṣatre 'nyatra navamyām
- 2
जयप्रभृतिभिर्हुत्वा
उष्णेन वायुर् उदकेनेद्यजमानस्यायुषा
सविता वरुणो दधद्यजमानाय दाशुषे
इत्य् उष्णा अपो ऽभिमन्त्रयते
jayaprabhṛtibhirhutvā
uṣṇena vāyur udakenedyajamānasyāyuṣā
savitā varuṇo dadhadyajamānāya dāśuṣe
ity uṣṇā apo 'bhimantrayate
- 3
अदितिः केशान्वपत्व् आप उन्दन्तु जीवसे
धारयतु प्रजापतिः पुनः पुनः स्वस्तये
इत्य् अभ्युन्दति
aditiḥ keśānvapatv āpa undantu jīvase
dhārayatu prajāpatiḥ punaḥ punaḥ svastaye
ity abhyundati
- 4
ओषधे त्रायस्वैनम् इति दक्षिणस्मिन्केशान्ते दर्भमन्तर्दधाति
oṣadhe trāyasvainam iti dakṣiṇasminkeśānte darbhamantardadhāti
- 5
स्वधिते मैनं हिंसीर् इति क्षुरेणाभिनिदधाति
svadhite mainaṃ hiṃsīr iti kṣureṇābhinidadhāti
- 6
येनावपत्सविता क्षुरेण सोमस्य राज्ञो वरुणस्य केशान्
तेन ब्राह्मणो वपत्व् आयुष्मान् अयं जरदष्टिर् अस्तु
येन पूषा बृहस्पतेर् इन्द्रस्य चायुषे ऽवपत्
तेन ते वपाम्यायुषे दीर्घायुत्वाय जीवसे
येन भूयश्चरत्य् अयं ज्योक्च पश्यति सूर्यः
तेन ते वपाम्यायुषे सुश्लोक्याय स्वस्तये
इति तिसृभिस्त्रिः प्रवपति
yenāvapatsavitā kṣureṇa somasya rājño varuṇasya keśān
tena brāhmaṇo vapatv āyuṣmān ayaṃ jaradaṣṭir astu
yena pūṣā bṛhaspater indrasya cāyuṣe 'vapat
tena te vapāmyāyuṣe dīrghāyutvāya jīvase
yena bhūyaścaraty ayaṃ jyokca paśyati sūryaḥ
tena te vapāmyāyuṣe suślokyāya svastaye
iti tisṛbhistriḥ pravapati
- 7
यत्क्षुरेण वर्तयता सुतेजसा वप्तर्वपसि केशान्
शुन्द्धि शिरो मास्यायुः प्रमोषीः
इति लौहायसं क्षुरं केशवापाय प्रयच्छति
yatkṣureṇa vartayatā sutejasā vaptarvapasi keśān
śunddhi śiro māsyāyuḥ pramoṣīḥ
iti lauhāyasaṃ kṣuraṃ keśavāpāya prayacchati
- 8
मा ते केशान् अनुगाद्वर्च एतत्तथा धाता दधातु ते
तुभ्यम् इन्द्रो वरुणो बृहस्पतिः सविता वर्च आदधुः
इति प्रवपतो ऽनुमन्त्रयते
mā te keśān anugādvarca etattathā dhātā dadhātu te
tubhyam indro varuṇo bṛhaspatiḥ savitā varca ādadhuḥ
iti pravapato 'numantrayate
- 9
सुहृत्परिग्राहं हरितगोशकृत्पिण्डे समवचिनोति
suhṛtparigrāhaṃ haritagośakṛtpiṇḍe samavacinoti
- 10
उप्त्वाय केशान्वरुणस्य राज्ञो बृहस्पतिः सविता विष्णुर् अग्निः
तेभ्यो निधानं महतं न विन्दन्न् अन्तरा द्यावापृथिव्योर् अपस्युः
इति प्रागुदीचो ह्रियमाणान् अनुमन्त्रयते
uptvāya keśānvaruṇasya rājño bṛhaspatiḥ savitā viṣṇur agniḥ
tebhyo nidhānaṃ mahataṃ na vindann antarā dyāvāpṛthivyor apasyuḥ
iti prāgudīco hriyamāṇān anumantrayate
- 11
अरिक्ते पत्न्य् आश्लेषयेद् इति श्रुतिः
arikte patny āśleṣayed iti śrutiḥ
- 12
वरं कर्त्रे ददाति पक्ष्मगुडं तिलपिश्लं च केशवापाय
varaṃ kartre dadāti pakṣmaguḍaṃ tilapiślaṃ ca keśavāpāya
- 13
एतेन तु कल्पेन षोडशे वर्षे गोदानम् अग्निं वाध्येष्यमाणस्याग्निर्गोदानिको मैत्रायणिर् इति श्रुतिः
etena tu kalpena ṣoḍaśe varṣe godānam agniṃ vādhyeṣyamāṇasyāgnirgodāniko maitrāyaṇir iti śrutiḥ
- 14
अदितिः श्मश्रु वपत्व् इत्य् ऊहेन श्मश्रु प्रवपति शुन्द्धि मुखमिति च
aditiḥ śmaśru vapatv ity ūhena śmaśru pravapati śunddhi mukhamiti ca

